O tauvimate bibi tiko? E sega ni rawarawa dina na ituvaki qori ni na tara na ivakarau ni nomu vakasama kei na lomamu, ena vinakati tale ga e levu na ilavo mo qaravi kina vakavuniwai. O na rawa vakacava ni vosota? O na vukea vakacava e dua na wekamu se itokani e tauvimate bibi tiko? Na iVolatabu e sega ni vola ni vuniwai, ia e tu kina na ivakavuvuli yaga ena vukei iko mo vosota na ituvaki qori.

•   Qara na veiqaravi vakavuniwai

   Ka e kaya na iVolatabu: “E sega ni yaga na vuniwai vei ira na bula vinaka, e yaga ga vei ira na tauvimate.”—Maciu 9:12.

   Cava o vulica kina?: Mo qara na ivakasala vakavuniwai ena gauna e vinakati kina.

   Tovolea qo: Qara na veiqaravi vakavuniwai e vinaka duadua ena vanua o tiko kina. Eso na gauna ena ka vakavuku mo raica e dua se rua tale na vuniwai. (Vosa Vakaibalebale 14:15) Vakamacalataka vakavinaka vei vuniwai na kemu mate—e bibi mo kila na ka e tukuna vei iko na vuniwai, me matata tale ga vua na mate e tauvi iko tiko. (Vosa Vakaibalebale 15:22) Mo kila vinaka na kemu mate kei na veiqaravi cava ena ganiti iko. Qori ena vukei iko mo tu vakarau ena sala mo qaravi kina, o na vakatulewa tale ga vakavuku.

•   Qarauna nomu bula

   Ka e kaya na iVolatabu: “E yaga ena yago na vakaukaua yago.”—1 Timoci 4:8, Contemporary English Version.

   Cava o vulica kina?: Ena yaga vakalevu ke o qarauna nomu bula, me vaka nomu vakaukaua yago wasoma.

   Tovolea qo: Dei ena dua na ituvatuva ni vakaukaua yago, kania na kakana bulabula qai moce vinaka. De dua o na sega ni namaka na veiveisau mo cakava ena vuku ni nomu tauvimate. Ia era kaya na kenadau, ni na yaga vakalevu nomu qarauna nomu bula qai kania na kakana bulabula. Mo kauaitaka tiko nomu bula se mani veiqaravi cava e caka vei iko, me kua tale ga ni vakaleqa nomu qaravi vakavuniwai.

•   Qara nodra veivuke eso tale

   Ka e kaya na iVolatabu: “Na itokani dina e loloma ena veigauna, e tacida ena gauna ni rarawa.”—Vosa Vakaibalebale 17:17.

   Cava o vulica kina?: Era rawa ni vukei iko nomu itokani mo vosota na ituvaki dredre qori.

   Tovolea qo: Vosa vua e dua nomu itokani nuitaki ena rawarawa nomu talaucaka na lomamu vua. Ni o cakava qori o na vosota na lomaleqa, o na marau tale ga. Era na via vukei iko tale ga nomu itokani kei ira nomu lewenivuvale, ia era na rairai sega ni kila na ka mera cakava. Vakamacalataka gona vakavinaka vei ira na sala mo vukei kina. Kua ni namaka vakasivia na ka, vakavinavinakataka ga na nodra veivuke. Ena gauna vata qori ena veiganiti mo biuta eso na lawa, me vaka na gauna era na sikovi iko kina kei na kena dede. Mo kua kina ni lomaocaoca vakalevu.

•   Rai donu

   Ka e kaya na iVolatabu: “Na yalomamarau e wai vinaka, ia na yalorarawa e vakaotia na igu.”—Vosa Vakaibalebale 17:22.

   Cava o vulica kina?: Ni donu qai dei tiko ga nomu rai, ena vukei iko qori mo lomavakacegu qai vosota na ituvaki rarawataki.

   Tovolea qo: Ni o vakamatauni iko ena ituvaki sa yaco qori, kua ni kauaitaka na ka o sega ni rawa ni cakava, ia mo kauaitaka ga na ka o rawa ni cakava ena ituvaki qo. Kua ni vakatauvatani iko kei ira eso tale, se mo vakasamataka tiko na gauna o se bula vinaka tu kina. (Kalatia 6:4) Biuta eso na isausau e rawarawa qai yaga vakalevu, qori ena vukei iko mo nuidei ena veigauna se bera mai. (Vosa Vakaibalebale 24:10) Ke vakatara na kemu ituvaki, dau kauaitaki ira eso tale. Na marau o na vakila kina ena vukei iko me donu tiko ga nomu rai.—Cakacaka 20:35.

 E kaya na iVolatabu ni Kalou o Jiova a e rawa ni vukea e dua me vosota na tauvimate. Kua ni namaka me veivakabulai vakacakamana na Kalou, ia o ira ga na qaravi koya era rawa ni vukei ena vica na sala qo:

 Vakacegu. E rawa ni vakarautaka o Jiova na “vakacegu ni Kalou e uasivia na vakasama kece.” (Filipai 4:6, 7) Na vakacegu qori ena rawa ni vukea e dua me kua ni lomaocaoca vakalevu. Ena solia na Kalou na vakacegu vei ira era masu ra qai talaucaka vua na nodra nuiqawaqawa.—1 Pita 5:7.

 Vuku. O Jiova ena solia vei keda na vuku meda vakatulewa vakavinaka. (Jemesa 1:5) Ena rawata e dua na vuku ni vulica qai muria na ivakavuvuli yaga ena iVolatabu.

 iNuinui totoka ena veigauna se bera mai. E yalataka o Jiova ena veigauna se bera mai ni na “sega ni kaya e dua na lewenivanua: ‘Au tauvimate.’” (Aisea 33:24) Na inuinui qori ena vukei ira e levu me donu tiko ga nodra rai ke ra vakila tiko na tauvimate bibi.—Jeremaia 29:11, 12.