Isọn̄ Georgia ẹnyene ikpọ obot emi ọyọhọde ye snow. Ndusụk obot emi okon̄ ebe ikpat 15,000. Ẹbahade Georgia ke ikpehe iba. N̄kan̄ kiet kiet enyene nsio nsio ikpehe emi eyo, ido, ikwọ, unek, ye udia mmọ okpụhọrede.

Mme Owo Ẹbe 3,700,000 ke Georgia. Ata ediwak mmọ ẹdi nditọisọn̄.

Ido Ukpono Ata ediwak owo ke Georgia ẹdọhọ ke idi Christian. Mbon Muslim iwakke do.

Usem Mmọ ẹsisem Georgian. Usem mmọ ibietke usem nsio nsio idụt emi ẹkperede mmọ. Abisi mmọ enen̄ede okpụhọde. Mbụk ọdọhọ ke ẹma ẹsosio abisi usem Georgia ẹdi mbemiso eyo Jesus.

 Se Ẹnamde Ẹda Ẹdu Uwem Ediwak owo ẹsitọ in̄wan̄ ẹdia n̄kpọ. N̄kpọ en̄wen emi osiode okụk ọnọ mmọ idahaemi edi mme owo ndisito nsio nsio itie ndi ndise idụt mmọ.

Nte Eyo Etiede Eyo ke n̄kan̄ edem usiahautịn isifiopke ikaha, isinyụn̄ ibịtke ikaha. Edi eyo esifiop ekpri ke n̄kan̄ emi ekperede mbenesụk Obubịt Inyan̄ ke edem usoputịn. Nsio nsio uduot sokoro emi ẹtọde ke n̄kan̄ oro ẹsin̄wụm etieti ẹnyụn̄ ẹye idem.

 Udia Udia mmọ esisan̄a ye bred. Ẹsitem ata bred n̄kan̄ mmọ ke oven emi ẹdade mbat ẹnam. Stew emi ẹsịnde ikọn̄ ye nsio nsio n̄kpọ emi ọfuọn̄de ke mmọ ẹsiwak ndida ndia mme n̄kpọ eken. Idịghe mfịn ke mbon Georgia ẹketọn̄ọ ndisinam wine. Mmọ ẹsinịm wine mmọ akabade udan̄ kan̄a, ekem ẹdọn̄ ke aban̄ mbat ẹnịm. Ediwak owo ẹnyene in̄wan̄ grape, ẹsinyụn̄ ẹnam wine mmọ ikpọn̄. Grape emi odude ke Georgia ebe utọ 500.