Mpɛn pii no, Bible no frɛ Jesus dɛ “Nyankopɔn Ba.” (John 1:49) Asɛmfua “Nyankopɔn Ba” no ma ɔda edzi dɛ Nyankopɔn nye Ɔbɔadze no, na ɔno na ɔbɔɔ nkwa nyina a Jesus so ka ho. (Ndwom 36:9; Nyikyerɛ 4:11) Bible no ma yehu dɛ, mbrɛ nyimpa si wo ba no, ɔnnyɛ dɛm na ɔtse wɔ Nyankopɔn n’afamu.

 Afei so, Bible no frɛ abɔfo no dɛ ‘Nyankopɔn mba.’ (Job 1:6) Na Bible no ka dɛ, nna nyimpa a odzi kan a wɔfrɛ no Adam no yɛ “Nyankopɔn ne Ba.” (Luke 3:38) Naaso, osiandɛ Jesus nkotsee nye abɔdze a odzi kan a Nyankopɔn bɔɔ no tsenn ntsi, Bible no frɛ Jesus dɛ Nyankopɔn n’abakan.

•  Ana Jesus tsenaa ase wɔ sor ana wɔrowo no wɔ asaase do?

•  Ebɛnadze na Jesus yɛe ansaana ɔreba asaase do?

 Nyew. Nna Jesus yɛ sunsum abɔdze wɔ sor ana wɔrowo no dɛ nyimpa wɔ asaase do. Jesus nankasa kaa dɛ: “Mifi sor misianee mebae.”​—John 6:38; 8:23.

 Nyankopɔn bɔɔ Jesus ana ɔrobɔ biribiara. Ɔdze fa Jesus ho no, Bible no ka dɛ:

•   “Ɔnoara na ɔyɛ . . . abɔdze nyina abakan.”​—Colossaefo 1:15.

•   Ɔyɛ “[Nyankopɔn] abɔdze farbaa.”​—Nyikyerɛ 3:14.

 Jesus maa nkɔnhyɛ a ɔfa nyia “no mpuei fir tsetse, ofir ɔdomankoma” no baa mu wɔ no do.​—Micah 5:2; Matthew 2:4-6.

 Nna ɔwɔ dzibea a ɔkrɔn wɔ sor. Jesus kaa dzibea a nna ɔwɔ ho asɛm wɔ ne mpaabɔ mu. Ɔkaa dɛ: “Egya, fa enyimnyam a mowɔ no wɔ wo nkyɛn ansaana wiadze bɔɔ adze no hyɛ me enyimnyam.”​—John 17:5.

 Ɔboaa n’Egya ma ɔbɔɔ ndzɛmba a aka nyina. Jesus nye Nyankopɔn bɔɔ mu yɛɛ edwuma dɛ “odwimfopanyin.” (Mbɛbusɛm 8:30) Ɔdze fa Jesus ho no, Bible no ka dɛ: “No mu na wɔbɔɔ adze nyina, dza ɔwɔ sor nye dza ɔwɔ asaase do.”​—Colossaefo 1:16.

 Nyankopɔn nam Jesus do na ɔbɔɔ adze nyina. Sunsum abɔdze nye hɛn amansan yi ka dɛm abɔdze ahorow no ho. (Nyikyerɛ 5:11) Ɔtɔ da a, yebotum dze mbrɛ Nyankopɔn nye Jesus bɔɔ mu yɛɛ edwuma no atoto mbrɛ obi a ɔdorɔw dan ne plan nye obi a osi dan si bɔ mu yɛ edwuma no ho. Obi a ɔdorɔw dan ne plan no dorɔw mbrɛ dan no besi ayɛ, na obi a osi dan no so ahwɛ do eesi dan no.

 Nna ɔyɛ Asɛm no. Aber a nna Bible no reka Jesus no sor asetsena ana ɔreba asaase do no ho asɛm no, ɔfrɛɛ Jesus dɛ “Asɛm no.” (John 1:1) Iyi ma yehu dɛ, nna Nyankopɔn nam ne Ba no do dze nsɛm nye akwankyerɛ ma sunsum abɔdze afofor.

 Afei so, nna Jesus nye obi a Nyankopɔn nam no do nye nyimpa kasa. Obotum aba dɛ, Nyankopɔn faa Jesus a ɔyɛ Asɛm no do na ɔdze akwankyerɛ ahorow maa Adam nye Eve wɔ Eden ture no mu. (Genesis 2:16, 17) Bi a nna Jesus nye ɔbɔfo a odzii Israelfo no enyim nye hɔn faa sar do no, na ɔno nye nyia nna ɔsɛ dɛ Israelfo no tsie no.​—Exodus 23:20-23. a