CHRISTIANFO mpempem pii nndzi Buronya. Wɔtse nka dɛn wɔ Buronya a wonndzi no ho? Aso wɔahwer biribi? Aso hɔn mba tse nka dɛ hɔn awofo dze biribi robɔ hɔn abor? Hom mma yɛnhwɛ dza Jehovah Adasefo a wɔwɔ aman pii do akã wɔ asɛm no ho.

Wɔkaa Jesus Christ: “Memmbɛyɛɛ Jehovah Dasefo no, nna menntaa nkɔ asɔr. Sɛ mobɔkɔ so a, nna ɔyɛ Buronya anaa Easter ber. Dɛm aber no, sɛ mokɔ asɔr mpo a, nna m’adwen nnyi Jesus Christ do ankasa. Seseiara a merekasa yi, minndzi Buronya, naaso mokɔ Christianfo nhyiamu mpɛn ebien dapɛn biara. Afei so, mekyerɛkyerɛ afofor dza Bible no kã fa Jesus ho mpo!”​—EVE, AUSTRALIA.

Wɔkyɛ adze, na ɔma hɔn enyi gye: “Sɛ obi kyɛ me adze ber a m’enyi nnda a, ɔma m’enyi gye papaapa. Akyɛdze a ɔtse dɛm na mepɛ! Metaa kyerɛw krataa na meyɛ mfonyin wɔ do dze kɛma afofor. Iyi ma hɔn enyi gye, na emi so m’enyi gye.”​—REUBEN, NORTHERN IRELAND.

Wɔboa ehiafo: “Hɛn enyi gye ho dɛ yɛbɛyɛ edziban ama ayarfo. Ɔtɔ da a, yɛkɛkyɛ hɔn nhyiren, keek, anaa yɛkɛma hɔn akyɛdze ketseaba bi dze hyɛ hɔn nkuran. Yɛyɛ ndzɛmba a ɔtse dɛm, osiandɛ yetum kɔ dɛm nkorɔfo yi nkyɛn aber biara wɔ afe no mu.”​—EMILY, AUSTRALIA.

Wɔnye ebusuafo hyia mu: “Sɛ yɛnye hɛn ebusuafo hyia a, ahoper biara nnyi mu. Ntsi, ɔma hɛn mba no hu hɔn wɔfanom, hɔn nanom afofor, hɔn nananom, nye hɔn nuanom afofor. Ɔnnyɛ afahyɛ pɔtsee bi mu na yɛserasera hɛn ebusuafo. Dɛm ntsi, yɛnntse nka dɛ ɔyɛ nhyɛ dɛ yɛbɔkɔ akɛsera hɔn. Afei so, hɔnankasa hu dɛ yɛdɔ hɔn, ntsi na yɛserasera hɔn no.”​—WENDY, CAYMAN ISLANDS.

Asomdwee: “Sɛ odu Buronya ber a, nkorɔfo twa hɔnho araa ma ɔyɛ a, nna hɔn werɛ efir mpo dɛ adze bi wɔ hɔ a wɔfrɛ no asomdwee. Mebohu daakye ho bɔhyɛ a ɔwɔ Bible mu no, ntsi munnsuro. Afei so, mebohu dɛ me mba benya enyigye daakye.”​—SANDRA, SPAIN.