Wɔ Bible no mu no, Greek kasafua a wɔtaa kyerɛ ase “asɔr” no kyerɛ nyimpakuw bi a wɔrosom, na nnyɛ dan no a wɔrosom wɔ mu no.

Hwɛ dɛm nhwɛdo yi: Aber a ɔsomafo Paul kyerɛɛw krataa kɛmaa Christianfo a nna wɔwɔ Rome no, ɔdze nkyia kɛmaa awarfo bi a wɔfrɛ hɔn Aquila nye Priscilla, na ɔdze kãa ho dɛ: “hom nkyia asɔr a ɔwɔ hɔn fie no so.” (Romefo 16:5) Nna nnyɛ dan no na Paul pɛ dɛ wokyia no ma no. Mbom no, nna ɔdze ne nkyia no rekɛma nkorɔfo​—asafo a nna wohyia mu wɔ dɛm fie hɔ no. a

Ntsi dɛ nkyɛ yɛbɛfrɛ bea a yehyia mu no asɔr no, yɛdze asɛmfua “Ahendzi Asa” dzi dwuma.

Asɛmfua yi fata osian siantsir ahorow pii ntsi:

• Dan no yɛ asa, anaa nhyiamu bea.

• Yehyia mu som Jehovah, Nyankopɔn a Bible no kã no ho asɛm no, na yedzi no ho dase.​—Ndwom 83:18; Isaiah 43:12.

• Yɛsan so hyia mu sũa Nyankopɔn n’Ahendzi anaa n’Ahenman a nna Jesus taa kã ho asɛm no ho adze.​—Matthew 6:9, 10; 24:14; Luke 4:43.

Yɛto nsa frɛ wo dɛ woarankasa kɔ Ahendzi Asa a ɔbɛn wo no mu, na hu mbrɛ Jehovah Adasefo yɛ hɔn nhyiamu ahorow no.