Matthew Asɛmpa 4:1-25
4 Iyi ekyir no, sunsum no dze Jesus kɔr sar no do ma Abɔnsam kɔsɔɔ no hwɛe.
2 Aber a ɔkyeen kɔm ndafua 40, adzekyee na adzesaa wiei no, ɔkɔm dzee no.
3 Afei, Ɔsɔhwɛfo no baa ne nkyɛn na ɔkaa kyerɛɛ no dɛ: “Sɛ eyɛ Nyankopɔn ne ba a, kasa kyerɛ mbobaa yi ma ɔndan paanoo.”
4 Naaso ɔkaa kyerɛɛ no dɛ: “Wɔakyerɛw dɛ: ‘Ɔnnyɛ paanoo nkotsee na nyimpa nam do bɛtsena ase, na mbom asɛm biara a ofi Jehovah n’anomu so.’”
5 Nna Abɔnsam faa no kɔr kurow krɔnkrɔn no mu, na ɔnye no kegyinaa asɔrfie no n’etsifi,*
6 na ɔkaa kyerɛɛ no dɛ: “Sɛ eyɛ Nyankopɔn ne ba a, tow woho kɔhwe famu, osiandɛ wɔakyerɛw dɛ: ‘Ɔwo ntsi, ɔbɔsoma n’abɔfoe ma wɔaabɔsoa wo wɔ hɔn nsa do, amma aammfa wo nan ammpem bobaa.’”
7 Jesus kaa kyerɛɛ no dɛ: “Wɔakyerɛw so dɛ: ‘Mma nnsɔ Jehovah wo Nyankopɔn nnhwɛ.’”
8 Bio so Abɔnsam nye no kɔr bepɔw tsentsenntsen bi do na ɔkyerɛɛ no wiadze ahendzi nyinara nye no mu enyimnyam.
9 Na ɔkaa kyerɛɛ no dɛ: “Sɛ ebɔ wo mu adze kor pɛ mpo som me a, medze iyinom nyinara bɛma wo.”
10 Nna Jesus kaa kyerɛɛ no dɛ: “Fi mo do kɔ, Satan! Na wɔakyerɛw dɛ: ‘Jehovah wo Nyankopɔn na ɔwɔ dɛ ekotow no, na ɔno nkotsee na ɔwɔ dɛ esom no.’”
11 Nna Abɔnsam gyaa no hɔ kɔree, na hwɛ, abɔfo bae na wɔhyɛɛ ase soom no.
12 Afei aber a ɔtsee dɛ wɔakyer John no, ofii hɔ kɔr Galilee.
13 Ekyir yi, aber a ofii Nazareth no, ɔbɛtsenaa Capernaum mpoano a ɔbɛn Zebulun na Naphtali mantɔw no mu,
14 ama asɛm a wɔnam nkɔnhyɛnyi Isaiah do kae no aaba mu. Ɔkaa dɛ:
15 “O, Zebulun asaase nye Naphtali asaase. Nsaase a ɔda mpoano kwan mu wɔ Jordan Esutsen no n’ekyir; amanaman Galilee!
16 Nyimpa a wɔtse sum mu no hun kan kɛse bi, na hɔn a wɔtsena beebi a owu no sum akata hɔn do no, kan puee hɔn do.”
17 Ofitsi dɛm aber no, Jesus hyɛɛ ase kaa asɛm no kyerɛɛ nkorɔfo na ɔkaa dɛ: “Hom nnu homho, na ɔsor Ahendzi no abɛn.”
18 Aber a ɔnam Galilee Po no ho no, ohun enuanom beenu bi, Simon a wɔfrɛ no Peter, nye no nua Andrew dɛ wɔrotow eboa wɔ po no mu, osiandɛ nna wɔyɛ afarfo.
19 Na ɔkaa kyerɛɛ hɔn dɛ: “Hom mbedzi m’ekyir, na mebɛma hom eyi* nyimpa.”
20 Na ntsɛmara na wogyaa hɔn eboa no hɔ na wodzii n’ekyir.
21 Na ofi hɔ rokɔ no, ohun nkorɔfo beenu bi a hɔn so wɔyɛ enuanom, Zebedee ne ba James na no nua John. Nna wɔnye hɔn papa Zebedee tsena hɛmba mu resa* hɔn eboa, na ɔfrɛɛ hɔn.
22 Hɔ no ara na wogyaa hɛmba no na hɔn papa hɔ na wodzii n’ekyir.
23 Afei okekyinkyiin Galilee nyinara, na ɔkyerɛkyerɛe wɔ hɔn nhyiamudan mu, na ɔkaa Ahendzi no ho asɛmpa no. Na hɔn a wɔwɔ nyarba ahorow nye hɔn a wɔnntse apɔw nyina no, ɔsaa hɔn yarba.
24 Na noho asɛm tahyee kɔr Syria nyinara, na wɔdze hɔn a wɔwɔ yarba ahorow nye hɔn a wɔrefa yaw mu, hɔn a wɔwɔ esunsum fi nye hɔn a wɔwɔ otwa yarba nye hɔn a woebubu brɛɛ no, na ɔsaa hɔn yarba.
25 Dɛm ntsi, nyimpadɔm pii fi Galilee na Decapolis* na Jerusalem na Judea na Jordan Esutsen no n’ekyir tui dzii n’ekyir.
Ase Hɔ Nsɛm
^ Anaa “beebi a ɔwɔ sor paa wɔ asɔrfie hɔ.”
^ Anaa “apa.”
^ Anaa “risiesie.”
^ Anaa “Ɔmantɔw A Nkurow Du Na Wɔwɔ Mu no mu.”
