Era vakacaucautaka na noda isoqosoqo na vakailesilesi era dau qarava na vanua ni soqo lelevu e Sauca Korea. Na vuna? Nida sa tuvanaka me kua ni caka na soqo ni veiwasewase ni 2020 ena vanua ni soqo lelevu, ia me sa na saravi ga ena internet. Era vakavinavinakataki keda na vakailesilesi nida raica vakabibi na nodra taqomaki na lewenivanua qai tomana tiko ga na noda ituvatuva ni vuli vakayalo. Sa vakasukai tale ina isoqosoqo na ilavo sa saumi rawa tu kina na vanua ni soqo.

E kaya e dua e dau cakacaka ena vanua ni soqo e Seoul: “Sa dau kilai tu ga nira dau vakatulewa vakavuku na iVakadinadina i Jiova. Keimami taleitaki ira vakalevu. Mai na balavu ni gauna au tu kina eke, vaka vei au, e sega tale ni dua na lotu me tautauvata kei ira, nira dau kauaitaki ira vakalevu na lewenivanua.” E tomana: “Era sega ni dau nanumi ira ga na iVakadinadina i Jiova. Keimami rarawataka nira sega ni rawa ni mai soqo vata eke ena yabaki qo. Keimami nuitaka ni dua na siga era na mai soqo tale eke.”

E kaya e dua na vakailesilesi e cakacaka tiko ena siti o Suwon: “Dua na ka noqu vakavinavinakataki ira na iVakadinadina i Jiova nira dau qarava vinaka na vanua qo ena 35 na yabaki sa oti, vaka ga e nodra tu. Ia au vakavinavinakataka sara vakalevu na totolo ni nodra muria na veidusimaki ni matanitu me baleta na vakatatabu ni mate na COVID-19. Au drukataka dina na nodra dau veinanumi. Au vakanamata tu na nodra mai vakayagataka tale na vanua qo ena yabaki mai qo.”

E kaya e dua e cakacaka ena raraniwaqavuka volekata na vanua e dau caka kina na noda soqo: “Keitou raica ena 2018 kei na 2019 na nodra dau tuvatuvanaki vakamatau na iVakadinadina i Jiova, ra qai dau muria totolo na ka keitou dau kerea. E laurai dina na veinanumi nira vakadaroya na soqo ena yabaki qo, e tarai au sara ga vakalevu.” E tomana: “E dua na ka vinaka ke ra vakataki ira na iVakadinadina i Jiova na vo ni tamata.”

Eda kalougata na tamata i Jiova nida vakavulici meda dau lomani ira na kainoda, e laurai na loloma qori ena gauna dredre qo.—Maciu 22:39.