E volai ena iVolatabu na itukutuku vinaka me baleta na noda bula tawamudu e vuravura na kawatamata. (Same 37:29) E 66 na ivola e tiko ena iVolatabu qai vakayagataka na Kalou e rauta ni 40 na tagane yalodina mera vola. A vola na imatai ni lima na ivola o Mosese rauta na 3,500 na yabaki sa oti. A vola na yapositolo o Joni na iotioti ni ivola ena 1,900 vakacaca na yabaki sa oti. Na itukutuku nei cei era vola na dauvola iVolatabu? Na Kalou a vakatakila vei ira na dauvola iVolatabu na ka mera vola ni vakayagataka na yalona tabu. (2 Samuela 23:2) Era vola na nona nanuma na Kalou, sega ni nodra nanuma ga. O Jiova gona e vakavuna na volai ni iVolatabu.​—Wilika 2 Timoci 3:16; 2 Pita 1:20, 21.

Sarava na vidio O Cei e Vakavuna na iVolatabu?

Eda kila ni vakavuna na Kalou na volai ni iVolatabu ni donu na veika matailalai e parofisaitaka me baleta na veika se bera ni yaco. Sega ni dua na tamata e rawa ni cakava qori. (Josua 23:14) E rawa ga ni tukuna vakadodonu na Kalou Kaukaua Duadua na veika ena sotava na kawatamata ena veigauna se bera mai.​—Wilika Aisea 42:9; 46:10.

Eda namaka ni na sega ni vakatauvatani rawa e dua na ivola e vakarautaka na Kalou. Io e duatani dina na nona ivola. Sa veisoliyaki e vica vata na bilioni na iVolatabu ena drau vakacaca na vosa. A se volai sara ena gauna makawa na iVolatabu, ia e duavata kei na vakadidike vakasaenisi. E sega ni veisaqasaqa na ka era vola na le 40 era volavola. * Na ka e tukuni ena iVolatabu me baleta na loloma e rawa ni vakatakila duadua ga na Kalou dina, na Kalou dauloloma. E se kaukaua tiko ga na Vosa ni Kalou me veisautaka na bula ni  tamata me vinaka. Na veika kece qori e vakadeitaka vei ira e vica vata na milioni ni Vosa ni Kalou na iVolatabu.​—Wilika 1 Cesalonaika 2:13.

Sarava na vidio Eda Vakadeitaka Vakacava ni Dina na iVolatabu?

Dua na itukutuku vinaka e vakabibitaki ena iVolatabu, oya ni tiko na nona inaki totoka na Kalou me baleta na kawatamata. E vakamacalataka na iVolatabu na sala a vakayalia kina na tamata ena ivakatekivu na bula ena parataisi e vuravura. E vakamacalataka tale ga na sala ena vakalesui mai kina na parataisi.​—Wilika Vakatakila 21:4, 5.

E tu ena Vosa ni Kalou na lawa, ivakavuvuli, kei na ivakasala. E volatukutukutaki tale ga kina eso na ivakaraitaki ni ka e dau cakava na Kalou ina kawatamata ena veigauna sa oti, eda vulica ena ivakaraitaki qori na nona itovo na Kalou. E rawa gona ni vukei iko na iVolatabu mo kila na Kalou. E vakamacalataka na sala mo drau veitokani kina.​—Wilika Same 19:7, 11; Jemesa 2:23; 4:8.

Na ivola qo ena vukei iko mo kila vinaka na iVolatabu ni vakayagataka na iwalewale vata ga a cakava o Jisu. E dau wilika yadudua na veitikinivolatabu o Jisu qai vakamacalataka na “ibalebale ni iVolatabu.”​—Wilika Luke 24:27, 45.

E vakasakiti sara na itukutuku vinaka mai vua na Kalou ni vakatauvatani kei na so tale na ka. Ia eso era sega ni bau kauaitaka na itukutuku qori, eso tale era cudru sara ga nira rogoca. Kua ni yalolailai. Na nomu nuitaka na bula tawamudu e vakatau ena nomu kila na Kalou.​—Wilika Joni 17:3.