Na imatai ni tamata me rau ivalavala ca o Atama kei Ivi. Rau talaidredre vua na Kalou ni rau kana “mai na vunikau e kilai kina na ka vinaka kei na ka ca.” Na ka rau cakava qori era vakatoka kina e levu me ivalavala ca taumada. a (Vakatekivu 2:16, 17; 3:6; Roma 5:19) A sega ni dodonu me rau kana mai na vunikau vakatabui, ni vakavotui kina na lewa se dodonu ni Kalou me vakatulewataka na ka e donu se cala vua na tamata. Ia nodrau kana mai na vunikau qori, rau sa via vakatulewataka vakataki rau na ka e donu se sega. Rau beca tale ga kina na dodonu ni nona veiliutaki na Kalou.

•  Cava e yacovi rau o Atama kei Ivi ena vuku ni “ivalavala ca taumada”?

•  Cava e yacovi keda ena vuku ni “ivalavala ca taumada”?

•  Eda rawa ni galala ena revurevu ni “ivalavala ca taumada”?

•  Raicala me baleta na “ivalavala ca taumada”

 Ni rau valavala ca o Atama kei Ivi qori e vakavuna me rau qase, rau tini mate tale ga. Rau sa sega ni qai veitokani kei na Kalou, rau sega tale ga ni rawata na bula uasivi e tawamudu.—Vakatekivu 3:19.

 Rau vakadewa tale ga vei keda o Atama kei Ivi na ivalavala ca. E tautauvata ga kei na nodra vakadewa na itubutubu eso na kedra mate vei ira na luvedra. (Roma 5:12) Oya na vuna eda sucu “ivalavala ca” b kece na kawatamata. Kena ibalebale na gauna eda sucu kina eda sa sega ni uasivi, e rawarawa tale ga noda vakamuai meda caka ca.—Same 51:5; Efeso 2:3.

 Nida kawa ivalavala ca, oya na vuna eda tauvimate kina, qase, da tini sara ena mate. (Roma 6:23) Eda na vakila tale ga na ca ni ka eda cakava, kei na revurevu ni veika ca era cakava eso tale.—Dauvunau 8:9; Jemesa 3:2.

 Io. E kaya na iVolatabu ni o Jisu e mate me “isoro ni noda ivalavala ca meda veiyaloni kina kei koya.” (1 Joni 4:10) Na isoro i Jisu e sereki keda mai na ivalavala ca, eda rawa tale ga kina ni bula uasivi me tawamudu. Qori na ka rau sega ni rawata o Atama kei Ivi.—Joni 3:16. c

 Raicala: Na ivalavala ca taumada eda yawaka kina na Kalou.

 Ka dina: E sega ni beitaki keda na Kalou ena ka rau cakava o Atama kei Ivi. E kila nida sega ni uasivi, e sega tale ga ni namaka vakasivia vei keda na ka meda cakava. (Same 103:14) Nida kawa ivalavala ca eda dau sotava na veika rarawa, ia se rawa tiko ga nida veitokani voleka kei na Kalou.—Vosa Vakaibalebale 3:32.

 Raicala: Na papitaiso ena sereki kina e dua mai na ivalavala ca taumada. E vinakati gona mera papitaiso na gonelalai.

 Ka dina: E bibi na papitaiso meda rawata kina na bula, ia na noda vakabauti Jisu ena vakasavasavataki keda mai na ivalavala ca. (1 Pita 3:21; 1 Joni 1:7) Na vakabauta dina e dodonu me yavutaki ena kilaka, qori na ka era lekata na gonedramidrami. Koya gona, na iVolatabu e sega ni tokona nodra papitaisotaki na gonedramidrami. E laurai qori ena ka era cakava na lotu vaKarisito taumada. Era sega ni papitaisotaki ira na gonelalai, ia o ira ga na “tagane kei na yalewa” era vakabauta na Vosa ni Kalou. Cakacaka 2:41; 8:12.

 Raicala: Nona kania e liu o Ivi na vuanikau vakatabui, ya na vuna e cudruvi ira kina na yalewa na Kalou.

 Ka dina: A sega ni cudruvi ira na yalewa na Kalou, ia e cudruva ga na “na gata makawa e vakatokai na Tevoro se o Setani,” ni uqeti Ivi me valavala ca. (Vakatakila 12:9; Vakatekivu 3:14) E kaya tale ga na Kalou ni o Atama e vakavuna na ivalavala ca, sega ni o Ivi.—Roma 5:12.

 Na cava e kaya kina na Kalou ni na lewai watina o Atama? (Vakatekivu 3:16) Nona cavuta na vosa qori na Kalou e sega ni kena ibalebale ni tokona na ivalavala qori. E tukuna tiko ga na veika vakaloloma ena sotavi ena vuku ni ivalavala ca. E namaka na Kalou me lomana qai doka na watina o tagane, me dau rokovi ira tale ga na yalewa.—Efeso 5:25; 1 Pita 3:7.

 Raicala: E ivalavala ca taumada na veiyacovi.

 Ka dina: E sega ni ivalavala ca taumada na veiyacovi, ena vuku ni veika qo:

•   Gauna se tu duadua kina o Atama, a vakaroti koya na Kalou me kua ni kana mai na vunikau e kilai kina na ka vinaka kei na ka ca.—Vakatekivu 2:17, 18.

•   A vakaroti rau o Atama kei Ivi na Kalou me rau “vakawa, mera le levu” na luvedrau. (Vakatekivu 1:28) E ka vakalialia me totogitaki rau tale na Kalou ena ka e vakaroti rau kina me rau cakava.

•   Rau sega ni valavala ca vata ga ena dua na gauna o Atama kei Ivi, a valavala ca e liu o Ivi, qai muri koya o watina.—Vakatekivu 3:6.

•   E vakadonuya na iVolatabu nodra veiyacovi na veiwatini.—Vosa Vakaibalebale 5:18, 19; 1 Korinica 7:3.