Era nanuma na saenitisi ni vakayagataka na manumanuvuka lailai qo e dua na mataqali kaukaua me domica mai yamena na wai kamica ni senikau. E vakatokai na iwalewale qori me capillary action. Ia wale tiko ga qo era sa qai kila ni manumanuvuka qori e vakayagataka e dua na iwalewale rawarawa e vakatokai na fluid trap me domica na wai, qai sega ni tasova se me drodro sobu tale.

 Vakasamataka mada: Ni tonia na delakulanivalagi na yamena ina wai kamica, ena qai tawase rua na yamena. E toka ena batibati ni yamena qori e dua na ka e vaka na irairai ni loma ni vaivo e sogo tu. Gauna ena domica kina na wai sa na qai tadola na loma ni vaivo qori, oti ena veimoiyaka na yamena me domica kina na wai, ena sega ni domica ga mai vakadodonu. Ni suka lesu na yamena, ena tasogo tale ni sa tu e loma na wai kamica.

 Eratou kaya na dauvakadidike o Alejandro Rico-Guevara, Tai-Hsi Fan, kei Margaret Rubega, na nona cakava tiko na delakulanivalagi na iwalewale qori “e lailai mai na tini na sekodi. Na yamena e vaka e dua na iyaya e dau domica na wai, ena totolo ga ni veisau ni curuma yani na wai qai domica.”

 E sega mada ga ni vinakati vua me vakayagataka e dua na kaukaua me cakava kina qori. Na tadola kei na sogo ni loma ni vaivo e yamena e vakaraitaka na igu e tu vua me curuma qai domica na wai.

 Sa bau vakasakiti dina na sala e domica kina na wai na yame ni delakulanivalagi. Era vakabauta gona na dauvakadidike ni rawa ni vakatotomuri na iwalewale qori ena caka ni wainimate, misini vakalivaliva (robotic), kei na so tale na tabana va qori. E rawa tale ga ni buli kina eso na iyaya me qua na wai, se waiwai e tasova.

 Cava o nanuma? E buli se bula vakaidewadewa na yame ni delakulanivalagi?