Ɔpanyin a ɔda World Bank Group ano no bɔɔ amandzɛɛ wɔ June 2022 dɛ: “Wiadze no sikasɛm resɛɛ bio. Dɛm aber yi dze ndzɛmba no bo rokɔ sor paa na nyimpa pii so nnyi sika.”

 International Monetary Fund so bɔ amandzɛɛ dɛ: “Petrol, diesel nye ndzɛmba afofor a ɔtsetse dɛm no no bo akɔ sor papaapa na edziban so no bo ayɛ dzen paa. Aman a wonnyi sika pii no na aka hɔn kɛse.”

 Bible no boa hɛn ma yehu siantsir a sikasɛm ho ayɛ dzen dɛm, dza yebotum ayɛ dze egyina ano nye enyidado a ɔwɔ hɔ dɛ ndzɛmba bɛyɛ yie daakye.

•    Bible no frɛ aber a yɛtse mu yi dɛ “nda a odzi ekyir.”​—2 Timothy 3:1.

•    Jesus kaa dɛ ‘ndzɛmba a ɔyɛ hu’ anaa ndzɛmba a ɔyɛ akomatu besisi wɔ mber a ɔtse dɛm mu. (Luke 21:11, Baebor) Sɛ ndzɛmba no bo kɔ sor a ɔma nyimpa pii bɔ hu. Nkyii so, ɔma nyimpa pii dwen dza obesi daakye nye kwan a wobotum afa do ahwɛ hɔn mbusua ho.

•    Nyikyerɛ nwoma no hyɛɛ nkɔm dɛ edziban no bo bɔkɔ sor wɔ hɛn aber yi do. ‘Metsee ndze bi dɛ ɔse, ewifua esusudze kor, na atoko esusudze ebiasa nyɛ ɔpaanyi ne da kor akatua.’​—Nyikyerɛ 6:6.

 Sɛ epɛ “nda a odzi ekyir no” nye nkɔnhyɛ a Nyikyerɛ nwoma no ka ho asɛm no ho nsɛm pii a, hwɛ video a wɔato dzin Ofi 1914 Reba No, Wiadze No Asesa na kenkan asɛm a wɔato dzin “The Four Horsemen​—Who Are They?” no so.

•    “Na wobesisi adan, na wɔatsenatsena mu; na wɔatsɛw wenyin nture, na woedzi no mu aba. Wonnkesi, na obi atsena mu; wɔnnkɛtsɛw na obi edzi.”​—Isaiah 65:21, 22.

•    “Wɔmma eburow piigyan mbra mbepɔw etsifi asaase no do.”​—Ndwom 72:16.

•    “Mbɔbɔrnyi a wɔhyɛ no do, na ohianyi n’apensi ntsi, mobɔsoɛr, Jehovah na ɔse; Mebɛgye hɔn efi hɔn a wobu hɔn enyimtsia no nsamu.”​—Ndwom 12:5 a, NWT.

 Ɔwɔ mu dɛ sikasɛm ayɛ basaa wɔ wiadze yi mu beebiara dze, naaso ɔnnkɛkyɛr Nyankopɔn beyi dɛm haw yi efi hɔ. Sɛ epɛ dɛ ihu mbrɛ Nyankopɔn besi ayɛ iyi a, kenkan asɛm a wɔato dzin “Is a Fair Economic System Possible?”

 Ɔwɔ mu dɛ ndɛ ndzɛmba no bo rokɔ sor dze, naaso Bible no botum aboa wo ma egyina dɛm tsebea yi ano. Bible no besi dɛn aboa hɛn? Afotu pa beberee wɔ Bible no mu a ɔboa hɛn ma yehu kwan pa a yebotum afa do dze hɛn sika edzi dwuma yie. (Mbɛbusɛm 23:4, 5; Ɔsɛnkafo 7:12) Sɛ epɛ dɛ ihu iyi ho nsɛm pii a, kenkan asɛm a wɔato dzin “Mbrɛ Ibesi Dze Wo Sika Kakraba A Inya No Edzi Dwuma Yie” nye “Protect Your Livelihood.”