Noah, ubon esie, ye mme unam ẹma ẹdụk ubom oro. Jehovah ama ediberi usụn̄ ubom oro, edịm onyụn̄ ọtọn̄ọ ndidep. Edịm ama okpon tutu ubom oro ọtọn̄ọ ndifiọrọ ke enyọn̄ mmọn̄. Mmọn̄ oro ama ofụk ofụri isọn̄. Kpukpru ndiọi owo ẹma ẹkpan̄a, edi n̄kpọ ikanamke Noah ye ubon esie. Ama enem mmọ nte mmọ ẹkenamde se Jehovah ọkọdọhọde!

Edịm oro ekedep uwemeyo 40 ye okoneyo 40. Ekem mmọn̄ edịm oro ama ọtọn̄ọ ndisat sụn̄sụn̄. Ndien ubom oro ama okodoro ke obot kiet. Edi Noah ye ubon esie ikekemeke ndiwọrọ ke ubom oro kan̄a sia mmọn̄ okosụk okpokpon ke isọn̄.

Ke akpatre, mmọn̄ ama asat ama. Noah ye ubon esie ẹma ẹsịne ke ubom oro ẹbe isua kiet. Ekem Jehovah ama ọdọhọ mmọ ẹwọrọ ẹdi; eketie nte mmọ ẹwọrọ ẹdụk obufa ererimbot. Ama enem mmọ nte Jehovah akanyan̄ade mmọ, ntre mmọ ẹma ẹwa uwa ẹnọ Jehovah.

Uwa mmọ ama enem Jehovah. Enye ama ọn̄wọn̄ọ ke imọ idifiakke ida mmọn̄ ukwọ isobo kpukpru n̄kpọ ifep ke isọn̄. Enye ama anam akpa akpara (rainbow) ọwọrọ ke enyọn̄ man owụt ke imọ iditreke ndinam se imọ in̄wọn̄ọde. Ndi omokụt akpara akpa?

Jehovah ama ọdọhọ n̄ko yak mmọ ẹnyene nditọ ẹnyụn̄ ẹyọhọ ofụri isọn̄.