Cava na iBalebale ni iVola na Vakatakila?
Kena isau vakaivolatabu
Na yaca vaKirisi ni ivola na Vakatakila na A·po·kaʹly·psis (apocalypse). E kena ibalebale “Vakavotuya” se “Vakaraitaka.” Na yaca qori e dusia na ibalebale ni ivola na Vakatakila, oya ni vakavotuya na itukutuku vuni, e vakaraitaka tale ga na ibalebale ni ka sa tukuni oti mai. Levu na parofisai e tu kina se bera ni vakayacori.
iVakamacala lekaleka ni ivola na Vakatakila
iKau.—Vakatakila 1:1-9.
Ka e tukuna o Jisu ina vitu na ivavakoso.—Vakatakila 1:10–3:22.
Raivotutaki na Kalou ena nona idabedabe vakaturaga mai lomalagi.—Vakatakila 4:1-11.
Veitaravi ni raivotu:
Vitu na drega.—Vakatakila 5:1–8:6.
Vitu na biukila, na iotioti ni tolu na biukila e dusia e tolu na ka rarawa.—Vakatakila 8:7–14:20.
Vitu na boulu, qo na kuita e dusia na lewa ni Kalou ena tau e vuravura.—Vakatakila 15:1–16:21.
Raivotutaki nodra vakarusai na meca ni Kalou.—Vakatakila 17:1–20:10.
Raivotutaki na veivakalougatataki ni Kalou e lomalagi kei vuravura.—Vakatakila 20:11–22:5.
iTinitini.—Vakatakila 22:6-21.
Ka me nanumi me baleta na ivola na Vakatakila
Era sega ni domobulataka na dauveiqaravi ni Kalou na ka e tukuni ena ivola na Vakatakila. Baleta na ka e vakamacalataki kina e vakaibalebaletaka na veika vinaka. Levu era nanuma ni vosa na “apocalypse” e dusia e dua na ka rerevaki. Ia e tukuni ena itekitekivu kei na itinitini ni Vakatakila, nira na marau o ira na wilika, era kila na kena ibalebale, ra qai muria.—Vakatakila 1:3; 22:7.
E volai ena Vakatakila e levu na “ivakatakilakila” e tu na kedra ibalebale.—Vakatakila 1:1.
Sa tukuni makawa tu ena iVolatabu na ivakatakilakila kei na yacadra era cavuti ena Vakatakila:
Jiova—‘na Kalou dina e lomalagi,’ e bulia tale ga na ka kece.—Vakarua 4:39; Same 103:19; Vakatakila 4:11; 15:3.
Jisu Karisito—“na Lami ni Kalou.”—Joni 1:29; Vakatakila 5:6; 14:1.
Setani na Tevoro—meca ni Kalou.—Vakatekivu 3:14, 15; Joni 8:44; Vakatakila 12:9.
Papiloni na Ka Levu—e meca ni Kalou o Jiova kei ira na nona tamata, e vakavulica tale ga na ivakavuvuli lasu me vakataki Papiloni (Pepeli).—Vakatekivu 11:2-9; Aisea 13:1, 11; Vakatakila 17:4-6; 18:4, 20.
“Na wasawasa”—o ira na saqata na Kalou.—Aisea 57:20; Vakatakila 13:1; 21:1.
Ka e tautauvata kei na iyaya ni valeniveitavaki e dau vakayagataki ena sokalou—e okati kina na kato ni veiyalayalati, na wasawasa iloilo (beseni ni sasavui), cina, isoro boivinaka, kei na icabocabonisoro.—Lako Yani 25:10, 17, 18; 40:24-32; Vakatakila 4:5, 6; 5:8; 8:3; 11:19.
Manumanu kila—e dusia na matanitu vakatamata.—Taniela 7:1-8, 17-26; Vakatakila 13:2, 11; 17:3.
Naba e vakaibalebale.—Vakatakila 1:20; 8:13; 13:18; 21:16.
Na raivotu ena Vakatakila e dusia na “siga ni Turaga,” e tekivu ena 1914 ni tauyavu na Matanitu ni Kalou e kena Tui o Jisu. (Vakatakila 1:10) Eda namaka gona me vakayacori ena noda gauna na parofisai bibi duadua ena Vakatakila.
Nida saga meda kila na ibalebale ni Vakatakila e vaka ga na noda saga meda kila na vo ni iVolatabu, e vinakati kina na vuku e solia na Kalou kei na nodra veivuke o ira era sa kila na kena ibalebale.—Cakacaka 8:26-39; Jemesa 1:5.