Isaac ekedi isua 40 ke ini enye ọkọdọde Rebekah. Enye ama ama Rebekah etieti. Mmọ ẹma ẹnyene nditọ iba emi ẹkedide amanamba.

Akpan ekekere Esau, udọ ekere Jacob. Esau ekedi atautop, enye ikesiwakke ndidu ke ufọk. Jacob ekesiwak ndidu ke ufọk.

Ini oro, isọn̄ ye okụk emi ẹkesinọde akpan ke ini ete akpade ama esikpon akan eke nditọ eken. Emi ke ẹkekot n̄kpọ-akpa. Mme n̄kpọ emi Jehovah ọkọn̄wọn̄ọde ndinam nnọ Abraham ama etiene esịne ke otu n̄kpọ-akpa emi Isaac ediyakde inọ akpan esie. Esau ikadaha mme un̄wọn̄ọ oro ke n̄kpọ ndomokiet, edi Jacob ama ọdiọn̄ọ ke mmọ ẹdi ata akpan n̄kpọ.

Idem ama emem Esau etieti usen kiet ke ini enye ọkọnyọn̄de utop edi. Ke ini enye okokopde ufịk udia emi Jacob eketemde, enye ama ọdọhọ ete: ‘Biọn̄ ọdọn̄ mi tutu! Nọ mi udia oro ndia!’ Jacob ama ọdọhọ enye ete: ‘Mmọn̄ nnọ fi, edi bem iso n̄wọn̄ọ ke ọyọnọ mi n̄kpọ-akpa fo.’ Esau ama ọdọhọ enye ete: ‘Nso ibehe mi do ye n̄kpọ-akpa mi? Da kpukpru, kam nọ mi udia ndia.’ Ndi emekere ke se Esau akanamde oro ama ọfọn? Ikọfọnke. Esau ama ayak ata akpan n̄kpọ atak enye ke ntak usan udia kiet kpọt.

Ke ini Isaac ekenen̄erede ọsọn̄, enye ama oyom ndidiọn̄ akpan esie. Edi  Rebekah ama an̄wam Jacob udọ mmọ ọbọ edidiọn̄ oro. Ini Esau ọkọdiọn̄ọde ke Jacob ama ọbọ edidiọn̄ oro, esịt ama ayat enye tutu enye aduak ndiwot Jacob. Isaac ye Rebekah ikoyomke n̄kpọ anam Jacob, ntre mmọ ẹma ẹdọhọ yak enye aka okodụn̄ ye Laban eyeneka eka esie tutu esịt osụhọ Esau. Jacob ama okop uyo mmọ, onyụn̄ efehe mbak Esau idiwot enye.