ADZESUA ASƐM 43
NDWOM 90 Hom Nhyɛ Homho Nkuran
Sɛ Hɛn Adwen Mu Yɛ Hɛn Konsee A, Yebesi Dɛn Edzi Do?
“Hom nsɔ adze nyina nhwɛ.”—1 THESS. 5:21.
DZA YEBOSUA
Sɛ hɛn adwen mu yɛ hɛn konsee a, obotum ama hɛn gyedzi aayɛ mberɛw. Ntsi yɛbɔhwɛ dza yebotum ayɛ dze edzi do.
1-2. (a) Ebɛn nsɛm na bi a Jehovah n’asomfo bebisa hɔnho? (b) Ebɛnadze na yebosusu ho wɔ adzesua yi mu?
DƐ YƐYƐ mpanyimfo o, dɛ yɛyɛ mbofra o, ɔtɔ da a hɛn nyina adwen mu tum yɛ hɛn konsee. a Dɛ mfatoho no, bi a ɔbabun bi a ɔyɛ ɔdawurbɔfo benya adwen dɛ gyama n’asɛm nnhyɛ da ara mmfa Jehovah ho. Ntsi bi a onnhu sɛ onnuma o, sɛ mma onnuma o. Anaadɛ bi a onua bi sii gyinae wɔ ne mberantsɛber mu dɛ ɔdze Jehovah no som bedzi kan wɔ n’asetsena mu, na orinndzi sika ekyir. Naaso seseiara dze, ɔnnhyɛ da ara nnyi sika pii a ɔdze bɔhwɛ n’ebusua, ntsi bi a nna n’adwen yɛ no dɛ oennsi gyinae pa. Afei, ma yɛnhwɛ akyerɛbaa bi so a ne mfe akɔ enyim a onnyi ahoɔdzen papa. Bi a n’abaw mu ebu osiandɛ ndzɛmba a nna nkan no otum yɛ no, seseiara dze onntum nnyɛ dɛm ndzɛmba no bio. Ebisa woho dɛm nsɛm yi bi pɛn: ‘Ntsi Jehovah nyim me anaa? Ndzɛmba a medze abɔ afɔr ama Jehovah no, ebɛn mfaso na menya? Moho da ho ara hia Jehovah anaa?’
2 Sɛ yɛannhwehwɛ dɛm nsɛmbisa yi ho mbuae a, obotum ama hɛn gyedzi aayɛ mberɛw ma yeegyaa Jehovah som. Adzesua yi mu no, yɛbɔhwɛ Bible mu afotusɛm ahorow a obotum aboa hɛn aber a hɛn adwen yɛ hɛn dɛ (1) Jehovah nndwen hɛn ho, (2) mber bi a abɛsen kɔ no yeennsisi gyinae pa, anaa (3) seseiara dze hɛnho nnhia Jehovah.
DZA OBOTUM ABOA HƐN ABER A HƐN ADWEN MU AYƐ HƐN KONSEE
3. Sɛ nsɛm bi ma hɛn adwen mu yɛ hɛn konsee a, ebɛnadze na yebotum ayɛ?
3 Sɛ nsɛm bi kyer hɛn adwen ma hɛn adwen mu yɛ hɛn konsee a, adze kor a obotum aboa hɛn nye dɛ yɛbɔhwehwɛ dɛm nsɛmbisa no ho mbuae wɔ Nyankopɔn n’Asɛm no mu. Sɛ yɛyɛ dɛm a, ɔbɛhyɛ hɛn gyedzi dzen, ɔbɛma yɛnye Nyankopɔn ntamu anyɛnkofa no mu ayɛ dzen, na ɔbɔboa hɛn ma yeetum aakɔ do ‘egyina gyedzi no mu pintsinn.’—1 Cor. 16:13.
4. Yebesi dɛn ‘asɔ adze nyina ahwɛ’? (1 Thessalonicafo 5:21)
4 Kenkan 1 Thessalonicafo 5:21. Bible no hyɛ hɛn nkuran dɛ ‘yɛnsɔ adze nyina nhwɛ.’ Yɛbɛyɛ no dɛn? Sɛ hɛn adwen mu yɛ hɛn konsee wɔ asɛm bi ho a, ɔsɛ dɛ yɛdze toto dza Bible no ka no ho, na yɛhwɛ dɛ adwen a yeenya no yɛ nokwar a. Ɔbabun no a ɔtse nka dɛ Jehovah nndwen no ho no, hom mma yɛmfa n’asɛm no nyɛ mfatoho. Adwen a oenya no, ɔsɛ dɛ ɔfa no dɛmara anaa? Oho, mbom ɔsɛ dɛ ‘ɔsɔ adze nyina hwɛ’ mbrɛ ɔbɛyɛ a obohu Jehovah so n’adwen wɔ asɛm no ho.
5. Yebesi dɛn ehu Jehovah n’adwen wɔ nsɛm bi a ɔhaw hɛn no ho?
5 Sɛ yɛkenkan Nyankopɔn n’Asɛm no a, ɔtse dɛ mbrɛ Jehovah nye hɛn rekasa. Naaso ɔsɛ dɛ yɛyer hɛnho hwehwɛ Jehovah n’adwen wɔ nsɛm bi a ɔhaw hɛn no ho. Ɔsɛ dɛ yɛhwehwɛ kyerɛwnsɛm pɔtsee a ɔfa hɛn asɛm no ho, na yesua ho adze. Yebotum dze edwindadze ahorow a Jehovah n’ahyehyɛdze dze ama hɛn no ayɛ asɛm no ho nhwehwɛmu akɔ ekyir. (Mbɛ. 2:3-6) Sɛ yɛrebɛyɛ nhwehwɛmu no a, yebotum aserɛ Jehovah dɛ ɔmboa hɛn ma yenhu n’adwen wɔ hɛn asɛm no ho. Afei, yebotum ahwehwɛ Bible mu afotusɛm ahorow nye nsɛm pɔtsee bi a ɔfa hɛn asɛm no ho a yebotum dze ayɛ edwuma. Bio so, nkorɔfo a Bible no ka dɛ wohyiaa tsebea a ɔtse dɛ hɛndze no, sɛ yesua hɔn ho adze a obotum aboa hɛn.
6. Sɛ hɛn adwen mu yɛ hɛn konsee a, ebɛn kwan do na asafo nhyiamu botum aboa hɛn ma yeedzi do?
6 Jehovah kasa kyerɛ hɛn wɔ hɛn asafo nhyiamu ase. Sɛ yɛkɔ asafo nhyiamu da biara a, yebotum atse asɛm pɔtsee bi wɔ ɔkasa anaa mbuae a obi bɛma no mu, na iyi botum aboa hɛn ma yeedzi hɛn adwen mu a ayɛ hɛn konsee no do. (Mbɛ. 27:17) Afei, hom mma yensusu dza obotum aboa hɛn ma yeedzi ndzɛmba pɔtsee bi a obotum ama hɛn adwen mu aayɛ hɛn konsee no do.
ABER A W’ADWEN YƐ WO DƐ JEHOVAH NNDWEN WO HO
7. Ebɛn asɛm na binom botum ebisa hɔnho?
7 Ebisa woho dɛm asɛm yi pɛn: ‘Jehovah nyim me anaa?’ Sɛ etse nka dɛ mfaso biara nnyi wo do a, annhwɛ a w’adwen bɛyɛ wo dɛ irunntum mmfa amansan Bɔfo no nyɛnko da. Obotum aba dɛ Ɔhen David nyaa adwen a ɔtse dɛm. Nna ɔyɛ David nwanwa paa dɛ Jehovah dwen nyimpa a yɛnnsɛ hwee no mpo ho. Ntsi obisaa dɛ: “Ao [Jehovah], ɔdasanyi nye woana, na ɔwo edwen no do yi? Anaa ɔdasanyi ne ba, na ɔwo ibu no bi yi?” (Ndw. 144:3) Henfa na ibotum akɔhwehwɛ dɛm asɛmbisa yi ho mbuae?
8. Dɛ mbrɛ 1 Samuel 16:6, 7, 10-12 ma yehu no, ebɛnadze na Jehovah hu wɔ nkorɔfo ho?
8 Bible no ma yehu dɛ, hɔn a ɔtse dɛ mbrɛ nkorɔfo mmbu hɔn bi no, Jehovah nyim hɔn. Dɛ mfatoho no, Jehovah somaa Samuel dɛ ɔnkɔ Jesse ne fie na ɔnkɛsera ne mba mbanyimfo no mu kor, ama ɔaabɛyɛ Israelhen daakye. Nna Jesse wɔ mba mbanyimfo baawɔtwe, naaso hɔn mu beesuon pɛ na ɔfrɛɛ hɔn ma wobehyiaa Samuel. Ɔammfrɛ David a nna osuar koraa wɔ hɔn mu no ma ɔammba bi. b Naaso, David mbom na Jehovah yii no. (Kenkan 1 Samuel 16:6, 7, 10-12.) Nna Jehovah nyim mbrɛ David si tse ankasa. Ohun dɛ dɛm aberantsɛ no dɔ no paa.
9. Ebɛnadze ntsi na ibotum agye edzi dɛ Jehovah dwen wo ho? (Hwɛ mfonyin no so.)
9 Dwendwen ndzɛmba ahorow a Jehovah ayɛ dze akyerɛ dɛ onyim wo no ho. Tsebea biara a ewɔ mu no, no ho afotu a ɔbɔboa wo ara na ɔdze ma wo. (Ndw. 32:8) Sɛ Jehovah nnyim wo yie a, nkyɛ ehwɛ a, obotum ayɛ biribi a ɔtse dɛm a? (Ndw. 139:1) Sɛ edze afotu a Jehovah dze ma wo no yɛ edwuma na ihu mbrɛ osi boa wo no a, ɔbɛma agye edzi paa dɛ ɔdwen wo ho ankasa. (1 Mber. 28:9; Andw. 17:26, 27) Mbɔdzen a erobɔ dze asom Jehovah nyina, n’enyi tua. Ohu suban pa a ewɔ nyina na ɔpɛ dɛ ɔfa wo nyɛnko. (Jer. 17:10) Na n’enyi bɛgye paa dɛ woara so bɛfa no Nyɛnko.—1 John 4:19.
“Sɛ ehwehwɛ [Jehovah] a, ɔbɛma ehu no.”—1 Mber. 28:9 (Hwɛ nkyekyɛmu 9) c
ABER A W’ADWEN YƐ WO DƐ MBER BI A ABƐSEN KƆ NO ENNSISI GYINAE PA
10. Sɛ yɛdwendwen gyinae a yesisii mber bi a abɛsen kɔ no ho a, ebɛn nsɛm na bi a yebebisa hɛnho?
10 Ɔtɔ da a, sɛ nkorɔfo binom hwɛ gyinae a wosisii mber bi a abɛsen kɔ no a, ɔyɛ a wonnhu sɛ gyinae a wosii no yɛ papa mpo a. Obotum aba dɛ nna wɔyɛ edwuma bi a ɔma wonya sika pii, naaso osiandɛ nna wɔpɛ dɛ wɔyɛ pii wɔ Jehovah no som mu ntsi, wogyaa edwuma a ɔtse dɛm. Bi a wosii gyinae a ɔtse dɛm no mfe pii etwa mu. Naaso, bi a sɛ wohu hɔn anyɛnkofo a hɔndze wɔyɛɛ edwuma a ɔbɛma woenya sika pii no a, hɔn adwen bɛyɛ hɔn dɛ gyama ndzɛmba rokɔ yie ma hɔn. Iyi ntsi, bi a wobebisa hɔnho dɛ: ‘Ndzɛmba ahorow a medze bɔɔ afɔr maa Jehovah no, ebɛn mfaso paa na ɔwɔ do? Anaa nkyɛ ɔsɛ dɛ meyɛ edwuma dze pɛ sika pii?’
11. Ebɛnadze na ɔmaa obi a ɔkyerɛɛw Ndwom 73 no n’abaw bui?
11 Woara so, sɛ ebisa woho nsɛm a ɔtse dɛm pɛn a, nna ɔno hwɛ mbrɛ obi a ɔkyerɛɛw Ndwom 73 no tsee nka. Sɛ nna ɔhwɛ hɔn a wɔnnsom Jehovah no a, nna ohu hɔn dɛ wɔwɔ apɔwmudzen papa, wodzi yie, na ɔtse dɛ mbrɛ dadwen biara nnda hɔn do. (Ndw. 73:3-5, 12) Nna ɔtse dɛ mbrɛ ndzɛmba rokɔ yie ma hɔn wɔ asetsena mu, na iyi maa ɔtsee nka dɛ gyama mfaso biara mpo nnyi do dɛ ɔrosom Jehovah. Adwen a onyae no maa n’abaw mu bui, na nna da biara ɔma ɔtseetsee. (Ndw. 73:13, 14) Ebɛnadze na ɔyɛe wɔ adwen a onyae no ho?
12. Dɛ mbrɛ Ndwom 73:16-18 ma yehu no, ebɛnadze na ɔdwontofo no yɛe dze dzii ne haw no ho dwuma?
12 Kenkan Ndwom 73:16-18. Ɔdwontofo no kɔr Jehovah n’ahotseweebea hɔ. Nna hɔ nye beebi a n’asomu botum adwe no. Aber a ɔkɔr hɔ no, otumii susuu ndzɛmba ho yie. Obohun dɛ, nna ɔtse dɛ mbrɛ ndzɛmba rokɔ yie ma binom, naaso nna wonnyi enyidado papa biara. Iyi boaa no ma n’asomu dwee no, na obohun dɛ sɛ ɔdze Jehovah no som dzi kan wɔ n’asetsena mu a, nna ɔnntow noho nnkyenee koraa. Dɛm ntsi, osii no bo dɛ ɔbɔkɔ do ara asom Jehovah.—Ndw. 73:23-28.
13. Sɛ w’adwen mu nntsen wo wɔ gyinae bi a isii mber bi a abɛsen kɔ no ho a, ebɛnadze na ibotum ayɛ? (Hwɛ mfonyin no so.)
13 Nyankopɔn n’Asɛm no boaa ɔdwontofo no ma n’asomu dwee no. Ntsi obotum aboa woara so ma w’asomu aadwe wo. Ebɛn kwan do? Dwendwen ndzɛmba pa a ewɔ nye egyapadze a eroboaboa ano egu sor no ho. Afei so kaa dɛ hɔn a wɔnnsom Jehovah no, hɔn akatua araa na worinya wɔ dɛm wiadze yi mu no. Bi a wɔdze hɔnho bɔto ndzɛmba a woetum ayɛ wɔ asetsena mu no do, osiandɛ wonnyi daakye ho enyidado biara. Naaso ɔwo dze, nhyira a Jehovah dze ahyɛ wo bɔ no dze, ɔsɛ w’enyi ɔnnsɛ wo ɔka kyerɛ. (Ndw. 145:16) Afei so, dwen dɛm asɛm yi ho hwɛ: Sɛ isii gyinae fofor bi a, nkyɛ inyim mbrɛ w’asetsena bɛyɛ anaa? Dɛm asɛm yi yɛ nokwar paa: Hɔn a wɔma ɔdɔ a wɔwɔ ma Nyankopɔn nye hɔn nyɛnko nyimpa no kenyan hɔn ma wosisi gyinae ahorow bi no, adze pa biara rommbɔ hɔn wɔ asetsena mu.
Ɔyɛ a dwendwen ndzɛmba pa a Jehovah ahyɛ bɔ dɛ ɔdze bɛma wo daakye no ho (Hwɛ nkyekyɛmu 13) d
ABER A W’ADWEN YƐ WO DƐ WOHO NNHIA JEHOVAH
14. Ebɛnadze na ɔhaw binom, na ebɛn asɛm na bi a wobebisa?
14 Jehovah n’asomfo binom wɔ hɔ a, mpanyinyɛ ntsi, wonntum nnyɛ pii wɔ no som mu. Binom so dze, yarba retseetsee hɔn, na binom so edzi dzɛm. Iyi ntsi bi a wɔbɛtse nka dɛ wɔnnsom bo mma Jehovah. Ntsi bi a wobebisa dɛ, ‘Moho da ho ara hia Jehovah anaa?’
15. Nna ebɛn awerɛhyɛmu na obi a ɔkyerɛɛw Ndwom 71 no wɔ?
15 Obi a ɔkyerɛɛw Ndwom 71 no, nna noara so wɔ ɔhaw a ɔtse dɛm. Ntsi ɔbɔɔ mpaa dɛ: “Sɛ m’ahoɔdzen sa a, mma mmpa me.” (Ndw. 71:9, 18) Ɔwɔ mu dɛ nna ɔdwontofo no n’ahoɔdzen rokɔ famu dze, naaso nna ɔgye dzi paa dɛ sɛ ɔkɔ do dze nokwardzi som Jehovah a, ɔbɛkyerɛ no kwan na ɔaaboa no. Hɔn a mpanyinyɛ na yarba nyina ekyir no wɔreyɛ dza wobotum biara dze asom Jehovah no, n’enyi sɔ hɔn mbɔdzembɔ no.—Ndw. 37:23-25.
16. Ebɛnadze na ɔkyerɛ dɛ hɔn a hɔn mfe akɔ enyim no ho wɔ mfaso ma Jehovah? (Ndwom 92:12-15)
16 Sɛ wo mfe akɔ enyim a, mbrɛ Jehovah si hu wo no, bɔ mbɔdzen dɛ ibohu woho dɛmara. Osian mpanyinyɛ ntsi bi a w’apɔwmudzen nnyɛ papa, naaso Jehovah botum aboa wo ma aakɔ do dze nokwardzi asom no. (Kenkan Ndwom 92:12-15.) Mma mmfa dza inntum nnyɛ no sesei no nnhaw woho, mbom no fa w’adwen si dza itum yɛ no do. Dza ibotum ayɛ no bi nye dɛ ebɔkɔ do ara dze nokwardzi asom Jehovah, na ama afofor eehu dɛ edwen hɔn ho. Sɛ eyɛ dɛm a, ɔbɛhyɛ hɔn nkuran paa. Afei so, mbrɛ Jehovah esi aboa wo dze ebodu dɛm aber yi, nye enyidado a ewɔ dɛ no bɔhyɛ ahorow no bɛba mu no, ibotum aka ho asɛm akyerɛ afofor. Bio so, mma wo werɛ mmfir dɛ, sɛ ifi w’akoma mu bɔ mpaa ma afofor a, Jehovah betsie na ɔaaboa hɔn. (1 Pet. 3:12) Sɛ hɛn mfe akɔ enyim o, sɛ hɛn mfe nnkɔr enyim o, hɛn nyina botum ayɛ biribi dze ama Jehovah nye afofor.
17. Ebɛnadze ntsi na ɔnnsɛ dɛ yɛdze hɛnho toto afofor ho?
17 Sɛ ɔhaw wo dɛ inntum nnyɛ pii wɔ Jehovah no som mu a, nya awerɛhyɛmu dɛ dza itum yɛ biara no, n’enyi sɔ. Bi a ɔbɛyɛ wo dɛ fa dza itum yɛ no toto dza afofor tum yɛ ho. Naaso ɔnnsɛ dɛ eyɛ dɛm! Ebɛnadze ntsi a? Osiandɛ Jehovah mmfa hɛn nntoto afofor ho. (Gal. 6:4) Dɛ mfatoho no, Mary dze ngo huahuam bi a no bo yɛ dzen paa kyɛɛ Jesus. (John 12:3-5) Naaso, okunafo hianyi no dze nkapɛrmba ebien a ɔnnsom bo ahen biara yii ntoboa wɔ asɔrfie hɔ. (Luke 21:1-4) Naaso, Jesus ammfa Mary anntoto okunafo hianyi no ho, mbom ohun dɛ hɔn beenu no nyina yɛɛ biribi dze kyerɛɛ dɛ wɔwɔ gyedzi. N’Egya Jehovah so, biribiara a yɛyɛ ma no no, sɛ ɔyɛ hɛn dɛ osuar koraa mpo a, n’enyi sɔ paa osiandɛ onyim dɛ yɛdɔ no na yɛwɔ no mu gyedzi.
18. Sɛ hɛn adwen mu yɛ hɛn konsee a, ebɛnadze na ɔbɔboa hɛn ma yeedzi do? (Hwɛ adakaba a wɔato dzin “ Sɛ W’adwen Mu Yɛ Wo Konsee A, Jehovah N’Asɛm No Botum Aboa Wo” no so.)
18 Ɔtɔ da a, hɛn nyina adwen mu tum yɛ hɛn konsee. Naaso, dɛ mbrɛ yeebohu no, Nyankopɔn n’Asɛm Bible no botum aboa hɛn ma yeedzi do. Dɛm ntsi biribiara a ɔma w’adwen mu yɛ wo konsee no, bɔ mbɔdzen dɛ ibedzi do. Sɛ ɔba no dɛm a, ɔremma ennyɛ basaa, na mbom ɔbɔboa wo ma eesi w’adwen pi. Jehovah nyim wo yie paa. N’enyi sɔ ndzɛmba a edze abɔ afɔr mbrɛ ɔbɛyɛ a edze no som bedzi kan wɔ w’asetsena mu no, na ɔahyɛ bɔ dɛ obotua wo kaw. Ntsi nya awerɛhyɛmu dɛ Jehovah dɔ n’asomfo anokwafo nyina na ɔdwen hɔn ho so.
NDWOM 111 Dza Ɔma Hɛn Enyi Gye
a ASƐM BI A WƆAKYERƐKYERƐ MU: Adzesua yi mu no, sɛ yɛka dɛ obi n’adwen mu ayɛ no konsee a, dza ɔkyerɛ nye dɛ dɛm nyimpa no n’adwen yɛ no dɛ ɔnnsom bo mma Jehovah anaa n’adwen yɛ no dɛ oennsisi gyinae pa mber bi a abɛsen kɔ. Naaso sɛ Bible no ka dɛ obi n’adwen mu ayɛ no konsee a, dza ɔkyerɛ nye dɛ nyimpa no nngye Jehovah nndzi na ɔnngye nndzi so dɛ no bɔhyɛ ahorow no bɛba mu. Naaso ɔnnyɛ iyi na yɛrebɛka ho asɛm wɔ adzesua yi mu.
b Ɔwɔ mu dɛ Bible no nnka mfe pɔtsee a nna David edzi aber a Jehovah yii no dɛ ɔmbɛyɛ Israelhen no, naaso ɔbɛyɛ dɛ nna ɔda ho ara yɛ aberantsɛba.—Hwɛ September 1, 2011, Ɔweɔn-Aban no, kr. 29, nky. 2 no.
