UKPEPN̄KPỌ 51
Ekpesitịn̄ Ikọ Didie Yak Enem Jehovah?
Eti n̄kpọ kiet emi Jehovah akanamde ọnọ nnyịn ini obotde nnyịn ekedi ndinam nnyịn ikeme nditịn̄ ikọ. Ndi nte isitịn̄de ikọ esibehe enye? Ih, esibehe! (Kot James 1:26.) Ntre ikpesitịn̄ ikọ didie yak enem Jehovah?
1. Ikpesitịn̄ ikọ didie?
Bible ọdọhọ nnyịn ete: “Ẹka iso ẹdọn̄ kiet eken esịt ẹnyụn̄ ẹbọp kiet eken ọkọri.” (1 Thessalonica 5:11) Ndi ọmọdiọn̄ọ owo ndomokiet emi oyomde ndọn̄esịt? Nso ke akpanam man ọdọn̄ mme owo ntre esịt? Nam mmọ ẹdiọn̄ọ ke emekere aban̄a mmọ. Emekeme ndidọhọ mmọ n̄kpọ kiet m̀mê iba emi anamde fi ama mmọ. Kere itie Bible emi ekemede ndida nsọn̄ọ owo emi afo ọdiọn̄ọde idem. Emekeme ndimek itie Bible ekededi emi ọdiọn̄ọde. Ti ke idịghe se itịn̄de kpọt ekeme ndisọn̄ọ owo idem, nte itịn̄de ekeme n̄ko ndinen̄ede nsọn̄ọ owo idem. Ntre sima nditịn̄ nti ikọ ye mme owo, nyụn̄ sitịn̄ ukpono ukpono.—Mme N̄ke 15:1.
2. Nso utọ ikọ ke nnyịn mîkpesitịn̄ke?
Bible ọdọhọ ete: “Ẹkûyak mbumbu ikọ ọwọrọ mbufo ke inua.” (Kot Ephesus 4:29.) Ọwọrọ ke nnyịn ikpesitịn̄ke idiọk ikọ, ikpesisụn̄ike owo, m̀mê itịn̄ n̄kpọ emi edibiakde-biak owo. Ana ikpeme idem n̄ko ye ikọ-edem ye edidọk.—Kot Mme N̄ke 16:28.
3. Nso idin̄wam nnyịn isitịn̄ se isọn̄ọde owo idem?
Se isịnede nnyịn ke esịt m̀mê se ikerede ke isiwakde nditịn̄. (Luke 6:45) Ntre ana isikere nti n̄kpọ—n̄kpọ emi enende, asanade, ẹmade, ye n̄kpọ emi ọwọrọde eti etop. (Philippi 4:8) Ana ikpeme utọ ufan emi inyenede ye utọ ikwọ m̀mê fim emi isimade ndise man ikeme ndisikere nti n̄kpọ. (Mme N̄ke 13:20) Ọfọn n̄ko isikere kan̄a se iyomde nditịn̄ mbemiso itịn̄de. Kere nte se oyomde nditịn editiede mbon en̄wen. Bible ọdọhọ ete: “Enyene owo emi etịn̄de ikọ ye unana edikere, nte emi akan̄kan̄ ekịmde, edi edeme mbon ọniọn̄ ọkọk unan.”—Mme N̄ke 12:18.
SỊN IDEM KPEP
Se se idin̄wamde fi esitịn̄ se Jehovah amade ye se idisọn̄ọde mbon en̄wen idem.
4. Kpeme se esitịn̄de
Ndusụk ini imesitịn̄ ikọ emi edide ima itịn̄ ima nnyịn itua n̄kpọfiọk. (James 3:2) Kot Galatia 5:22, 23, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ewe ke otu n̄kpọ oro ẹbatde ke itie Bible oro ke ọkpọbọn̄ akam eben̄e Abasi man an̄wam fi ekpeme se esitịn̄de? Didie ke se ẹbatde oro ke itie Bible oro ekeme ndin̄wam fi?
Kot 1 Corinth 15:33, ekem ẹbọrọ mbụme emi ẹnyụn̄ ẹneme ẹban̄a enye:
-
Ndi emekere ke utọ ufan emi enyenede ye utọ ikwọ m̀mê fim emi esisede ekeme ndinam ọtọn̄ọ etịn̄ se mûkusutịn̄ke?
Nso ikeme ndinam fi okpụhọde nte esitịn̄de ikọ?
Kot Ecclesiastes 3:1, 7, ekem ẹbọrọ mbụme emi ẹnyụn̄ ẹneme ẹban̄a enye:
-
Ini ewe ke ọkpọfọn idop uyo m̀mê ibet kan̄a mbemiso itịn̄de ikọ?
5. Sitịn̄ nti n̄kpọ ban̄a mme owo
Nso idin̄wam nnyịn ikûsusọn̄ọ owo enyịn m̀mê ikûsutịn̄ idiọk ikọ uban̄a owo? Se VIDIO emi, ekem ẹbọrọ mbụme oro ẹtienede ẹnyụn̄ ẹneme ẹban̄a mmọ.
-
Ke vidio oro, nso ikanam brọda oro ọtọn̄ọ ndisitịn idiọk ikọ mban̄a owo?
-
Nso ke enye akanam man enye okpụhọde nte enye esitịn̄de ikọ?
Kot Ecclesiastes 7:16, ekem ẹbọrọ mbụme emi ẹnyụn̄ ẹneme ẹban̄a enye:
-
Nso ke ikpeti edieke ọdọn̄de nnyịn nditịn̄ idiọk ikọ mban̄a owo?
Kot Ecclesiastes 7:21, 22, ekem ẹbọrọ mbụme emi ẹnyụn̄ ẹneme ẹban̄a enye:
-
Didie ke itie Bible emi ekeme ndin̄wam fi okûnen̄ede uyat esịt owo ekpetịn̄ idiọk ikọ aban̄a fi?
6. Sitịn̄ ikọ ukpono ukpono ke ufọk
Jehovah oyom se isitịn̄de ye mme owo ke ufọk nnyịn owụt ke imama inyụn̄ ikpono mmọ. Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
-
Nso idin̄wam fi esitịn̄ ikọ ukpono ukpono ye mme owo ke ufọk mbufo?
Kot Ephesus 4:31, 32, ekem ẹbọrọ mbụme emi ẹnyụn̄ ẹneme ẹban̄a enye:
-
Nso utọ ikọ isinam ubon ẹdiana kiet?
Jehovah ama etịn̄ nte enye adade Jesus Eyen esie. Kot Matthew 17:5, ekem ẹbọrọ mbụme emi ẹnyụn̄ ẹneme ẹban̄a enye:
-
Didie ke ikpekpebe Jehovah ima itịn̄ ikọ ye mme owo ke ubon nnyịn?
Sima nditoro owo
NDUSỤK OWO ẸSIDỌHỌ ẸTE: “Okịmmọn̄ nsidịpke inua. Owo mîmaha, mfịna esie edi oro.”
-
Ndi ọfọn owo etie ntre? Nso inam ọdọhọ ntre?
SE IKPEPDE
Ikọ enyene odudu. Ọfọn isikere se iyomde nditịn̄, ini iditịn̄de, ye nte iditịn̄de.
Se M̀mê Emeti
-
Ekere ke nso ye nso idisinam yak ikọ fo an̄wam mbon en̄wen?
-
Mme utọ ikọ ewe ke mîkpanaha esitịn̄?
-
Nso idisin̄wam nnyịn isitịn̄ ikọ emi ọsọn̄ọde owo idem ye ikọ emi owụtde ke imokpono mmọ?
KPEP N̄KPỌ EN̄WEN
Nso idin̄wam nnyịn isitịn̄ ikọ emi esisọn̄ọde owo idem?
Se se idin̄wamde fi okûsutịn̄ idiọk ikọ.
Se se idin̄wamde fi okûsutịn̄ idiọk ikọ uban̄a owo.
Nso ke N̄kpanam Mbak Nditiene Ntịn̄ Idiọk Ikọ Mban̄a Owo? (2:36)
Se nte Jehovah akan̄wamde ete kiet etre idiọk ikọ inua.
“Mma N̄kere M̀mê M̀mọ̀n̄ ke Utọ Uwem Emi Edida Mi Ika” (Enyọn̄-Ukpeme, August 1, 2013)
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
