Ye é kuiyang wô naa waa simane ki é mam ô ndaghe mane yeghe ? Dzam té da biane bia besese biyong bizing. Dzé é ne wô vole ? A bera baalé a nlô été, é mam ma dang éban ô ndaghe yeghe.

Nté wa yeghe, boghe wé sim ôyôm tam, naa wa tsili é mam ma dang éban ô ndaghe mane yeghe. Dzam té éde Pablo a nga saghe bobedzang ye bekal naa be bo nté be mbe bé yeghe é kalare a nga tsili. A nga tsili naa : « É dzam da dang éban éde di » (Behéb. 8:1). Ye bifiè bité, a nga vole bebèè naa be wokh é mam a nga kômô dzô ye aval avé é mam mesese a mbe é dzô, me mbe élat ye nlô-adzô wèñ.

Ô ne ñong tam, éyong ézing bibuk awôm, amanegha ye ayeghe duè, naa ô fas metoan ma dang éban yé mam ô ndaghe yeghe. Nge waa simane fe me, beregha ñong tam naa wa daghe boan minlô medzô, nge ki a lang ‘minlong mia tare ye kada abong’ naa é vole wa a simane é mam ô va yeghe. Nge ô va yeghe nféféñ dzam ézing, dzenghe ane ô ne de ve ayilgha ya bifiè buè. Éyong wa bera baalé a nlô été, é mam ô ndaghe yeghe, da ye wô bo ébubu naa ô simane me. Wa ye fe tugha wokh aval avé ô ne me dzale éning duè.