E laurai ena ituvatuva ni gauna ena iVolatabu ni tauyavu na Matanitu ni Kalou e lomalagi ena 1914. Eda kila qori ena parofisai e volai ena Taniela wase 4.

 Ka e tukuni ena parofisai. E vakavuna na Kalou me tadra o Tui Nepukanesa e Papiloni na lauta ni vunikau levu. E tarovi me tubu na vuna, e qai tubu tale ni oti e “vitu na gauna.”​—Taniela 4:​1, 10-​16.

 Na vakayacori taumada ni parofisai. E dusi Tui Nepukanesa na vunikau levu. (Taniela 4:​20-​22) E vaka ga e ‘lauta’ vakaivakatakarakara ena gauna e lialia kina, qai muduki nona veiliutaki me vitu na yabaki. (Taniela 4:​25) E vakavuna na Kalou me kilai yalona tale, e vinaka na kena ituvaki mani tekivu veiliutaki tale. E kila tale ga o Nepukanesa ni cecere duadua ga nona veiliutaki na Kalou.​—Taniela 4:​34-​36.

 iVakadinadina ni rabailevu na vakayacori ni parofisai. Na inaki bibi ni parofisai qori “mera kila kina na bula tiko ni lewa na matanitu ni tamata o koya e Cecere Duadua, e solia vei koya e vinakata, e lesia tale ga vei koya e lailai sara vei ira na tamata.” (Taniela 4:​17) Vakacava e vinakata na Kalou me solia vua na tui dokadoka o Nepukanesa na veiliutaki? Sega, ni a vakavuna tale ga na Kalou me tadra e dua na parofisai, ya ni na sega ni soli vua se dua tale na iliuliu vakapolitiki na itavi qori. Ia “ena vakarautaka” ga na Kalou “e dua na matanitu ena sega sara ni vakarusai.”​—Taniela 2:​31-​44.

 E liu e tauyavutaka na Kalou na matanitu makawa o Isireli mera matataka nona veiliutaki e vuravura. E vakatara na Kalou me “vakarusai” nira sa tawayalodina o ira na veiliutaki kina. Ia e parofisaitaka ni na solia na veiliutaki vei “koya e dodonu me nona.” (Isikeli 21:25-​27) E kaya na iVolatabu ni o Jisu Karisito e dodonu me nona na veiliutaki. (Luke 1:​30-​33) E sega ni vakai Nepukanesa o Jisu, e dau “yalomalumalumu” me vaka ga e parofisaitaki.​—Maciu 11:29.

 Cava e vakatayaloyalotaka na vunikau ena Taniela wase 4? Ena iVolatabu, eso na gauna e vakaibalebaletaki na vunikau ina veiliutaki. (Isikeli 17:22-​24; 31:​2-5) Na vunikau levu e dusia na veiliutaki ni Kalou, e vakayacori kina na parofisai ena Taniela wase 4.

 Cava na ibalebale ni kena lauta na vunikau? E vakaibalebaletaki tu ena kena muduki nona veiliutaki o Nepukanesa, e dusia tale ga na kena muduki na veiliutaki ni Kalou e vuravura. A yaco qori ena nona vakarusai Jerusalemi o Nepukanesa, na vanua era veiliutaki kina na tui Isireli ena “idabedabe vakaturaga i Jiova,” mera matataka na Kalou.​—1 Veigauna 29:23.

 Cava e dusia na “vitu na gauna”? Na “vitu na gauna” e dusia na gauna e vakatara kina na Kalou kei na nona matanitu mera veiliutaki na veimatanitu e vuravura. E laurai ena ituvatuva ni gauna ena iVolatabu ni tekivu na “vitu na gauna” ena Okotova 607 B.G.V., a vakarusai tale ga kina o Jerusalemi vei ira na kai Papiloni. a​—2 Tui 25:​1, 8-​10.

 E vakacava na dede ni “vitu na gauna”? E sega ni rawa ni vitu na yabaki me vaka e yaco vei Nepukanesa. E sauma qori o Jisu ni kaya ni na ‘qai butuki Jerusalemi [vakatakarakarataka nona veiliutaki na Kalou] na veimatanitu, me yacova ni sa oti nodra gauna lokuci na veimatanitu.’ (Luke 21:24) “Nodra gauna lokuci na veimatanitu,” e dusia na gauna e vakatara kina na Kalou me “butuki” nona veiliutaki mai vei ira na “veimatanitu.” E tautauvata sara ga kei na “vitu na gauna” e tukuni ena Taniela wase 4. Kena ibalebale, nona bula e vuravura o Jisu e donuya na “vitu na gauna” qori.

 E vakarautaka na iVolatabu na sala meda cakacakataka kina na parofisai ni “vitu na gauna.” E kaya ni tolu veimama na gauna e tautauvata ni 1,260 na siga. Ni vakaruataki qori e tautauvata ni 2,520 na siga se “vitu na gauna.” (Vakatakila 12:​6, 14) Ni muri na kena cakacakataki na gauna vakaparofisai, oya “na dua na siga me dua na yabaki,” na 2,520 na siga e 2,520 na yabaki. E mai cava gona na “vitu na gauna” se 2,520 na yabaki, ena Okotova 1914.​—Tiko Voli Mai na Lekutu 14:34; Isikeli 4:6.