E tiko eso na ivakawele era na marautaka na luveda, ena uqeta na lomadra, era na vakayagataka tale ga nodra vakasama. Qori ena vukei ira mera yalomatua, qai vulica e levu na taledi.

 Kena ivakaraitaki na:

•   Droini

•   Vavavi

•   Vakatatalo

•   Lagasere

•   Vakayagataka na iyaya ni vakatatalo e rawarawa ga (me vaka na kateni)

 Levu na vanua era sa sega ni cakava na gone na veika va qori. Levu na gone era sa sarava ga na ka ni veivakamarautaki, se ra lai vakawelei tu ena veika era tuvanaka eso tale.

 E dodonu mo kauai?

•   Ka mo kila

•   Ka o rawa ni cakava

•    Na ivakawele vinaka ena yalomatua kina na gone. Ena vukei ira mera bulabula, vinaka nodra vakasama, vulica e levu na taledi, qai veimaliwai vinaka. Ena vukei ira tale ga mera dauvosovoso, vinaka nodra vakatulewa, lewa vinaka na lomadra, ena vinaka tale ga nodra itovo nira qito kei ira na vo ni gone. Kena ibalebale, na ivakawele vinaka ena vakayalomatuataki luvemu ni tubu tiko.

•   E veivakaleqai na vakayagataki vakasivia ni iyaya vakalivaliva. Na vakayagataki vakasivia ni iyaya vakalivaliva e rawa nida bobula kina. E laurai ni rawa ni vakavuna nodra levulevu na gone, ra qai cudrucudru. Mera qarauna gona na itubutubu nodra vakayagataka qori me nodra ivakawele na luvedra lalai.

•   E tiko tale ga na ca ni nodra lako vakalevu na gone ena veika e tuvanaki. Ni sivia tale na ka era tuvanaka na itubutubu vei luvedra, sa na sega kina na gauna vei ira na gone mera cakava na veika e uqeta nodra vakasama, ra vulica tale ga e levu na taledi. Qori sara ga na veika ena yaga vei ira na gone.

•    Vakarautaka na ivakawele vinaka. Ke rawa, me levu na gauna mera dau tiko tale ga i tuba na gone, mera vulica e levu na ka me baleta na veika bula. Biuti ira mera cakava eso na ka era taleitaka me vaka na droini kei na lagasere. Rawa nira vakatatalo tale ga me vakayavalata nodra vakasama. a

   Vakasamataka: Ke vakawelei o luvequ ena veika vinaka na cava ena vulica kina, kei na itovo cava ena vukei koya me yalomatua? Ena yaga vakacava qori vua ni tubucake tiko?

   iVakavuvuli vakaivolatabu: ‘E . . . yaga na vakaukauayago.’—1 Timoci 4:8.

•   Vakalailaitaka na gauna me vakayagataka ena iyaya vakalivaliva. Vakasama vakayalomatua ni bera ni o solia na talevoni se na tablet vei luvemu, se me sara tivi. Era kaya nodra vuniwai na gone mera kua ni vakayagataka na iyaya vakalivaliva o ira na gone yabaki rua lako sobu. O ira na gone yabaki rua ina lima mera kua ni vakayagataka na iyaya vakalivaliva me sivia e dua e aua ena dua na siga. b

   Vakasamataka: Cava au rawa ni cakava me kua ni vakayagataka vakasivia o luvequ na iyaya vakalivaliva? Meu sarasara vata kei luvequ? Cava eso na ka yaga e rawa ni cakava me sosomitaka na iyaya vakalivaliva?

   iVakavuvuli vakaivolatabu: “Ni qarauna matua na nomuni ilakolako, ni kua ni vakataki ira na lialia, ni vakataki ira ga na vuku, ni vakayagataka vakavinaka na nomuni gauna.”—Efeso 5:15, 16.

•   Vakasamataka vinaka na veika e rawa ni vakaitavi kina o luvemu. Dina ni rawa ni vulica o luvemu ena porokaramu e tuvanaki eso na ka se me dauqito. Ia ke sa sivia tale ena rawa ni vakavu lomaocaoca vua—vei iko tale ga ni o na kauti koya tiko ena vanua kece me lai qito se vuli kina. Ena yaga tale ga i ke na ivakavuvuli ena Efeso 5:15, 16 ya meda vakayagataka vinaka na gauna.

   Vakasamataka: Sa sivia tale na ka e tuvanaki tu me vakaitavi kina o luvequ? Ke dina qori, cava eso na ka e rawa ni vakalailaitaki?

   iVakavuvuli vakaivolatabu: “Vakadeitaka . . . na veika era bibi sara.”—Filipai 1:10.