Ke usenubọk Monday October 10, 2022, Russia ẹma ẹduọk bọm ke Ukraine ke ntak emi Ukraine ẹketopde bọm ẹwụri ebọp emi ẹsan̄ade Russia ẹka Crimea. N̄kpọ emi eketịbe usen ifan̄ ke ikpọ mbon ukara ẹma ẹkedọhọ ke etie nte Armageddon ke edi.

•   Ke October 6, 2022, ada-ibuot-ukara U.S. A Joe Biden ọkọdọhọ ete: “Imekpere Armageddon idahaemi ikan nte ikekperede ini ada-ibuot-ukara [U.S. A John F.] Kennedy ọkọdọhọde mbon Soviet Union ẹsion̄o bọm emi mmọ ẹkedọn̄de ke Cuba. . . . Idụhe nte owo ekemede ndida ikpọ n̄kpọekọn̄ nuclear n̄n̄wana ekọn̄ ndien Armageddon idịghe.”

•   Ini mbon BBC ẹkebụpde ada-ibuot-ukara Ukraine Volodymyr Zelensky ke October 8, 2022 m̀mê nso iditịbe edieke mme owo ẹdade ikpọ n̄kpọekọn̄ nuclear ẹn̄wana ekọn̄. Enye ama ọbọrọ ete: “Armageddon edidi oro, ndien ofụri ererimbot ẹdidu ke mfịna.”

 Ndi mme owo ndida ikpọ n̄kpọekọn̄ nuclear n̄n̄wana ekọn̄ edida Armageddon idi? Nso ke Bible etịn̄?

 Ihih. Ikọ oro “Armageddon” odu itie kiet kpọt ke Bible ke Ediyarade 16:16. Itie N̄wed Abasi emi itịn̄ke iban̄a ekọn̄ emi mme idụt ẹdin̄wanade, edi etịn̄ aban̄a ekọn̄ emi Abasi edin̄wanade ye “ndidem ofụri isọn̄.” (Ediyarade 16:14) Abasi edida ekọn̄ Armageddon isobo ukara.​—Daniel 2:44.

 Edieke oyomde ndidiọn̄ọ se Armageddon edidade idi ke ererimbot emi, kot ibuotikọ emi Nso Idi Ekọn̄ Armageddon?

 Ihih. Kpa ye emi mme andikara ẹkemede ndida ikpọ n̄kpọekọn̄ nuclear n̄n̄wana ekọn̄ ke ini iso, Abasi idiyakke ẹsobo isọn̄ emi. Bible ọdọhọ ete:

 Edi, mme prọfesi Bible ye se ikade iso ke ererimbot ẹwụt ke ayak esisịt, n̄kpọ omọn̄ okpụhọde ke ererimbot. (Matthew 24:3-7; 2 Timothy 3:1-5) Edieke oyomde ndidiọn̄ọ se Bible etịn̄de aban̄a ini iso kpep Bible ye nnyịn ke mfọn.