Akamba owo United Nation emi ekerede António Guterres eketịn̄ ntem aban̄a en̄wan oro Iran ẹkemende ẹka ẹbịne Israel ke Saturday, April 13, 2024 ete: “Ini edi emi nnyịn ndifiak nsion̄o ubọk ke en̄wan emi man ofụri mfịna emi etre. Ini edi emi nnyịn ndinen̄ede mmụm idem n̄kama.”

 En̄wan oro ẹn̄wanade ke Middle East edi kiet ke otu mfịna oro akade iso ke ofụri ererimbot.

 Ke January 26, 2023, mbon United Nations Security Council ẹkedọhọ ete: “Ekọn̄ oro ẹn̄wanade ke nsio nsio itie ke ofụri ererimbot idahaemi, awak akan ekọn̄ oro ẹn̄wanade ke ererimbọt tọn̄ọ Ọyọhọ Ekọn̄ Ererimbot Iba okokụre, ndien emi esifịna n̄kpọ nte owo biliọn 2 ke ofụri ererimbot, oro edi, n̄kpọ nte owo kiet ke otu owo inan̄ ke ofụri ererimbot.”

 Mme idụt oro ekọn̄ an̄wanade esịne Israel, Gaza, Syria, Azerbaijan, Ukraine, Sudan, Ethiopia, Niger, Myanmar, ye Haiti. a

 Ini ewe ke en̄wan emi editre? Ndi mme ankara ererimbot ẹyekeme ndinam emem odu? Nso ke Bible etịn̄ aban̄a n̄kpọ emi?

 Ekọn oro ẹn̄wanade ke ofụri ererimbot mfịn, owụt ke ibịghike ke kpukpru ekọn̄ eyetre. Mme ekọn̄ emi ẹnam prọfesi Bible oro aban̄ade eyo nnyịn osu. Bible okot eyo nnyịn emi “akpatre ini editịm n̄kpọ emi.”​—Matthew 24:3.

•   “Mbufo ẹyekop ẹban̄a ekọn̄ ye mme etop ekọn̄. . . . Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen.”​—Matthew 24:6, 7.

 Kot ibuotikọ emi “Nso Idi Idiọn̄ọ “Mme Akpatre Usen,” M̀mê Idiọn̄ọ “Utịt Ererimbot Emi”?” man okụt nte mme ekọn̄ oro ẹn̄wanade ke ererimbọt mfịn anamde mme prọfesi Bible osu.

 Bible ama etetịn̄ aban̄a ini emi kpukpru ekọn̄ oro mme owo ẹn̄wanade editrede. Didie ke oro editịbe? Idịghe owo edinam etre, edi ẹdida Armageddon emi edide, “ekọn akwa usen Abasi Ata Ọkpọsọn̄” inam etre. (Ediyarade 16:14, 16) Ekọn̄ oro ama okụre, Abasi oyosu se Enye ọkọn̄wọn̄ọde, oro edi, ndinam mme owo ẹdu ke emem ke nsinsi.​—Psalm 37:10, 11, 29.

 Edieke oyomde ndidiọn̄ọ nte Abasi edidade ekọn̄ esie inam kpukpru ekọn̄ etre, kot ibuotikọ emi “Nso Idi Ekọn̄ Armageddon?”