Ena ulutaga qo

•  Vuna mo veiraimata ni o veivosaki kei na dua

•  O na tekivuna vakacava na veivosaki?

•  Ka era kaya nomu icaba

 Eso era kaya ni dredre qai dau curuoso na vakasama nida veiraimata qai veitalanoa kei na dua, ni vakatauvatani kei na text ena talevoni.

 “O na qaqarauni vakalevu ni o veitalanoa kei na dua, baleta o na sega ni rawa ni vakalesuya mai se veisautaka na ka o tukuna.”—Anna.

 “Ni o text e vaka sa katoni rawa tu na ka mo tukuna, ia na veitalanoa e vaka ga ni saravi tiko e dua na ka e yaco tiko ena gauna ya. Niu vosa gona vua e dua au na qarauna me kua ni cala na ka au tukuna!’ ”—Jean.

 Toso na gauna, ena vinakati mo kila na sala mo veitalanoa kina kei na dua. Kena ivakaraitaki, ena yaga vakalevu qori ni o qara eso nomu itokani, kunea e dua nomu cakacaka qai dei kina, se mo veivosaki se veidomoni ni o sa yalomatua.

 Ia e sega ni vinakati mo rere ni o veiraimata qai veivosaki. Ke o dau mamadua mada ga, o rawa ni vulica na iwalewale mo maqosa kina.

 “Eso na gauna eda dau cavuta cala eso na vosa da qai maduataka. Kua ni kauaitaka vakabibi qori.”—Neal.

•   Mo dau taro. Vakasamataka e dua na ulutaga era na taleitaka e levu, qai saga mo tekivuna kina na veivosaki. Kena ivakaraitaki:

   “O bau gade ena dua na vanua?”

   “Totoka sara ga na website qo, iko sa raica oti?”

   “O sa rogoca na . . . ?”

   Me rawa ni matata na veivosaki, vakasamataka e dua na ka drau tautauvata kina. Kena ivakaraitaki, vakacava e tautauvata nomudrau koronivuli se vanua ni cakacaka? Rawa ni o vakayagataka sara ga qori mo tekivuna kina na veivosaki.

   “Vakasamataka eso na taro o kauai kina qai via rogoca tale ga na kena isau mai vei ira o veivosaki kina.”—Maritza.

   Qarauna: Mo kua ni vaka e dua na dauveivaqaqai, se tarogi koya ena levu na taro. Mo kua tale ga ni siova sara na veika me baleti koya. Kena ivakaraitaki, qo eso na taro ena rawa ni madua tale kina, “Cava o dau leqataka vakalevu?” se “Cava o dau dara tu ga kina na roka karakarawa?” Na ikarua ni taro e vaka ga o vakalewai koya tiko!

   Mo kua tale ga ni vaka na dauveivaqaqai ke sa sauma oti na nomu taro, se bera nona sauma. Ia mo tukuna ga vua na nomu rai kei na ka o nanuma ena taro. Saga mo drau veitalanoa, kua ni taro vakalevu.

   iVakavuvuli vakaivolatabu: “Na nanuma ni tamata e vaka na wai titobu, ia o koya e yalomatua ena takiva mai.”—Vosa Vakaibalebale 20:5, Good News Bible.

•   Mo dau vakarorogo vinaka. Me rawa ni o marautaka na veitalanoa, e vinaka mo dau vakarorogo vinaka mai na nomu sa vosa tu ga.

   “Au dau saga meu vulica e dua na ka vou vua keirau veitalanoa tiko. Oti au na vakasamataka na ka e tukuna, kei na taro meu taroga vua ena neirau veitalanoa tarava.”—Tamara.

   Qarauna: Kua ni leqataka na ka mo tukuna tarava. Ke o vakarorogo vinaka, o na rawa ni kila na ka mo tukuna me tomani tiko ga na veitalanoa.

   iVakavuvuli vakaivolatabu: “Totolo ni vakarorogo. .  .berabera ni vosa”—Jemesa 1:19.

•    Mo veikauaitaki dina. O na marautaka vakalevu na veitalanoa kei na dua tale ke o kauaitaki koya dina.

   “Ni o kauaitaka dina na ka e tukuna o koya e vosa tiko vei iko, o na marautaka vakalevu veitalia mada ga ke sakasaka na ka e tukuna.”—Marie.

   Qarauna: Mo kua ni tarogi koya sara vakamatailalai, me vaka “Rairai vinaka sara ga nomu kote. E vica na kena isau?” Qori e rawa ni veivakamaduataki tale!

   iVakavuvuli vakaivolatabu: ‘Kua ni kauaitaka ga na ka e baleti kemuni, ni kauaitaka tale ga na ka e baleti ira tale eso.’—Filipai 2:4.

 O na tinia vakacava nomudrau veitalanoa? E kaya e dua na cauravou o Jordan: “Saga me veiuqeti na itinitini ni nomudrau veitalanoa. Kena ivakaraitaki, rawa ni o tukuna, ‘Au marautaka nodaru veitalanoa’ se ‘Vakanuinui vinaka na siga nikua.’ Na vosa va qori ena vakarawarawataka nomudrau veitalanoa ena gauna drau sota tale kina.”