E levu era sa sega ni lai lotu nira sega ni kunea kina na isau ni nodra vakatataro. Era sega tale ga ni vakila na vakacegu. Na cava gona mo tiko kina ena nodra soqoni na iVakadinadina i Jiova? Na cava o na raica e kea?

O na marau ni o maliwai ira era dauloloma ra qai veikauaitaki. Ena imatai ni senitiuri era dau tuvanaki vakaivavakoso na lotu vaKarisito, era soqoni vata mera sokalou, mera vulica na iVolatabu, ra qai veivakayaloqaqataki. (Iperiu 10:24, 25) Nira vakila na loloma, era vakadeitaka nira maliwai ira na itokani dina se o ira na tacidra vaKarisito. (2 Cesalonaika 1:3; 3 Joni 14) Keimami muria tale ga na ivakaraitaki qori, keimami qai vakila kina na marau.

O na vulica na sala me bulataki kina na ivakavuvuli vakaivolatabu. Me vaka ga ena gauna vakaivolatabu, nikua tale ga keimami dau soqoni vata na tagane, yalewa kei na gone. Era vakayagataka na qasenivuli matua na iVolatabu mera vukei keimami ena kena muri na ivakavuvuli ni iVolatabu e veisiga. (Vakarua 31:12; Niemaia 8:8) Keimami vakaitavi kece na vakarorogo ena so na ka me veivosakitaki, keimami lagasere, keimami vakaraitaka kina na neimami vakabauta.​—Iperiu 10:23.

Ena vakaukauataki nomu vakabauta na Kalou. A kaya na yapositolo o Paula ena dua na ivavakoso ena nona gauna: “Au diva meu raici kemuni . . . meda veivakayaloqaqataki ena vuku ni noda vakabauta, oya na nomuni vakabauta kei na noqu tale ga.” (Roma 1:11, 12) E vakaukauataki na neimami vakabauta ni keimami soqoni wasoma kei ira keimami vakabauta vata. Keimami uqeti tale ga kina me keimami bulataka na ivakavuvuli vakaivolatabu.

Mo rawa ni vakadinadinataka sara ga na veika eda sa veivosakitaka mai, vakacava mo mai tiko ena dua na neimami soqoni. Keimami na marautaka dina. E sega ni vakaicurucuru na soqoni—e sega tale ga ni caka na soli.

• Na ivakaraitaki cava e muri ena neimami soqoni?

• E yaga vakacava vei keimami na neimami tiko ena soqoni?