Aber a nyimpa 48 dze abosoom enum nyaa ntsetsee a no mu dɔ wɔ Ɔweɔn-Aban Gilead Bible Skuul a Ɔtɔ do 133 no mu wiei no, wɔyɛɛ nhyiamu maa hɔn wɔ Jehovah Adasefo adzesuabea a ɔwɔ Patterson, New York no. Sɛ yɛkã ebusuafo, anyɛnkofo, nye nkuranhyɛfo afofor a wɔbaa nhyiamu no ase no nyinara bɔ mu a, nna hɔn dodow si 9,694.

Ofitsi afe 1943 mu no, wɔatsetse asomfo a hɔnho akokwaa a hɔn dodow bor 8,000 ma wɔafata ama asɛmpatserɛw edwuma. Bible no nye nwoma tsitsir a wɔdze dzi dwuma wɔ skuul no mu. Skuul yi hyɛ esuafo no gyedzi dzen, na ɔboa hɔn ma wonya Christianfo suban ahorow a wohia na ama woeetum ayɛ hɔn asɛmpatserɛw edwuma no yie, na woeegyina nsɛndzendzen biara a wobehyia wɔ hɔn som edwuma no mu no ano.

“Hom Ndwen Dza Ɔyɛ Ɔdɔkɔr Ho.” Anthony Morris, a ɔyɛ Jehovah Adasefo Akwankyerɛ Kuw no munyi na nna ɔyɛ eguamutsenanyi ma nhyiamu no. Ɔdze ne nyienyim nsɛm no gyinaa Philippifo 4:8 do, hɔ kã dɛ: “Dza ɔyɛ ɔdɔkɔr no, . . . hom ndwen dɛm ndzɛmba yi ho.”

Onua Morris sii do dua dɛ, sɛ yɛdwendwen ndzɛmba a ɔyɛ ɔdɔkɔr anaa ɔyɛ fɛw ho a, ɔbɔboa hɛn ma yeenya adwempa wɔ dɛm wiadze a ɔdɔ nnyi mu yi mu. Ɔkãa dɛ: “Hwehwɛ ndzɛmba a ɔyɛ ɔdɔkɔr no, na woara so da ɔdɔ edzi.”

Dɛ mfatoho no, hɛn sor Egya no yɛ nhwɛdo ma hɛn dze nam dɛ ɔmmfa n’adwen nnsi hɛn mfomdo ahorow do. (Ndwom 130:3) Onua Morris hyɛɛ hɔn nkuran dɛ: “Mma mmfa w’adwen nnsi wo nuanom hɔn mfomdo ahorow do, na kɔ do da ɔdɔ edzi.”

“Nya Nyimdzee​—Naaso Mma Nnyɛ Onyansafo Nntra Do.” Harold Corkern, a ɔyɛ United States Nkorbata Egyinatukuw no munyi na ɔmaa ɔkasa yi, na nna n’asɛntsir no gyina Ɔsɛnkafo 7:16 do. Nyankopɔn pɛ dɛ yɛdze nyimdzee dzi dwuma wɔ ɔkwan pa do, na ɔmmpɛ dɛ yɛma nyimdzee a yɛwɔ no “ma hɛn tsirmu yɛ hɛn dɛw.”

Bio so, Onua Corkern kyerɛɛ dɛ, no ho hia dɛ yɛda ɔdɔ edzi aber a yerutu obi fo anaa yɛretsen no no. Ɔnnsɛ dɛ yɛhwehwɛ pii fi afofor hɔ sen dza Nyankopɔn hwehwɛ fi hɔn hɔ no. Onua Corkern hyɛɛ hɔn nkuran dɛ: “Hom mfa hom nyansaa, hom nyimdzee, nye hom ntseasee no ndzi dwuma yie, na hom nuanom no so enyi bɛgye ho dɛ wɔbɛbɛn hom.”

“Mma Wo Werɛ Mmfir Nyankopɔn No Ndwuma No.” (Ndwom 78:7) Guy Pierce a ɔyɛ Akwankyerɛ Kuw no munyi no dze mfatoho hyɛɛ ne kasa no ase. Ɔkyerɛkyerɛɛ mu dɛ, abofra ne ndzeyɛɛ​—dɛ papa anaa bɔn no​—kyerɛ mbrɛ n’awofo tse. (Mbɛbusɛm 20:11) Dɛmara so na hɛn ndzeyɛɛ kyerɛ mbrɛ hɛn sor Egya no so tse. “Iyi mu na Nyankopɔn mba nye abɔnsam mba da edzi: obiara a ɔnnyɛ dza ɔtsen . . . no mmfir Nyankopɔn.”​—1 John 3:10.

Onua Pierce kãa dɛ, wɔtoo nsa frɛɛ esuafo no baa Gilead Skuul no bi osian hɔn Christianfo suban pa ahorow no ntsi. Dɛm suban pa no bi nye ahobrɛadze. Ɔkaa hɔn dɛ wɔnkɔ do nda ahobrɛadze edzi. Hɔn ntsetsee no amma wɔannkorɔn annsen afofor. Na mbom osiesiee hɔn dɛ, wɔmboa mma koryɛ ntsena hɔn wiadze nyina enuayɛ kuw no mu, na wɔnyɛ ahobrɛadze ho nhwɛdo mma afofor. (Ndwom 133:1) Onua Pierce kãa dɛ: “Afei na hom atse Kyerɛwnsɛm no ase yie paa, na ɔsɛ dɛ nyimdzee yi boa hom ma hom nyin wɔ hom nye Jehovah Nyankopɔn ntamu ebusuabɔ no mu.”

“Yɛayɛ Dza Ɔsɛ Dɛ Yɛyɛ.” William Samuelson, a ɔhwɛ Dwumadzibea a Wɔhwɛ Theocracy Skuul Ahorow Do no do no bisaa dɛ: “Sɛ wɔdze dwumadzi bi hyɛ hɛn nsa, na sɛ hɛn enyi nngye ho a, ɔsɛ dɛ yɛyɛ hɛn adze dɛn wɔ ho?” Yebotum esũa biribi efi asɛm a ɔwɔ Luke 17:7-10 no mu: “Sɛ hom wie dza wɔahyɛ hom nyina yɛ a, hom nse dɛ, Yɛyɛ nkowaa a mfaso nnyi hɛn ho: yɛayɛ dza ɔsɛ dɛ yɛyɛ.” Sɛ yɛdze hɛnho toto hɛn Wura Jehovah ho a, yɛyɛ “nkowaa a mfaso nnyi hɛn ho” ampa.

Onua Samuelson kãa dɛ, esuafo no dze adapɛn pii sũaa adze wɔ adzesuadan no mu hɔ. Bi mpo a nna iyi yɛ asɛndzendzen ma hɔn mu binom. “Naaso, hom ayɛ dza ɔsɛ dɛ hom yɛ, na hom ehu mfaso a ɔwɔ do, wɔahyɛ hom gyedzi dzen.” Onua Samuelson dze n’asɛm no baa ewiei dɛ: “Dɛ nkowaa a wɔwɔ hom mu ahotodo no, hom nkɔ do nkyerɛ enyisɔ mma ho kwan a hom enya dɛ hom rosom amansan no Wura no.”

“Sɛ Ihyia Nsɛndzendzen A, Kaa Jehovah N’awerɛhyɛmu Nsɛm No.” Sam Roberson, a ɔyɛ ɔboafo ma nyia ɔhwɛ Dwumadzibea a Wɔhwɛ Theocracy Skuul Ahorow Do no do no bɔɔ esuafo no kɔkɔ dɛ, ɔtɔ mber bi a hɔn abaw mu botum ebu. Ntsi ɔhyɛɛ esuafo no nkuran dɛ, ɔyɛ a wɔnkaa nyimpa ahorow bi a wɔwɔ Bible no mu a wonyaa awerɛhyɛmu nsɛm fiir Nyankopɔn nkyɛn no. Dɛ nhwɛdo no, Moses maa Joshua awerɛhyɛmu dɛ: “Ewuradze. . . ɔremmpa wo, nkyii so ɔrommpow wo.” (Deuteronomy 31:8) Wɔ Joshua n’asetsena n’ewiei no, otumii kãa dɛ: ‘Asɛm kor nntɔɔ famu wɔ nsɛm pa a Ewuradze hom Nyankopɔn kãe wɔ hom ho no nyinara mu.’​—Joshua 23:14.

Jehovah Nyankopɔn bɔ no nkowaa anohoba dɛ: “Mirinngya wo da, eso meremmpa wo da biara da.” (Hebrewfo 13:5) Ɔma hɛn awerɛhyɛmu dɛ, ɔbɛyɛ adze ma ɔnye nankasa ne dzin Jehovah (“Nyia Ɔma Ɔyɛ Hɔ”) no ehyia, na ɔbɛyɛ noho dza ohia biara na ama oeetum edzi n’asomfo hɔn ehiadze ho dwuma ama hɔn. Onua Roberson hyɛɛ hɔn nkuran dɛ: “Mma hom abaw mu ntow, mma hom abaw mu ngow, na mma hom abaw mu ngura so. Hom nkaa dɛ, ɔnnkɛma hom nsa esi famu da biara da.”

“Hɔn Ndze Firii Kɔr Asaase Nyina Do.” (Romefo 10:18) Mark Noumair a ɔyɛ Gilead kyerɛkyerɛnyi no na odzii dwumadzi yi enyim. Ɔhwɛe ma esuafo no mu binom a ɔsosor beebi a wofifi kãa asɛnka mu osuahu ahorow a woebenya wɔ Patterson apaamu hɔ no, na hɔn mu binom so yɛɛ hɔn suahu no ho ɔyɛkyerɛ. Dɛ nhwɛdo no, aber a awarfo bi a wofi South Africa hyiaa mbaa baasã bi a wofi hɔn man mu no, wɔnye hɔn kãa Zulu nye Xhosa kasa, na iyi maa hɔn enyi gyei. Awarfo bi so a wofi Sri Lanka hyiaa Indianyi ɔbarimba bi a ne yer nye ne ba wɔ Sri Lanka. Nna ɔbarimba yi nnhun Bible da, ntsi awarfo yi dze enyigye maa no hɔndze no kor.

“Woesiesie Hom Ama Edwuma Pa Biara.” Gene Smalley, a ɔyɛ ɔboafo ma Nsɛnkyerɛw Egyinatukuw no bisabisaa awarfo ahorow ebien a woewie skuul yi no nsɛm. Dɛm awarfo yi nyina fi Sierra Leone. Wɔkaa dɛ nna wonnyi paep wɔ hɔn efie, ntsi nna aber nyina wɔkɔ nsu. Naaso, sɛ wɔdze dɛm nsɛndzendzen yi toto enyigye a wonyae fii Bible adzesua 50 a nna wɔyɛ no ho a, wohu dɛ nna dɛm haw no nnyɛ hwee koraa. Dɛm nyimpa baanan yi a woewie Gilead no kyerɛɛ dɛ, hɔn enyi sɔ mbrɛ skuul no esiesie hɔn ama edwuma pa biara wɔ dwumadzi a daakye wɔdze bɛhyɛ hɔn nsa no mu no.​—2 Timothy 3:16, 17.

“Tsim Kodu Ewiei No​—Nye N’ekyir So.” Gerrit Lösch, a ɔyɛ Akwankyerɛ Kuw no munyi dze mfatoho hyɛɛ ɔkasa tsitsir no ase. Ɔkyerɛkyerɛɛ mu dɛ, ohia dɛ hɔn a wɔkɔ kwantsentsen mbirikatu no hwɛ hu dɛ wɔwɔ ahoɔdzen nye ahom a wɔdze bowie hɔn mbirikatu no. Ɔwɔ mu dɛ wɔ akansi mbirikatu mu no, nyimpa kortsee na odzi konyim dze, naaso wɔ Christianfo mbirikatu no mu no, obiara a otsim kodu ewiei no yɛ konyimdzifo.

Tsim a obi betsim no kyerɛ dɛ ɔbɔkɔ do asom Nyankopɔn, na ɔmma akwansidze, ɔsoɛrtsia, nsɔhwɛ anaa abagurasɛm biara mmbu n’abaw mu. Jesus kãa dɛ: “Nyia obetsim ekodu ewiei no, ɔno na wɔbɛgye no nkwa.” (Matthew 24:13) Hwɛ mbrɛ ɔhyɛ nkuran dɛ yebohu dɛ, sɛ yetsim a, Jehovah nye Jesus hu! Afei Onua Lösch kyerɛɛ ndzɛmba ahorow bi a obotum aboa hɛn ma yeetsim ɔmmfa ho nsɛndzendzen a yebehyia no. Ibi na odzidzi do yi:

• Bɔ Nyankopɔn a ɔma abotar na “ɔsoa hɛn adzesoa ma hɛn daa daa” no mpaa.​—Romefo 15:5; Ndwom 68:19.

• Si wo bo dɛ ibedzi nokwar, na nya ahotodo dɛ “Nyankopɔn yɛ ɔnokwafo a ɔremma wɔnnsɔ hom nnhwɛ nnkyɛn dza hom botum, na mbom ɔdze ɔkwan bɛka nsɔhwɛ no ho a wɔnam mu fi nsa, ma hom eetum asɔw.”​—1 Corinthfo 10:13.

• Kɔ do ma w’enyidado dɛ Christiannyi no ntsena w’adwen mu. “Osian dɛw a wɔdze sii [Jesus] n’enyim ntsi ɔsɔɔw” asɛndua no.​—Hebrewfo 12:2.

Onua Lösch sii do dua dɛ, dɛm aber yi nnyɛ ber a ɔsɛ dɛ yɛpa abaw, osiandɛ yɛabɛn wiadze n’ewiei pɛɛ. “Yɛmfa abotar ntutu empire a osi hɛn enyim no mu mbirika.”​—Hebrewfo 12:1.

Wɔ dɛm nhyiamu a ɔyɛ enyigye yi n’ewiei no, hɔn a woewie skuul no mu kor gyinaa ne mfɛfo a ɔnye hɔn wiei no ananmu kenkaan krataa bi, dze kyerɛɛ enyisɔ maa ntsetsee a mfaso wɔ do a hɔn nsa akã no. Wɔkãa wɔ krataa no mu dɛ, mbrɛ wosũaa Bible no ndzidzido ndzidzido kɔɔ ekyir no, nnyɛ dɛ ɔmaa wɔtsee Nyankopɔn ne tsirmpɔw ahorow no ase yie nko, na mbom ɔhyɛɛ hɔn gyedzi dzen kɛse so. Wɔdze kãa ho dɛ: “Yeesi hɛn bo dɛ yɛdze ndzɛmba pa a yeesũa no bedzi dwuma.”