RA TAROGA NA ITABAGONE

Bulibuli se Bula Vakaidewadewa?—Wase 4: Au na Vakamacalataka Vakacava na ka Au Vakabauta me Baleta na Veika Buli?

SARAVA/ROGOCA

O tu suka na vakamacalataka e koronivuli na ka o vakabauta me baleta na veika buli. De dua e vulici ena ivolanivuli na bula vakaidewadewa, o rairai leqataka tale ga nira na vakalialiai iko na nomu qasenivuli kei ira na lewenikalasi. O na doudou vakacava ni vakamacalataka na ka o vakabauta me baleta na veika buli?

O rawa ni vakamacala!

O na rairai nanuma: ‘Au sega ni gone vuku, au sega ni rawa ni vakamacala kina ena veika vakasaenisi kei na bula vakaidewadewa.’ Qori na ka a nanuma o Danielle ena dua na gauna, e kaya: “E dredre dina meu vakamacala, niu kila ena saqati kina na ka e vakabauta o noqu qasenivuli kei ira na lewenikalasi.” E va tale ga qori nona rai e dua na goneyalewa o Diana, e kaya: “Au dau veilecayaki nira veiba ra qai vakayagataka na vosa vakasaenisi.”

Ia e sega ni nomu inaki mo wini ena veiba. E sega tale ga ni gadrevi mo kila vinaka na veika vakasaenisi mo rawa ni vakamacalataka na vuna o vakabauta kina ni buli na veika e tu e vuravura.

Vakatutu: Vakayagataka na ivakamacala rawarawa ena Iperiu 3:4: “E macala . . . ni tiko o koya e tara na vale yadua, ia o koya e tara na ka kece ga na Kalou.”

E vakamacalataka va qo e dua na goneyalewa o Carol na ivakavuvuli ena Iperiu 3:4: “Kaya mada o taubale tiko ena loma ni veikauloa. E vica vata na maile na yawa ni vanua o na qai sotava kina e dua na tamata. Ni o rai sobu, o raica sara ni lutu toka ena qele e dua na ileunibati (toothpick). Na cava ena lako mai na nomu vakasama? Era na kaya e levu, ‘E dua sa lesu oti eke.’ E ka lailai ga na ileunibati qai rairai nanumi ni sega ni yaga, ia e laurai kina nona vuku o koya e bulia. Sa qai wacava sara na lomalagi, vuravura kei na kece e tu kina!”

Ke kaya e dua: “Ke buli na ka kece, o cei ga e buli koya a bulia na ka kece?”

O rawa ni kaya: “Ke da sega ni kila na ka kece me baleta na Dauveibuli, sega ni kena ibalebale qori ni sega ni bula tiko o koya. Vakasamataka mada, o na rairai sega ni kila na kena itukutuku kece o koya a bulia na nomu mobail, ia o vakabauta ni dua a bulia se vakacava? [Waraka me sauma.] E levu sara na ka meda vulica me baleta na Dauveibuli. Ke o taleitaka, au rawa ni vakamacalataka vei iko na veika au sa vulica me baleti koya.”

Vakavakarau

E kaya na iVolatabu: “Vakarau tu ena gauna kece moni vakamacalataka nomuni inuinui vei ira kece era taroga, moni vakayacora qo ena yalomalua kei na veidokai dina.” (1 Pita 3:15) E rua na ka mo vakasamataka vinaka, na ka o kaya kei na ivakarau ni nomu vosa.

Ka o kaya. E bibi na nomu lomana na Kalou ni na uqeti iko mo vakamacala. Ia ke o via vakadinadinataka ni bulia na ka kece na Kalou, e sega ni veirauti mo vakamacalataka ga na levu ni nomu lomana na Kalou. E vinaka mo vakamacalataka eso na ivakaraitaki ni veika bula, me yavutaki vinaka kina nomu kaya ni dua e bulia na ka kece.
Yalodei ni o vakamacala, kua ga ni veibeci. Era na yalorawarawa eso tale mera rogoci iko ke o doka na ka era vakabauta, o sega ni togoraka vei ira na ka o vakabauta.

“Au vakabauta ni bibi meda qarauna noda ivakarau ni vosa, me kua ni nanumi nida veibeci se nida kila kece na ka. Noda itautau tale ga ni vosa me kua ni nanumi kina nida uasivi ira eso tale.”—Elaine.

iVukevuke ni ivakamacala

Nomu vakavakarau mo vakamacalataka na ka o vakabauta e vaka ga nomu vakavakarau ina draki ca

“E kaya e dua na itabagone o Alicia: “Ke da sega ni vakavakarau, eda sa na galu tu ga de da qai vakamadualaki.” E vakadinata o Alicia ni bibi na vakavakarau vinaka. E kaya e dua tale na goneyalewa o Jenna: “Au doudou ni vakamacalataka na veika buli keu sa vakarautaka tu e dua na ivakaraitaki totoka qai rawarawa ga me tokona noqu ivakamacala.”

WO na raica e vei na ivakaraitaki va qori? Era vakadinadinataka e levu na itabagone ni yaga nodra vakayagataka na ivukevuke qo:

Was Life Created?
The Origin of Life—Five Questions Worth Asking
The Wonders of Creation Reveal God’s Glory (vidio)
Na ulutaga “Bula Vakaidewadewa se Buli?” ena mekesini na Yadra! (Taipataka na ulutaga [wili kina na komalili] “Bula Vakaidewadewa se Buli” ena kato e vakarautaki me vaqarai kina na ulutaga ena LAIBRI ENA INTERNET.)
Vakayagataka na LAIBRI ENA INTERNET mo vakekeli kina.

E vinaka mo railesuva tale ga na ulutaga “Bulibuli se Bula Vakaidewadewa?”

Vakatutu: Vakayagataka na ivakaraitaki e vakadeitaki kina na ka o vakabauta. Ena rawarawa nomu nanuma na ivakaraitaki qori, o na yalodei tale ga ni vakamacalataka. Vakatovotovotaka na sala o na vakamacalataka kina na ka o vakabauta.