E tu ena iVolatabu na ivakasala vinaka ena yaga ena noda vakatulewa, ena vukei keda tale ga meda “rawata na vuku kei na yalomatua.” (Vosa Vakaibalebale 4:5) Ena so na ituvaki, e rawa ni dusimaki keda me donu noda vakatulewa. E vakarautaka tale ga na ivakasala meda vakatulewa vakavuku kina.

Ena ulutaga qo

•  Eso na vakatutu ena vukei iko mo vakatulewa vinaka

•  Meu veisautaka na vakatulewa au sa cakava oti?

•  Vakacava keu vakatulewa cala au qai sega ni rawa ni veisautaka?

•   Kua ni vakatulewa vakatotolo. E kaya na iVolatabu: “O koya e yalomatua e vakasamataka na nona ilakolako kece.” (Vosa Vakaibalebale 14:15) Ke o dau vakatulewa totolo, o na rairai sega ni vakasamataka eso na ka bibi. Me tiko gona na gauna mo vakasama vinaka kina ni bera ni o vakatulewa.—1 Cesalonaika 5:21.

•   Kua ni yavutaka nomu vakatulewa ena ka ga o vinakata se ivakarau ni lomamu. E vakasalataki keda na iVolatabu nida na sega ni rawa ni nuitaka tu ga na lomada. (Vosa Vakaibalebale 28:26; Jeremaia 17:9) Kena ivakaraitaki, ena sega ni vinaka na ka eda vakatulewataka ke da cudru tu, lomabibi, yalolailai, yalototolo se oca.—Vosa Vakaibalebale 24:10; 29:22.

•   Kerea na vuku. (Jemesa 1:5) E marautaka na Kalou me solia vei keda na vuku ke da kerea vua ena masu. E Tamada dauveikauaitaki, qai sega ni vinakata meda sotava na leqa. “O Jiova ga e solia na vuku e lako mai gusuna na kilaka kei na yalomatua.” a (Vosa Vakaibalebale 2:6) E vakarautaka na vuku qori ena nona Vosa, na iVolatabu.—2 Timoci 3:16, 17.

•   Vakekeli. Ena vinakati na itukutuku dina mo vakatulewa vinaka kina. E kaya na iVolatabu “na tamata vuku e vakarorogo ena vulica e levu na ka.” (Vosa Vakaibalebale 1:5) O na raica i vei na itukutuku yaga, e dina tale ga?

   Kena imatai, raica mada na ka e kaya na iVolatabu ena so na taro eda dau vakasamataka tu. E kila vinaka na Dauveibuli na ka e yaga vei keda, e tu gona ena nona Vosa na ivakasala nuitaki. (Same 25:12) E matata na ka e kaya na iVolatabu ena so na vakatulewa meda cakava, de dua ena biu mai me vaka na lawa se ivakaro. (Aisea 48:17, 18) Ena levu tale na ituvaki, e sega ni dau matata na ivakasala vakaivolatabu, ia e vakarautaka ga na kena ivakavuvuli. Qori e rawa ni vukei keda meda vakatulewa vinaka, ke mani duidui mada ga na noda vakatulewa mai vei ira eso tale. Mo rawa ni raica eso na tikinivolatabu veiganiti, ena vinakati mo vakekeli ena ivola se ulutaga vakaivolatabu me vaka era tu ena website qo. b

   Eso na vakatulewa o cakava ena vinakati mo dikeva eso tale na itukutuku nuitaki. Kena ivakaraitaki, ni bera ni o volia e dua na iyaya. Ena ka vakavuku mo kila vinaka na iyaya qori kei ira era bulia, vakabibi ke saulevu. Ena vinakati tale ga mo kila na ka mo cakava ke mani ca, se ke o via vakasuka lesu. Mo vakadeitaka tale ga ni o vinakata dina na iyaya qori.

   E kaya na iVolatabu: “E seva na ka e nanumi ni sega na veivosaki.” (Vosa Vakaibalebale 15:22) Ni bera gona ni o vakatulewa, kere ivakasala vei ira o nuitaka. Kena ivakaraitaki, ena ka vakavuku mo kere ivakasala vua e dua na vuniwai ena veiqaravi vakavuniwai me caka vei iko. (Maciu 9:12) Ena so na ituvaki, rawa ni o kerea nodra ivakasala o ira era sotava tale ga na ituvaki o sotava tiko. Dina ni o na kerea nodra ivakasala eso tale, ia mo nanuma tiko ni o na vakatulewataka ga na ka mo cakava. O na vakila ga kina na vinaka kei na ca ni nomu vakatulewa.—Kalatia 6:4, 5.

•   Vakalewa vinaka na ituvaki. Cakava e dua na lisi ni ka o rawa ni vakatulewataka, qai yavutaka ena itukutuku sa tiko rawa vei iko. Mo vola tale ga na ka vinaka se ca e rawa ni yaco ena vakatulewa yadua qori. Dikeva vinaka na itinitini ni ka ena yaco ena nomu vakatulewa (Vakarua 32:29) Kena ivakaraitaki, ena tarai iko vakacava, nomu vuvale kei ira eso tale nomu vakatulewa? (Vosa Vakaibalebale 22:3; Roma 14:19) Ni o sauma na taro qori qai vakasamataka vata kei na ivakavuvuli vakaivolatabu, ena vukei iko mo vakatulewa vakavuku, vakayalololoma tale ga.

•   Cakava na ka o vakatulewataka. E dau dredre meda vakatulewa ena so na gauna, vakabibi ke da sega ni vakadeitaka tu na ka meda cakava. Ia ke da lomalomarua tiko, eda na rawa ni calata eso na ka vinaka, se da lai cakava tu e dua na ka eda sega ni namaka. Ena dua tale na yasana, o na rawa sara ga ni vakatulewa cala ke o dau lomalomarua. E vaka ga e dua na vosa vakatautauvata ni teitei e tukuni ena iVolatabu: “O koya e vakaraica tiko na cagi ena sega ni kaburaka na sorenikau, kei koya e vakaraica tiko na o ena sega ni tatamusuki.”—Dauvunau 11:4, Good News Translation.

 Mo nanuma tiko ni na sega ni taucoko tu ga na vakatulewa vinaka eda cakava. Kena ivakaraitaki, ena rairai vinakati mo vakuai iko ena so na ka mo rawa ni vakatulewa vinaka kina. Eso tale ga na gauna ena yaco na ka tawanamaki. (Dauvunau 9:11) Mo vakayagataka gona na itukutuku nuitaki sa tiko rawa vei iko, qai digia na kena mo vakatulewa vinaka kina.

 E rawa ni veisautaki eso na vakatulewa o cakava. De dua ena veisau na kemu ituvaki, se o raica ni dua na ka o vakatulewataka ena gauna sa oti a sega ni tini vinaka. Ena ka vakavuku gona mo dikeva tale na kemu ituvaki, qai digia na vakatutu o na vakila kina na kena vinaka.

 Ia eso na vakatulewa ena sega ni vinakati me veisau. (Same 15:4) Kena ivakaraitaki, e vinakata na Kalou me rau dina na veiwatini ena nodrau vosa ni yalayala ni vakamau. c (Malakai 2:16; Maciu 19:6) Ke basika gona na leqa ena bula vakawati, e sega ni kena iwali na veisere. Ena vinakati ga me rau sasaga na veiwatini me rau walia.

 Eso na gauna ena cala noda vakatulewa. (Jemesa 3:2,) Eda na rairai rarawataka se veivutunitaka. (Same 69:5) Ia qori ena rawa ni vukei keda meda kua ni cakava tale na vakatulewa cala qori! (Vosa Vakaibalebale 14:9) E vakasalataki keda na iVolatabu meda qarauna na ora sivia ni lomada ni rawa ni vakaleqai keda. (2 Korinica 2:7) d E kaya na iVolatabu ni “o Jiova sa yalololoma qai dauveinanumi.” (Same 103:8-13) Mo vuli gona mai na nomu vakatulewa cala, qai cakava na ka o rawata mo vakavinakataka.