Ena gauna qo, era tusaqati vakalevu tale ga na iVakadinadina i Jiova e Eritrea. Ena ika17 ni Seviteba, 2019, ratou se vesu tiko me 25 na yabaki o Paulos Eyasu, Isaac Mogos, kei Negede Teklemariam. Kuria ya, era vesu tale tiko ga e le 39 tale na tacida tagane kei na le 10 na tacida yalewa.

O ira kece na tacida era vesu tiko ena gauna qo e sega ni dua na yavu era vesu kina, nodra rairai ena mataveilewai, se kedra itotogi. Era sega ni kila na gauna era na sere kina. E le va na tacida ratou mate e valeniveivesu, e tolu tale ratou mate ni ratou sere oti ga ena vuku ni veika dredre eratou sotava e valeniveivesu.

E kaukaua sara na veivakacacani e Eritrea ena ika25 ni Okotova, 1994 oti ga e dua veimama na yabaki nona tugalala na matanitu o Eritrea. E kaya kina na peresitedi vou nira na sega ni vakatokai mera lewenivanua e Eritrea, o ira kece na iVakadinadina i Jiova ena vuku ni nodra tawaveitovaki. E sega tale ga ni soli vei ira nodra dodonu vakalewenivanua. Eso tale ga na ka era vakatabui kina, oya na ivakatagedegede ni vuli e namaki vua e dua na lewenivanua, mera vakabisinisi, se mera gole ina dua tale na vanua.

Ena veiyabaki sa sivi, era vakaraitaka nodra kauai eso na vakailesilesi era valataka na dodonu ni lewenivanua ena vuku ni kena beca na matanitu o Eritrea eso na lawa e vauci ira na lewenivanua, vakabibi vei ira na iVakadinadina i Jiova. E sega ni muria o Eritrea na nodra vakatutu na vakailesilesi qori.

Raica na: “SPECIAL REPORT: The Persecution of Jehovah’s Witnesses in Eritrea”

Eda na vakaraitaka tiko ga vei ira na vakailesilesi ni matanitu, kei ira na veiliutaki na ituvaki e Eritrea. Nira tomana tiko ga nodra vakaraitaka na tacida na vakabauta kei na yaloqaqa ena vuku ni veivakacacani, eda nuitaka ni o Jiova ena nodra iVukevuke kei na “vatu ni ivakaruru.”—Same 94:22.