Au sucu e Uganda ena yasayasa o Gomba. Levu era tiko kina era dravudravua, na tauni keitou tiko kina e sega na livaliva, keitou vakayagataka ga na cina tabucagi ena bogi.

 Rau a vakaitikotiko na noqu itubutubu e Rwanda, rau mani toki sara i Uganda. Me vaka ni rau dauteitei, rau tei kofi kei na jaina. Na jaina qori dau qai caka kina e dua na mataqali gunu e vakatokai na waragi. Rau susu manumanu tale ga me vaka na toa, me, vuaka kei na bulumakau. Na itovo kei na ivakarau vakavanua au vakavulici kina, au vakadeitaka ni dodonu mera vakarorogo na yalewa vei watidra ena veigauna kece, mera kua tale ga ni tukuna na nodra rai.

 Niu yabaki 23 au toki i Rwanda, qori na vanua au tekivu curu kina e valenidanisi kei ira au tabavata. Na levu ni gauna au gole kina i danisi, e solia sara ga vei au na manidia e dua na kad me vakadonui noqu curu e valenidanisi. Au taleitaka tale ga meu sarava na iyaloyalo ni veivacu kei na itovo kaukaua. Na vanua au tiko kina kei na ka ni veivakamarautaki au sarava, e uqeti au vakalevu meu voravora qai daumateni.

 Ena 2000, au lai tiko vata sara kei na dua na yalewa na yacana o Skolastique Kabagwira, qai tolu na luvei keirau. Me vaka ga na ka au vakavulici kina niu se gone, au dau vinakata me cuva o Skolastique ni vakabula se kerea vei au e dua na ka. Au dau nanuma tale ga ni noqu na iyaya kece e tiko e lomanivale, me ratou vakayagataka ena sala ga au vinakata. Levu na gauna au dau gole ena bogi, lai mateni qai lesu mai vale rauta na 3 na kaloko ena mataka lailai. Au na mokulaki Skolastique ke berabera nona dolava vei au na katuba.

 Ena gauna ya, au supavaisa tu ena dua na kabani ni yadra, qai vinaka na kequ isau. E saga o Skolastique meu gole ina lotu Penitiko, e nanuma ni na rawa ni veisautaki au. Ia au sega ni via lako ina nona lotu. Tekivu meu lasaituba. Na levu ni noqu itovo kaukaua kei na ivalavala dukadukali, ratou biuti au kina noqu veitinani ratou lai tiko sara vei rau na itubutubu nei watiqu.

 E vukei au e dua neitou itokani qase ena ivakarau ni noqu bula. E kaya meu lesu tale vei Skolastique, e dodonu tale ga meu tiko vata ga kei ratou na luvequ. Ena 2005, au tinia noqu gunu, biuta na yalewa keirau lasa vata tu, au mani lesu vei Skolastique. Keirau vakamau ena 2006, ia se voravora tiko ga noqu itovo vei watiqu qai dauvakalolomataki koya.

 Ena 2008, e gole yani i vale o Joël e dua na iVakadinadina i Jiova, au mani vakarogoci koya. E vica vata na vula nodrau sikovi au tiko yani kei Bonaventure, e dua nona itokani rau vakabauta vata. Keitou dau veitalanoa vinaka sara ga ena iVolatabu. Na levu ni noqu via vakacala na ka rau tukuna, au mani tarogi vakalevu ena ka me baleta na ivola na Vakatakila. Kena ivakaraitaki, rau tukuna na “isoqosoqo levu” e vakamacalataki ena Vakatakila 7:9 era na bula e vuravura, ia e tukuni kina nira na “tucake tu ena mata ni idabedabe vakaturaga kei na mata ni Lami,” o Jisu Karisito. E sauma vakayalololoma o Joël na noqu taro ni wilika na Aisea 66:1, ni Kalou e vakatoka na vuravura qo me “itutuniyavana.” Koya gona, era duri tu na isoqosoqo levu ena mata ni itikotiko vakaturaga ni Kalou e vuravura. Au wilika tale ga ena Same 37:29, nira na bula tawamudu e vuravura o ira na yalododonu.

 Toso na gauna, au vakadonuya meu vulica na iVolatabu. E vakavulici keirau sara vakaveiwatini o Bonaventure. E uqeti au vakalevu na veika au vulica meu veisautaka noqu ivakarau ni bula, meu dau dokai watiqu tale ga. Sa sega tale niu tukuna vua me cuva ni vakabula, se vinakata vei au e dua na ka. Sa sega tale ga niu kaya ni noqu na iyaya kece e tu e lomanivale. Au tinia tale ga na sara iyaloyalo voravora. E dredre meu cakava na veisau kece qori, ia e vinakati dina kina na yalomalumalumu kei na lewa matau.

 Ena vica na yabaki sa oti, au kauti noqu ulumatua o Christian me lai tiko kei ratou na wekaqu e Uganda. Niu wilika oti na Vakarua 6:4-7 au qai liaca ni neirau itavi lesi vakalou vakaveiwatini, me keirau susugi ratou na gone okati kina nodratou vakavulici ena ivakavuvuli vakalou. Dua na ka na neitou marau vakaveitamani ni sa lesu tale mai vale na luvei keirau!

 Au vulica ni Kalou yalololoma o Jiova. Au vakabauta tale ga ni sa vosota noqu itovo kei na noqu ivakarau ni bula makawa. Au marau ni keirau sa vulica vata vakaveiwatini na iVolatabu. Keirau yalataka neirau bula vei Jiova, keirau mani papitaiso vata ena ika4 ni Tiseba, 2010. Ena gauna qo keirau sa dau veinuitaki, keirau bulataka tale ga na ivakavuvuli vakaivolatabu ena neirau vuvale. E marautaka vakalevu o watiqu ni oti ga noqu cakacaka au sa dau gole mai vale. E vakavinavinakataka tale ga noqu dau vosa vakayalovinaka qai dokai koya. Au tinia na gunu, sa sega tale ga ni voravora noqu itovo. Ena 2015, au lesi meu dua na qase ena ivavakoso keitou lewena. E lima na luvei keirau, tolu ratou sa papitaiso.

 Niu vuli iVolatabu kei ira na iVakadinadina i Jiova, au dau via vakadeitaka na dina ni ka au vulica tiko. Dua na ka noqu qoroya nodra sauma sara ga vakaivolatabu noqu taro. Keirau vakavinavinakataka vakaveiwatini ni o ira era kaya nira qarava na Kalou dina e dodonu mera muria nona ivakatagedegede, sega ni ka ga era vinakata. Dua na ka noqu vakavinavinakataki Jiova ni vakayarayarataki au mai, au sa lewena tale ga nona vuvale vakayalo. Niu railesu, au vakadeitaka ni veivuke ga ni Kalou e rawa kina vua e dua me veisautaka nona ivakarau ni bula me rawa ni marau kina na Kalou.