TSETSE Israelfo no, nna ndwontow yɛ adze tsitsir wɔ hɔn amambra mu, ntsi yebotum aka dɛ, nna hɔn enyi gye ndwontow ho paa. Bible no ka no mpɛn pii dɛ, nna nkorɔfo dze nsanku anaa ndzɛmba afofor bɔ ndwom, na binom so dze hɔn ano tow ndwom no bi. Nokwasɛm nye dɛ, sɛ wɔkyekyɛ Kyerɛwnsɛm no mu du a, no mu kor yɛ ndwom nkotsee. Dɛm kyerɛwnsɛm no mu bi nye Ndwom nwoma no, Ndwom Mu Ndwom, na Kwadwom nwoma no. Ntsi buukuu a wɔato dzin Music in Biblical Life no ka dɛ, Bible no “ma ɔda edzi dɛ, ndzɛmba ahorow a nna Israelfo no yɛ wɔ hɔn da biara da asetsena mu no, no mu pii wɔ hɔ a, wɔreyɛ nyina nna wɔrotow ndwom.”

Nna wɔtow ndwom da biara. Sɛ nna Israelfo no enyi gye a, wɔtow ndwom, na sɛ hɔn werɛ how so a, nna wɔtow ndwom. (Isa. 30:29) Sɛ nna worisi hen, woridzi afahyɛ, anaa asogyafo dzi konyim wɔ ɔko mu a, nna mbaa no wosow mfuaba a wokitsakitsa no, na wɔdze enyigye tow ndwom na wodzi asaw. (Atsɛ. 11:34; 1 Sam. 18:​6, 7; 1 Ahe. 1:​39, 40) Afei so, sɛ obi wu anaa awerɛhosɛm bi si a, nna Israelfo no wɔ kwadwom anaa awerɛhow ndwom ahorow bi a wɔtow. (2 Mber. 35:25) Ɔnnyɛ nwanwa dɛ buukuu a wɔato dzin McClintock and Strong’s Cyclopedia no ka dɛ, “nna ndwontow wɔ Hebrewfo no hɔn bɔgyaa mu.”

Nna wɔtow ndwom wɔ ahemfie hɔ. Nna Israel ahemfo no enyi gye ndwontow ho paa. Ɔhen Saul dze David baa n’ahemfie hɔ dɛ ɔmbɔbɔ sanku na ɔntow ndwom mma no. (1 Sam. 16:​18, 23) Ekyir yi, aber a David nankasa bɛyɛɛ ɔhen no, ɔyɛɛ ndzɛmba ahorow a wɔdze bɔ ndwom. Afei so, ɔkyerɛɛw ndwom dɛdɛɛdɛw pii, na oyiyii nkorɔfo a nna wɔbɔtow ndwom wɔ Jehovah n’asɔrfie hɔ. (2 Mber. 7:6; Amos 6:5) Ɔhen Solomon so, nna ɔwɔ mbanyin na mbaa adwontofo pii wɔ n’ahemfie hɔ.—Ɔsɛnk. 2:8.

Nna wɔtow ndwom aber a wɔrosom Jehovah. Nna Israelfo no tow ndwom dze yi Jehovah ayɛw. Mbrɛ ɔtse nye dɛ, nna mbarimba 4,000 na wɔtow ndwom wɔ Jerusalem asɔrfie hɔ. (1 Mber. 23:5) Nna wɔdze nkasaa, bɛnta asanku, nsankutsen, na ntotorobɛnto nyina bɔ ndwom. (2 Mber. 5:12) Naaso nna ɔnnyɛ hɔn a wonyim ndwontow nkotsee na wɔtow ndwom aber a wɔrosom Jehovah no. Nna Israelfo no nyina tow bi. Afei so, ɔbɛyɛ dɛ sɛ nna Israelfo no nam kwan do rokɔ Jerusalem ekedzi hɔn afahyɛ ahorow no a, nna hɔn mu pii tow ndwom. Nna wɔfrɛ dɛm ndwom ahorow a wɔtow yi Mfowee Ndwom. (Ndw. 120–134) Bio so, tsetse Jewfo nkyerɛwee no ma yehu dɛ, sɛ Israelfo no ridzi Apaho afahyɛ edziban no a, nna wɔtow Hallel Ndwom. a

Ndɛ na ndɛ nyina, Nyankopɔn n’asomfo enyi da ho ara gye ndwom ho. (Jas. 5:13) Yɛtow ndwom dze yi Jehovah ayɛw. (Eph. 5:19) Afei so, sɛ yɛnye hɛn nuanom Christianfo bɔ mu tow ndwom a, ɔma yɛtwe bɛn hɛnho. (Col. 3:16) Bio so, sɛ yɛtow ndwom anaa yɛbɔ na yetsie no kɛkɛ mpo a, otum hyɛ hɛn dzen, na ɔboa hɛn ma yegyina ɔhaw a yehyia no ano. (Andw. 16:25) Ampa, ndwontow yɛ adze tsitsir a yɛyɛ dze kyerɛ dɛ yɛgye Jehovah dzi, na yɛdɔ no.