DZA NKORƆFO KÃ

Nyimpa pii kã dɛ sɛ aban no gye kyakyatow to mu dze a, nna ɔno asɛm biara nnyi ho. Kyakyatow bi tse dɛ loto yɛ biribi a mbra ma ho kwan, na bi mpo dze, aban nankasa na odzi mu akotsen. Wɔdze sika a wonya fi loto a ɔtse dɛm mu no bi yɛ mpontudwuma.

DZA BIBLE NO KÃ

Bible no nnhyɛ da ara nnkã kyakyatow ho asɛm pɔtsee, naaso afotusɛm pii wɔ mu a ɔboa hɛn ma yehu dza Nyankopɔn kã fa ho.

Dza ɔwɔ kyakyatow mu ara nye dɛ obi bedzi obi ne sika. Iyi nye Bible mu asɛm bi bɔ ebira. Ɔkã dɛ: ‘Hom nhwɛ yie wɔ enyiber nyina ho.’ (Luke 12:15) Nokwasɛm nye dɛ, enyiber na ɔma nkorɔfo tow kyakya. Ndwumakuw a wɔbɔ kyakyatow ho dawur no dze sika akɛse toto do dɛ amamfo ntwa ndzi. Sɛ ɔba no dɛm a, hɔn a wɔpɛ dɛ wonya hɔnho no dze hɔn sika nyina kɛhyɛ mu. Naaso sika a nyimpa no bɔhwer no dze, ndwumakuw no nnkã ho asɛm koraa. Ntsi yetum hu dɛ, kyakyatow hyɛ sika enyiber ho nkuran.

Pɛsɛankonya na opiapia nkorɔfo ma wɔtow kyakya: obiara pɛ dɛ ne nyɛnko hwer ne sika na sika no eebedzi no hɔ. Naaso Bible no kã kyerɛ hɛn dɛ: “mma obiara nnhwehwɛ nankasa nedze, na mbom ɔnhwehwɛ ne nyɛnko dze.” (1 Corinthfo 10:24) Bio so, Mbransɛm Du no mu kor kã dɛ: “Mma w’enyi mmber . . . biribiara a ɔyɛ wo nyɛnko dze.” (Exodus 20:17) Sɛ obi tow kyakya a, wɔ ɔkwan bi do no, ne mpaabɔ ara nye dɛ binom bɔhwer hɔn adze na ɔaafa do edzi yie.

Nyimpa binom wɔ adwen dɛ sɛ wɔtow kyakya a, hɔn kra na odzi boa hɔn. Naaso Bible no mmfoa dɛm adwen yi do. Wɔ tsetse no, Israelfo binom a nna hɔn gyedzi ewu no gyaa Nyankopɔn som, na wɔhyɛɛ ase ‘too pon maa Isiar’ bosom. Ntsi ehwɛ a, aso nna Nyankopɔn n’enyi bɛgye ɔsom a wɔdze ma “Isiar” bosom no ho? Oho. Nyankopɔn kãa kyerɛɛ hɔn dɛ: ‘Hom yɛɛ dza omuo wɔ m’enyi do, na hom yɛɛ dza minnyi ho enyigye.’​—Isaiah 65:11, 12.

Ɔwɔ mu, wɔ aman ahorow bi do no, aban no dze sika a wonya fi kyakyatow mu no boa nwomasua na mpontudwuma. Naaso iyi nnsesa hwee, osiandɛ nnyɛ dza wɔdze sika no yɛ no na ohia, na mbom beebi a sika no fi no a. Asɛm no ara nye dɛ, kyakyatow hyɛ enyiber na pɛsɛankonya ho nkuran. Ɔma nkorɔfo nya adwen dɛ wobotum enya hɔnho da kor pɛ.

“Mma w’enyi mmber . . . biribiara a ɔyɛ wo nyɛnko dze.”​—Exodus 20:17.

DZA BIBLE NO KÃ

Bible no bɔ hɛn kɔkɔ dɛ: “Hɔn a wɔpɛ ayɛ ahonyafo no, wɔhwe nsɔhwɛ nye efir nye nkwasea akɔndɔ pii a ɔyɛ mbusu a ɔtwe hɔn kogu ɔsɛɛ nye ɔhera mu.” (1 Timothy 6:9) Enyiber na ɔma obi tow kyakya. ‘Enyiber’ nnyɛ, na ɔka suban a Bible no kã dɛ yenyi no akwa no ho.​—Ephesusfo 5:3.

Kyakyatow ma obi nya adwen dɛ obotum abɛyɛ osikanyi wɔ da kor pɛ mu. Adwen a ɔtse dɛm so nye sika enyiber nam. Bible no kã dɛ “bɔn horow nyina ndwow” nye sikapɛ. Sɛ sika gye obi n’adwen a, ɔyɛ hũ osiandɛ obotum dze dadwen abɔto onyii no do, na gyedzi a ɔwɔ wɔ Nyankopɔn mu no so bɛsɛɛ. Bible no kã nyimpa a wɔtse dɛm ho asɛm dɛ “wɔdze yaw pii awowɔ hɔnho.”​—1 Timothy 6:10.

Sɛ obi yɛ onyiberfo a, dza ɔwɔ no n’enyi nnsɔ. Dɛm ntsi n’enyi nngye. “Nyia ɔpɛ dwɛɛtɛɛ no, dwɛɛtɛɛ nnkɛmee no; na nyia ɔpɛ adze dodow no, ndɔbaa nnkɛmee no.”​—Ɔsɛnkafo 5:10.

Nyimpa pii na kyakyatow dze hɔn ayɛ nkowaa. Dɛm haw yi wɔ beebiara. Sɛ ehwɛ United States a, wobu nkontaa dɛ nyimpa mpempem pii na kyakyatow aka hɔn hɔ.

Abɛbusɛm bi kã dɛ: ‘Wɔbɛhyɛ ase enya egyapadze ntsɛntsɛm dze; na n’ewiei nnkɛyɛ nhyira.’ (Mbɛbusɛm 20:21) Binom atow kyakya araa ma kaw amen hɔn. Binom so mpo dze, hɔn edwuma efi hɔn nsa. Binom so hɔn awar asɛɛ na atsetsew anyɛnkofo ntamu. Naaso sɛ obi dze Bible no mu afotusɛm yɛ edwuma a, obotum aboa no ma ɔaatwe noho efi ɔhaw yi nyina ho, na oeenya enyigye.

“Hɔn a wɔpɛ ayɛ ahonyafo no, wɔhwe nsɔhwɛ nye efir nye nkwasea akɔndɔ pii a ɔyɛ mbusu a ɔtwe hɔn kogu ɔsɛɛ nye ɔhera mu.”​—1 Timothy 6:9.