E sega ni dau vakaibalebale tu na fika ena iVolatabu, ia ena so na gauna e vakayagataki me ivakatakilakila. Na tikina wavolita ena vakaraitaka ke veiganiti me vakayagataki na fika me ivakatakilakila se sega. Dikeva mada na ibalebale ni fika ena iVolatabu:

•   1 Duavata. Kena ivakaraitaki a masulaka o Jisu me ratou “duavata” na nona imuri ‘me vaka ga na nona duavata o koya kei Tamana.’​—Joni 17:21; Maciu 19:6.

•   2 E rua e rau soli ivakadinadina ena veilewai. (Vakarua 17:6) Na tokaruataki ni raivotu se itukutuku e vakadeitaka ni dina. Kena ivakaraitaki, ni vakamacalataka o Josefa na nona tadra na Fero ni Ijipita, e kaya: ‘Na soli vakarua ni tadra vei Fero e kena ibalebale ni sa vakataudeitaka na ka qori na Kalou dina.’ (Vakatekivu 41:32) Na parofisai ni ‘rua na ileu,’ e rawa ni vakaibalebaletaka e rua na veiliutaki me vaka ga a cavuta na parofita o Taniela me baleta na Matanitu o Mitia kei Perisia.​—Taniela 8:20, 21; Vakatakila 13:11.

•   3 Me vaka ga na kena vakadeitaki e dua na itukutuku ena tolu na ivakadinadina, na kena cavuti tale ga vakatolu e dua na ka e dusia ni vakabibitaki se sa vakadeitaki.​—Isikeli 21:27; Cakacaka 10:9-16; Vakatakila 4:8; 8:13.

•   4 E rawa ni vakaibalebaletaka na vakayacori taucoko ni dua na inaki. Kena ivakaraitaki na “va na cagi kei vuravura” e vakaibalebaletaka na veivakarusai ena yasana vava, oya ena yasana kece, ena roboti vuravura taucoko.​—Vakatakila 7:1; 21:16; Aisea 11:12.

•   6 Na vitu e vakaibalebaletaka na taucoko, ia na ono e dusia e dua na ka e sega ni taucoko se veimecaki kei na Kalou.​—1 Veigauna 20:6; Taniela 3:1; Vakatakila 13:18.

•   7 Na naba qo e vakaibalebaletaka e dua na ka e taucoko. Kena ivakaraitaki e vakaroti ira na Isireli na Kalou mera wavokiti Jeriko me vitu na siga qai vakavitu ena ikavitu ni siga. (Josua 6:15) E tu ena iVolatabu e levu na ivakaraitaki ni kena vakayagataki na naba vitu. (Vunau ni Soro 4:6; 25:8; 26:18; Same 119:164; Vakatakila 1:20; 13:1; 17:10) Ni tukuna o Jisu vei Pita me kua ni vosoti tacina “vakavitu, ia me vaka77” e kena ibalebale me “kua ni vakaiyalayala.”​—Maciu 18:21, 22.

•   10 Qo e rawa ni vakaibalebaletaka na taucoko ni dua na ka se na kena isoqoni kece.​—Lako Yani 34:28; Luke 19:13; Vakatakila 2:10.

•   12 Qo e dau vakaibalebaletaka na ituvatuva e yavutaki sara ga vakalou. Kena ivakaraitaki, e tiki ni raivotu i Joni me baleti lomalagi na koro e ‘12 na vatu na kena yavu, e volai kina na yacadratou na 12 na yapositolo.’ (Vakatakila 21:14; Vakatekivu 49:28) E rawa ni va tale ga qori na kena ibalebale ni vakavicataki na 12.​—Vakatakila 4:4; 7:4-8.

•   40 Na dede ni gauna ni vakataulewa se itotogi e dau semati vakalevu kei na naba 40.​—Vakatekivu 7:4; Isikeli 29:11, 12.

Vulici ni fika

 Na ibalebale ni fika ena iVolatabu e duidui mai na kena e vulici. E okati ena vulici ni fika na vakatevoro me kilai kina na ibalebale ni naba, na kedra veisemati, kei na kedra isoqoni. Kena ivakaraitaki, era dikeva vakamatailalai na iVolatabu vakaIperiu o ira na kenadau ena ka vakaJiu mera raica na kedra veisemati ni vakayagataka e dua na kena iwalewale e vakatokai na gematria. Qori na qarai ni ituvatuva ni naba ni laurai na matanivola kei na naba e veidonui kaya. Na vulici ni fika va qori e okati me vakatevoro, na valavala e cata na Kalou.​—Vakarua 18:10-12.