Jesus gyee nyimpa anokwafo aber a ɔdze no nkwa maa dɛ werdam no. (Matthew 20:28) Dɛm ntsi Bible no frɛ Jesus dɛ ɔyɛ “wiadze Agyenkwa.” (1 John 4:​14) Bible no san ka dɛ: “Na nkwagye nnyi obiara so mu: eso dzin fofor biara nnyi wi yi ase a wɔdze ama wɔ nyimpa mu a otwar dɛ wɔgye hɛn nkwa wɔ mu.”​—Asomafo Ndwuma 4:​12.

 Jesus ‘asɔ owu ahwɛ ama nyimpa biara’ a onya no mu gyedzi no. (Hebrewfo 2:9; John 3:​16) Iyi ekyir no, “Nyankopɔn nyaan no fii ewufo mu,” na Jesus sanee kɔr sor dɛ ɔbɔfo. (Asomafo Ndwuma 3:​15) Jesus wɔ sor, na “otum gye hɔn a wɔnam no do ba Nyankopɔn hɔ no koraa, dɛ ɔtse ase daa dɛ odzi ma hɔn ntsi.”​—Hebrewfo 7:​25.

Ebɛnadze ntsi na yehia Jesus ama ɔaaserɛ ama hɛn?

 Hɛn nyina yɛ ndzebɔnyɛfo. (Romefo 3:​23) Bɔn siw yɛnye Nyankopɔn ntamu kwan, na iyi dze owu ba. (Romefo 6:​23) Naaso Jesus dzi dwuma dɛ “ɔkasagyefo” ma hɔn a wonya no werdam afɔrbɔ no mu gyedzi no. (1 John 2:1) Jesus serɛ ma dɛm nkorɔfo yi a wɔwɔ no mu gyedzi no dɛ Nyankopɔn ntsie hɔn mpaabɔ, na ongyina no wu afɔrbɔ no do mfa hɔn bɔn nkyɛ hɔn. (Matthew 1:​21; Romefo 8:​34) Nyankopɔn tsie Jesus n’adzeserɛ yi osiandɛ ɔnye n’apɛdze hyia. Nyankopɔn somaa Jesus baa asaase do “dɛ wondua no do ngye wiadze nkwa.”​—John 3:​17.

Aso Jesus no mu gyedzi kɛkɛ a yebenya no bɛma yenya nkwa?

 Oho. Ɔwɔ mu dɛ ɔsɛ dɛ yenya Jesus no mu gyedzi na ama wɔaagye hɛn nkwa dze, naaso pii ka ho a ɔsɛ dɛ yɛyɛ. (Asomafo Ndwuma 16:30, 31) Bible no ka dɛ: “Dɛ mbrɛ nyimpadua nnyi sunsum a, nna oewu no, dɛmara na gyedzi so nnyi ndwuma a, nna oewu.” (James 2:​26) Sɛ wɔbɛgye hɛn nkwa a, ɔwɔ dɛ:

•   Yesua Jesus na n’Egya Jehovah ho adze.​—John 17:3.

•   Yenya hɔn mu gyedzi.​—John 12:44; 14:1.

•   Yedzi hɔn ahyɛdze do dze kyerɛ dɛ yɛgye hɔn dzi. (Luke 6:​46; 1 John 2:​17) Jesus kaa dɛ nnyɛ obiara a ɔfrɛ no “Ewuradze” no na wɔbɛgye no nkwa na mbom hɔn a ‘wɔbɛyɛ n’Egya a ɔwɔ sor no ne pɛ a.’​—Matthew 7:​21.

•   Yɛkɔ do ara kyerɛ dɛ yɛwɔ gyedzi ɔmmfa ho nsɛndzenden biara a yebehyia no. Jesus maa iyi mu daa hɔ aber a ɔkaa dɛ: “Nyia obetsim ekodu ewiei no, ɔno na wɔbɛgye no nkwa.”​—Matthew 24:13.