Ke ini ndusụk mme Jew ẹdọhọde ke Jesus abiat ibet Sabbath ke ndinam idem ọsọn̄ owo, Jesus ọbọrọ mmọ ete: “Ete mi ke ananam utom tutu esịm emi, ami ke nnyụn̄ nnam utom.”—John 5:17.

Ibet Sabbath oro Abasi ọkọnọde ikọt esie ikpanke utom Jesus emi edide ndikwọrọ ikọ nnyụn̄ n̄kọk udọn̄ọ. Enye anam emi sia enye ekpebede nti utom Abasi. Ntre Jesus ananam nti utom esie kpukpru usen. Edi ibọrọ oro enye ọnọde mbon oro ẹdoride enye ikọ, anam mmọ ẹnen̄ede ẹyat esịt ẹkan nte ẹkeyatde ẹnyụn̄ ẹyom usụn̄ nte ẹwotde enye. Ntak emi mmọ ẹyatde esịt ẹyom ndiwot enye?

Mmọ ẹkere ke Jesus abiat ibet Sabbath ke ndikọk mme owo udọn̄ọ. Ekikere mmọ inenke ke baba usụn̄ kiet. Se ikam ibiakde mmọ ikan edi ke Jesus ọdọhọ ke imọ idi Eyen Abasi. Mmọ ẹkere ke enye osụn̄i Abasi, sia enye ọdọhọde ke Abasi edi Ete imọ, nte n̄kpọ eke enye ndidọhọ ntre anamde enye edi n̄ka ye Abasi. Edi Jesus ifeheke mmọ, ntre ke ibọrọ esie, enye aka iso etịn̄ aban̄a san̄asan̄a n̄kpọ oro imọ ibuanade ye Abasi ete: “Ete amama Eyen onyụn̄ owụt enye kpukpru n̄kpọ emi enye ke idemesie anamde.”—John 5:20.

Ete edi Andinọ Uwem. Enye ama owowụt emi ke eset ke ini enye ọkọnọde mme owo odudu ndinam mme akpan̄kpa ẹset. Jesus aka iso ete: “Kpa nte Ete anamde mme akpan̄kpa ẹset onyụn̄ anamde mmọ ẹdu uwem, ntre n̄ko ke Eyen anam mbon oro enye amade ẹdu uwem.” (John 5:21) Ata eti ikọ edi emi, anam owo enyene idotenyịn! Idem idahaemi, Eyen ke anam mme akpan̄kpa ẹset ke ndamban̄a usụn̄. Oro anam Jesus ọdọhọ ete: “Owo eke okopde ikọ mi onyụn̄ enịmde enye emi ọkọdọn̄de mi ke akpanikọ, enyene nsinsi uwem, enye idụkke ke ikpe edi ama oto ke n̄kpa ebe odụk uwem.”—John 5:24.

Tutu emi, idụhe ebiet oro ẹdọhọde kan̄a ẹte ke Jesus anam owo ekededi emi akakpade eset, edi enye ọdọhọ mbon oro ẹdoride enye ikọ ke mme owo ẹyeset. Enye ọdọhọ mmọ ete: “Ini ke edi eke kpukpru mme andidu ke udi editi ẹdikopde enye uyo ẹwọn̄ọ ẹdi.”—John 5:28, 29.

Kpa ye emi Jesus enyenede odudu ndinam utọ akwa n̄kpọ emi, enye anam an̄wan̄a ke Abasi okpon akan imọ, ete: “N̄kemeke ndinam baba n̄kpọ kiet ke odudu idemmi; . . . ndomoke ndinam uduak idemmi, edi nnam uduak enye emi ọkọdọn̄de mi.” (John 5:30) Edi Jesus etịn̄ ke imọ idi akpan owo emi Abasi edidade inam uduak esie osu. Akpa ini edi emi enye etịn̄de orụk ikọ emi ke eferife edi emi. Edi mbon oro ẹdoride enye ikọ ẹfọfiọk mme n̄kpọ emi. Jesus ọdọhọ mmọ ete: “Mbufo ẹma ẹsio mme owo ẹdọn̄ ẹka ke ọtọ John [Andinịm Owo Baptism], ndien enye etie ntiense aban̄a akpanikọ.”—John 5:33.

Ekeme ndidi mbon oro ẹdoride Jesus ikọ ẹma ẹkop se John eketịn̄de ke n̄kpọ nte isua iba oro ẹkebede ọnọ ikpọ owo ido ukpono mme Jew aban̄a Owo oro etienede imọ ke edem, emi ẹkekotde “Prọfet” ye “Christ.” (John 1:20-25) Jesus eti mmọ adan̄a nte mmọ ẹkesikponode John oro odude idahaemi ke ufọk-n̄kpọkọbi ete: “Mbufo ẹma ẹdara etieti ke un̄wana esie ke ibio ini.” (John 5:35) Edi n̄kpọ ntiense Jesus akan eke John Andinịm Owo Baptism.

Jesus ọdọhọ mmọ ete: “Mme utom oro ami nnamde [esịnede ukọkudọn̄ọ oro enye osụk anamde do], ẹtie ntiense ẹban̄a mi ẹte ke Ete okosio mi ọdọn̄. N̄ko, Ete emi okosiode mi ọdọn̄ etie ntiense aban̄a mi.” (John 5:36, 37) Ke uwụtn̄kpọ, Abasi ama etie ntiense aban̄a Jesus ke ini baptism esie.—Matthew 3:17.

Ke akpanikọ, mbon oro ẹdoride Jesus ikọ inyeneke n̄kpọ ndomokiet nditịn̄ nnyan̄a idem. N̄wed Abasi oro mmọ ẹdọhọde nte ikotde etie ntiense aban̄a Jesus n̄ko. Ntre, Jesus ọdọhọ mmọ ete: “Edieke mbufo ẹkenịmde Moses ke akpanikọ mbufo ẹkpenịm mi ke akpanikọ, koro enye ama ewet aban̄a mi. Edi edieke mbufo mînịmke se enye ekewetde ke akpanikọ, mbufo ẹdisan̄a didie ẹnịm ikọ mi ke akpanikọ?”—John 5:46, 47.