Ana ahyɛ no nsew wɔ mfonyin ahorow a ɔwɔ nwomaba yi mu no mu dɛ Jehovah Adasefo siesie hɔnho yie, aber a wɔrokɔ hɔn asafo nhyiamu ahorow ase no anaa? Ebɛnadze ntsi na yɛma hɛn enyi kũ hɛn ntarhyɛ nye hɛn ahosiesie ho dɛm?

Yɛdze kyerɛ obu ma hɛn Nyankopɔn. Ɔyɛ nokwar dɛ, Nyankopɔn nnhwɛ dɛ mbrɛ yɛtse wɔ enyiwa do kɛkɛ. (1 Samuel 16:7) Naaso sɛ yehyia mu dɛ yɛrosom no a, dza ohia hɛn tsitsir paa nye dɛ yɛbɛkyerɛ obu ama ɔno nye hɛn mfɛfo asomfo a yɛnye hɔn rosom no. Sɛ no ho ba behia dɛ yekegyina ɔtsɛmbuafo bi enyim wɔ asɛndzibea a, nkyɛ yɛbɛma hɛn enyi ekũ hɛn ahosiesie ho dze akyerɛ dɛ yɛwɔ obu ma ne dzibew no. Dɛmara so na mbrɛ yesiesie hɛnho yie aber a yɛrokɔ nhyiamu ahorow ase no kyerɛ dɛ yɛwɔ obu kɛse ma Jehovah Nyankopɔn, ‘asaase nyinara Ɔtsɛmbuafo’ no, nye beebi a yɛsom no no.​—Genesis 18:25.

Ɔkyerɛ gyinapɛn kor a yɛdze bɔ hɛn bra. Bible no hyɛ Christianfo nkuran dɛ wɔmfa “enyi a ɔfɛr adze nye enyidahɔ” nsiesie hɔnho. (1 Timothy 2:9, 10) “Enyi a ɔfɛr adze” a yɛdze besiesie hɛnho no kyerɛ dɛ yebokwetsir dɛ yɛbɛhyɛ ntar a ɔyɛ hyerɛpɛɛ, ɔbɛma hɛnho egu hɔ, anaa ɔbɔtwetwẽ nda ho akɔndɔ. Bio so “enyidahɔ” a yenya no boa hɛn ma yɛpaw ntar a ɔfata na ɔnnyɛ basabasa. Dɛm ngyinadosɛm ahorow yi nnkyerɛ dɛ obi runntum mmpaw atar a ɔpɛ dɛ ɔhyɛ nye ɔkwan a ɔpɛ dɛ ɔfa do siesie noho. Hɛn ahosiesie a yɛma ɔyɛ ahomkã no botum “aahoran Nyankopɔn hɛn Agyenkwa nkyerɛkyerɛ no” na “wɔaahyɛ Nyankopɔn enyimnyam.” (Titus 2:10; 1 Peter 2:12) Hɛnho a yesiesie no yie aber a yɛrokɔ nhyiamu ahorow ase no nya mbrɛ afofor bu ɔsom a yɛdze ma Jehovah no do nkantando.

Mma wo ntar nnsiw wo kwan dɛ ebɛba nhyiamu wɔ Ahendzi Asa do. Onnhia dɛ hɛn ntar no bo yɛ dzen anaa ɔyɛ hyerɛpɛɛ ana hɛn ahosiesie aayɛ dza ɔfata, no ho tsew na odzi mu.

• Ebɛnadze ntsi na mbrɛ yesiesie hɛnho no ho hia aber a yɛrosom Nyankopɔn no?

• Ebɛn ngyinadosɛm na ɔkyerɛ hɛn kwan aber a yɛrepaw hɛn ntar nye hɛn ahosiesie no?