Nyew, Abɔnsam wɔ hɔ ankasa. Ɔno nye “wiadze hen,” sunsum abɔdze bi a ɔbɛyɛɛ tsirmɔdzenfo na ɔtseew Nyankopɔn do etua. (John 14:30; Ephesusfo 6:11, 12) Bible no ma yehu mbrɛ Abɔnsam no suban tse dze nam dɛm edzin ahorow yi a wɔdze frɛ no no do. Wɔfrɛ no:

•   Satan, dza ɔkyerɛ nye “Ɔsoɛrtsiafo.”​—Job 1:6.

•   Abɔnsam, dza ɔkyerɛ nye “Otwirfo.”​—Nyikyerɛ 12:9.

•   Ɔwɔ, wɔdze gyina hɔ ma “Daadaafo” wɔ Bible no mu.​—2 Corinthfo 11:3.

•   Sɔhwɛfo.​—Matthew 4:3.

•   Ɔtorfo.​—John 8:44.

Satan nnyɛ suban bi a ɔtse hɛn mu a ɔma yɛyɛ bɔn

 Nyimpa binom bu Satan Abɔnsam dɛ ɔyɛ suban bi a ɔtse hɛn mu a ɔma yɛyɛ bɔn. Naaso Bible no ka nkɔmbɔ bi a ɔkɔr do wɔ Nyankopɔn na Satan ntamu. Nyankopɔn dzi mu na bɔn biara nnyi noho, dɛm ntsi orunntum nnye bɔn bi a ɔwɔ no mu no nnkasa. (Deuteronomy 32:4; Job 2:1-6) Dɛmara so na Satan sɔɔ Jesus a bɔn biara nnyi noho no so hwɛe. (Matthew 4:8-10; 1 John 3:5) Ntsi Bible no ma yehu dɛ Abɔnsam yɛ obi a ɔwɔ hɔ ankasa na nnyɛ suban bɔn bi.

 Aso ɔsɛ dɛ ɔyɛ hɛn nwanwa dɛ nyimpa pii nngye nndzi dɛ Abɔnsam yɛ obi a ɔwɔ hɔ ankasa? Oho, onnyi dɛ ɔyɛ hɛn nwanwa. Osiandɛ Bible no ka dɛ Satan nam ndaadaa kwan do ma no botae ahorow ba mu. (2 Thessalonicafo 2:9, 10) Ɔkwan kɛse kor a ɔfa do daadaa nyimpa nye dɛ obofura hɔn enyi amma woeennhu dɛ ɔyɛ obi a ɔwɔ hɔ ankasa.​—2 Corinthfo 4:4.

  Atorsɛm: Wɔsan so frɛ Abɔnsam Lucifer.

 Nokwasɛm: Bible ahorow bi mu no, wɔkyerɛ Hebrew kasafua “Lucifer” ase dɛ “adzekyee nworaba.” (Isaiah 14:12) Dza wɔaka ho asɛm wɔ dɛm nyiyimu yi mu no ma yehu dɛ nna wɔreka ebusuakuw a nna wodzi adze wɔ Babylon no ho asɛm. Nyankopɔn sɛɛ dɛm tumdzi yi osian hɔn ahantan ntsi. (Isaiah 14:4, 13-20) Nna wɔdze asɛmfua “adzekyee nworaba” frɛ Babylon ahemfo dze dzi hɔnho fɛw aber a wɔsɛɛ hɔn tumdzi no.

  Atorsɛm: Nyankopɔn nam Satan do “bobua atsɛn.”

 Nokwasɛm: Abɔnsam yɛ Nyankopɔn ne tamfo na ɔnnyɛ no somfo. Satan Abɔnsam soɛr tsia hɔn a wɔsom Nyankopɔn, na ɔtoto hɔn ano.​—1 Peter 5:8; Nyikyerɛ 12:10.