E tukuni ena iVolatabu ni sega ni vakawati o Jisu, e sega tale ga ni tukuna vakamatata qori. a Wilika mada na ivakaraitaki qo.

1.   E vakamacalataki wasoma ena iVolatabu na vuvale i Jisu, o ira na yalewa era tomani koya ena cakacaka vakavunau, kei ira na tiko ena gauna a vakamatei kina, ia e sega vakadua ni tukuni watina. (Maciu 12:46, 47; Marika 3:31, 32; 15:40; Luke 8:2, 3, 19, 20; Joni 19:25) Na vuna e rairai va kina qori ni a sega ga ni vakawati o Jisu.

2.   A kaya o Jisu vei ratou nona tisaipeli me baleti ira na sega ni vakawati mera vakalevutaka nodra veiqaravi: “Vei ira era rawata qo, mera cakava sara.” (Maciu 19:10-12) E ivakaraitaki vinaka o Jisu vei ira na digia mera kua ni vakawati mera veiqaravi kina vakatabakidua.—Joni 13:15; 1 Korinica 7:32-38.

3.   Ni bera ni mate o Jisu, a tuvanaka rawa tu na nona qaravi o tinana. (Joni 19:25-27) Ke a vakawati se vakaluveni, ke a tataunaki ratou tale ga.

4.   E tukuna na iVolatabu mera muria na tagane vakawati na ivakaraitaki i Jisu, ia e sega ni volai kina ni a vakawati. E kaya ga: “Kemuni na tagane vakawati, ni lomani ira tiko ga na watimuni me vaka ga nona lomana na ivavakoso na Karisito qai solia kina nona bula.” (Efeso 5:25) Ke a vakawati o Jisu e vuravura, ena volai ena tikinivolatabu qori ni a dua na tagane vakawati ivakaraitaki vinaka.

 Io e ono na tacina, o Jemesa, Josefa, Saimoni, Jutasa kei na rua na ganena. (Maciu 13:54-56; Marika 6:3) Eratou luvei Meri kei Josefa. (Maciu 1:25) E vakatokai Jisu na iVolatabu me “ulumatua” i Meri, e dusia ni so tale na tacina.—Luke 2:7.

 Era tukuna eso ni duatani na ibalebale ni vosa ‘tacina,’ nira tokona na ivakavuvuli ni a goneyalewa tu ga o Meri. Kena ivakaraitaki, era nanuma eso ni ratou luvei Josefa mai liu o ratou na taci Jisu. Ia e tukuna iVolatabu ni soli vei Jisu na dodonu ni veiliutaki a yalataki vei Tevita. (2 Samuela 7:12, 13; Luke 1:32) Ke a so na luvei Josefa mai liu, ena soli na dodonu ni veiliutaki vua na nona ulumatua, ena sega ni soli vei Jisu.

 Vakacava, e dusi ratou na tisaipeli i Jisu se o ira na tacina vakayalo na vosa qori? Ena veicalati kei na ka e tukuni ena iVolatabu ni dua na gauna “eratou sega ni vakaraitaka na tacina ni ratou vakabauti koya.” (Joni 7:5) E volai ena iVolatabu ni ratou duidui na taci Jisu kei ratou na nona tisaipeli.—Joni 2:12.

 E dua tale na itukutuku lasu oya ni ratou veitatacini ga o Jisu, kei ratou na tacina. Ia na iVolatabu vaKirisi e dau vakaduiduitaka na vosa ‘tacina,’ kei na ‘wekana.’ (Luke 21:16; Kolosa 4:10) Era vakadinadinataka e levu na vuku ni iVolatabu ni ratou taci Jisu dina. Kena ivakaraitaki, e tukuni ena ivola The Expositor’s Bible Commentary: “Ena kilai na ibalebale ni vosa ‘tacina’ .  .  . ni ratou luvei Meri kei Josefa ni ratou veitacini kei Jisu ni dua ga na tinadratou.” b