Levu e tukuni vei ira ni sega ni vakadeitaki o cei e vola na iVolatabu. Ia e tukuna vakadodonu na iVolatabu na yaca i koya e vola e dua na ivola. Eso na vanua ena iVolatabu e tekivu ena malanivosa, na “vosa i Niemaia,” “na raivotu e raica o Aisea,” kei “na vosa e tukuna o Jiova vei Joeli.”—Niemaia 1:1; Aisea 1:1; Joeli 1:1.

 Era tukuna vakadodonu e levu na dauvola iVolatabu nira volavola ena yaca i Jiova, na Kalou dina duaduaga, ra qai dusimaki mai vua. O ira na parofita era vola na iVolatabu vakaIperiu era tukuna vaka300 vakacaca na vosa: “Qo na ka e tukuna o Jiova.” (Emosi 1:3; Maika 2:3; Neumi 1:12) Eso tale na dauvola iVolatabu e vakasavuya vei ira na itukutuku o ira na agilosi.—Sakaraia 1:7, 9.

 Era vola na iVolatabu e rauta ni 40 na tagane ena loma ni 1,600 na yabaki. Eso era vola e vica vata na ivola ena iVolatabu. Na iVolatabu e vaka e dua na laibri lailai e tiko kina e 66 na ivola. E tiko ena iVolatabu vakaIperiu e 39 na ivola, e kilai levu me Veiyalayalati Makawa. Na vo ni 27 na ivola e tiko ena iVolatabu vaKirisi, e kilai levu tale ga me Veiyalayalati Vou.