E levu e taura na gauna mera qai vuli ena ituvaki mosimosi era sotava. Dua sara ga vei ira qori o yau. Au sucu, au susu tale ga e Barcelona na ikarua ni siti levu duadua e Sipeni. Keitou tiko vakavuvale ena yasayasa o Somorrostro, e toka volekata na matasawa. E dau kilai tu o Somorrostro me vanua ni basulawa kei na volitaki wainimategaga.

 Keitou le ciwa na gone, au qase duadua. Ni keitou vuvale dravudravua, a tukuna o tamaqu meu lai tomi polo ena dua na vanua ni qito tenisi. Au se qai yabaki tini ena gauna ya. E tini na aua noqu cakacaka ena dua na siga, qori na vuna au sega ni lai vuli kina kei ira noqu icaba. Gauna au yabaki 14 kina, au sa lai cakacaka ena dua na vanua ni buli kaukamea.

 E lavaki mera curu ena mataivalu na tagane e Sipeni, au mani kacivi ena 1975 meu lewena na mataivalu. Niu via tovolea e dua na cakacaka vou, au bole meu veiqaravi ena dua na iwasewase ni mataivalu e vakatokai na Spanish Foreign Legion. Au gole sara kina i Melilla, Noca Aferika. Qori na gauna au tekivu bobula kina ena wainimategaga kei na gunu.

 Niu biuta na mataivalu, au lesu i Barcelona, au lai iliuliu sara ni dua na ilala daubutako. Keitou dau butakoca na iyaya ga keitou raica, sa qai volitaki qori me voli kina na wainimategaga. Au tekivu vakayagataka eso na mataqali wainimategaga e tukuni ni solia na kaukaua, qai vakavuna na tatadra. Au bobula tale ga ina veiyacovi, alakaolo, kei na veimauilavo. Na ivakarau ni bula torosobu qori sa qai vakavuna ga meu voravora. Na vanua ga au gole kina au na kauta tu na isele se na matau, au sega ni rere na vakayagataka ke vinakati.

 Dua na gauna keitou butakoca e dua na motoka, keitou qai veicemuri kei na ovisa. E vaka ga na sara iyaloyalo. Sa via 30 na kilomita na vanua keitou veicemuri kina ratou qai vanavana na ovisa. A vakacoqa o neitou draiva na motoka keitou qai dui dro. A cemuri au mai vale o tamaqu ni rogoca na ka e yaco.

 E lima na yabaki noqu vakavale tu e gaunisala. Au dau moce e matanikatuba, ena lori, idabedabe ena vanua ni gade, kei na ibulubulu. Dua na gauna au lai tu sara ena qaravatu. Sa sega ni vakainaki na bula, sega tale ga ni dua na ka vei au na bula se mate. Niu vakayagataka na wainimategaga ena dua na gauna, au qai taya noqu ilabeniika kei na ligaqu. Se tu ga qo na mawe ni mavoa.

 Niu yabaki 28, a vaqarai au yani o tinaqu qai kerea meu lesu i vale. Au mani lesu i vale, au yalataka tale ga vua niu na veisautaka noqu ivakarau ni bula. Ia e taura toka na gauna meu veisau.

 Dua na yakavi rau gole yani vale e rua na iVakadinadina i Jiova. Niu vakarogoci rau toka, a kailavaka mai lomanivale o tamaqu meu sogota na katuba. Au dau sega ni vinakata me tukuni vei au na ka meu cakava, au sega ni kauaitaka kina na ka e tukuna o tamaqu. Au taura sara e tolu na ivola lalai rau solia vei au. Au tarogi rau se rau dau lotu i vei, oti e vica na siga au gole sara ina Vale ni Soqoni.

 Na imatai ni ka e dreta na mataqu na maqosa ni nodra isulusulu. E duidui sara qori mai na kequ irairai, ni balavu tu na uluqu, qai duka na kumiqu kei na noqu isulu. Au vakasamataka ni sega ni ganiti au na vanua qo, au mani duri tu ga i tuba. Ia au kidacala niu raici Juan dua noqu ilala e liu ni sa sutu vinaka tu. Au rogoca e muri ni se qai dua toka ga na yabaki nona iVakadinadina i Jiova. Noqu raici koya e vakadoudoutaki au meu gole i loma qai tiko ena soqoni. Sa tekivu veisau sara ga e keri na noqu bula.

 Au vakadonuya meu vuli iVolatabu. Au liaca tale ga ni dodonu meu veisautaka noqu itovo voravora kei na noqu ivakarau ni bula vakasisila me vakadonui au kina na Kalou. E sega ni rawarawa na veisau qori. Au vulica ni dodonu meu ‘veisau, me vakavoui noqu vakasama’ keu via vakamarautaka na Kalou o Jiova. (Roma 12:2) E uqeti au dina nona yalololoma na Kalou. E levu na noqu cala, ia au vakila ni solia vei au na gauna na Kalou meu veisautaka noqu ivakarau ni bula. E tara sara ga na lomaqu na ka au vulica me baleta na Kalou o Jiova. Au sa qai vakadeitaka ni bula tiko na Dauveibuli e kauaitaki au.​—1 Pita 5:6, 7.

 E uqeti au qori meu veisautaka noqu ivakarau ni bula. Kena ivakaraitaki, niu vulica ena iVolatabu na veika me baleta na vakatavako, au kaya Io ga, ‘Ke vinakata na Kalou o Jiova meu savasava se kua ni dukadukali, e dodonu meu muduka na vakatavako!’ (2 Korinica 7:1) Au viritaka vakadua na vatu ni kana tavako!

 E dodonu tale ga meu muduka noqu vakayagataka se volitaka na wainimategaga. E taura toka na gauna qori, qai vinakati kina vakalevu na sasaga. Au vakanadakui ira noqu ilala makawa nira na vakadredretaka noqu sasaga meu toso vakayalo. Toso na gauna, au sa vakararavi ga vakalevu vua na Kalou kei na nodra veivuke na noqu itokani vou ena ivavakoso. Au sega ni bau vakila e liu na loloma kei na veikauaitaki era vakaraitaka vei au. Oti e vica na vula, au sa biuta na wainimategaga qai “tokara na tamata vou,” me rawa ni vakadonui au na Kalou. (Efeso 4:​24) Au papitaiso sara meu iVakadinadina i Jiova ena 1985.

 E veisautaka noqu bula na iVolatabu. E sereki au mai na ivakarau ni bula a vakaleqa tu noqu bula kei na kequ irogorogo. E sivia e 30 na noqu ilala e liu era mate ena AIDS, kei na so tale na mate e vu mai na vakayagataki ni wainimategaga. Au kalougata niu sega ni sotava na veika vakaloloma qori niu sa muria na ivakavuvuli vakaivolatabu.

 Au sa sega tale ni dau kauta na isele kei na matau a tiki tu ni noqu ivakarau ni bula voravora e liu. Au sega vakadua ni tadra niu na kauta na iVolatabu meu lai vukei ira kina eso tale. Keirau sa iVakadinadina i Jiova vakaveiwatini ena gauna qo, keirau veiqaravi tale ga vakatabakidua.

 Erau sega ni iVakadinadina i Jiova noqu itubutubu, ia dua na ka nodrau marau ni rau raica ni sa yaga noqu vulica na iVolatabu. E bau vosa mada ga ena vukudra na iVakadinadina i Jiova o tamaqu vei ira nona itokani vakacakacaka. E vakadinadinataka o Ta ni sa vinaka sara noqu bula ena vuku ni noqu lotu vou. E dau wewenigusui tinaqu meu a se vulica totolo ga na iVolatabu. Au duavata sara ga kei na ka e tukuna!

 Au liaca ena veika au sotava ni tawayaga na qarai ni marau ena wainimategaga kei na so tale na ka ca. Au sa qai vakila qo na marau dina niu wasea vei ira eso tale na ivakavuvuli ena Vosa ni Kalou. Ke sega na ivakavuvuli qori, de dua au sa mate makawa.