Ɔabɔ ndɔnsia apaho minitsi eduanan enum wɔ Tuxedo, New York. Ɔyɛ anapa, wimu ayɛ bruw, na ɔtse dɛ dza esukwankyɛba akata nsutaae no do wɔ aborɔnsan a ɔtoa do anan no ne nkyɛn. Mberantsɛ nye nkataasia bi rehɛn aborɔnsan no mu, na wɔhyehyɛ ntar nye mpaboa a wɔdze rebɛyɛ edwuma. Anapa yi ara na worutu kwan aba, binom fifi kurow mu hɔ hotel ahorow mu, afofor fifi efiefi bi mu wɔ kurow mu hɔ, na afofor so twaa kwan bɛyɛ kilomita 80 (akwansin 50) fii ɔman no n’afã ahorow mu​—Patterson, Wallkill, nye Brooklyn mpo​—na wɔbae.

Naaso ansaana dɛm da yi bɛba no, nyimpa yi mu pii tuu kwan fii United States n’afã ahorow nye n’ekyir beebi na wɔbae. Woetu hɔnho ama dɛ wɔrebɛyɛ edwuma wɔ ha​—binom bɛyɛ no dapɛn kor, afofor bɛyɛ no adapɛn esia, na afofor so bɛkyɛr asen dɛm. Hɔnankasa na wotuaa hɔn kaar akatua bae, na wɔrenngye akatua biara wɔ edwuma a wɔrebɛyɛ no ho. Naaso iyi nyinara ekyir no, hɔn enyi agye dɛ wɔaba ha.

Etuhoakyɛfo 120 na woedzi kan aba, naaso mber no rokɔ enyim no, binom bɛba abɛkã ho. Etuhoakyɛfo no kɔ hɔn edzidzidan no mu kɛtsena hɔ, pon biara nyimpa du na wɔtsena ho. Hɔn mu pii yɛ kɔfe nom, na ber kor noara wɔtse prekonam a wɔrototõ wɔ gyaadze hɔ no ne nkã wɔ dan mu hɔ. Wonya bɔ anapa 7:00 pɛr, nna wɔasosɔ TV ahorow ahyɛ ase riyi Bible mu mpɛnsampɛnsa mu nsɛm. Minitsi duenum ekyir no, wɔdze hɔn anapa edziban brɛ hɔn. Edziban no bi nye prekonam, paanoo, nkyirefua, nye oat. Wonya edziban pii dzi.

Wodzidzi wie a, wɔbɔ mpaa, nna wɔaakɛhyɛ edwuma ase. Hɔn a wɔrebɛyɛ adansi ho edwuma no hyɛ hɔn dadzekyɛw, ahwehwɛenyiwa, sorntar, nye abɔyamu a wɔdze bɔbɔ hɔnho ban. Wogu do rehyɛ no nyinara nna wɔdze enyige robɔ nkɔmbɔ.

Edwuma a wɔrebɛyɛ nye dɛ, wɔrebɛdan nkan no International Paper Company adan a ɔwɔ Tuxedo no ayɛ no bea a wobefi ekesi Jehovah Adasefo wiadze nyina edwumayɛbea tsir no. Bea a wobesi Jehovah Adasefo wiadze nyina edwumayɛbea tsir no bɛn Warwick kurow mu, na ofi hɔ rokɔ Tuxedo no yɛ akwansin kakraabi pɛ. Wɔ Tuxedo adan no mu no, wobesi ɔfese ahorow, mbea a wobotum ada, adan a wɔbɛyɛ edwuma wɔ mu, nye adzekoradan ahorow. Egyinatukuw a wɔda Tuxedo edwuma no ano no peen mbrɛ wobesi adan no do wɔ Benada, March 12, 2013.

Da a odzi kan a otuhoakyɛnyi bi bodu bea a ɔbɛda no, wɔgye no fɛw do. Ebɛn kwan do? William a ofi New Jersey no kã dɛ: “Sɛ ehɛn dan no mu a, nyia ɔtse resɛphyɛn hɔ no bɛkyerɛ wo ndzɛmba bi a no ho hia​—beebi a wo dan mu wɔ, mbrɛ ibotum dze ndzɛmba a ɔwɔ fie hɔ edzi dwuma, mbrɛ edze wo saafee bedzi dwuma, nye dza ɔkekã ho. Obiara so boa wo. Ekyir yi, sɛ idu Tuxedo so a, aber a edzi w’anapa edziban ewie no, ibehyia nyia ɔda edwuma a ebɛyɛ no ano no. Afei, ɔbɛkyerɛkyerɛ edwuma a erebɛyɛ no mu akyerɛ wo.”

Asetsena kɔ do dɛn wɔ dɛm bea yi? Yajaira nye no kun fi Puerto Rico na wɔbae, na wɔboa ma wosiesie ban ho, na wɔhyehyɛ mpuna wɔ dan no mu. Dza ɔkã nye yi: “Yɛsoɛr bɛyɛ anapa 4:30, nna yeesiesie bea a yɛda no. Yɛfa hɛn kɔɔpow a kɔfe wɔ mu kitsa, nna yɛakɔfow bɔs a wɔdze ama hɛn dɛ yɛnfow nkɔ edwuma no. Ɔwɔ mu dɛ yɛbɔpon edwuma no nna yɛaberɛ dze, naaso yenngyaa serew da. Obiara enyi gye.”

Kwaa etwa hɛn asaase a ɔda Warwick no ho ehyia. Zach nye ne yer Beth a wofi Minnesota no roboa ma woeesiesie Warwick asaase no do. Aber a wobisaa hɔn siantsir a wɔbaa ha no, Beth kãa dɛ: “Yɛgye dzi dɛ, adze papa biara nnyi hɔ a yebotum dze hɛn asetsena ayɛ sen dɛ yɛdze bɔsom Jehovah. Nna yɛpɛ dɛ yɛdze hɛn nyimdzee nye hɛn mbɔdzembɔ yɛ no som edwuma.”