Vakasamataka mada na ituvaki qo: E veilecayaki sara ga o Alex. Na vuna? E vakabauta na Kalou, e vakabauta tale ga ni a buli na ka kece. Ia e tukuna na nona qasenivuli nira sa vakadinadinataka na saenitisi ni dina na vakasama ni bula vakaidewadewa. E sega ni vinakata o Alex me nanumi ni lialia. E kaya lo tale ga, ‘Ke ra sa vakadinadinataka na saenitisi ni dina na vakasama ni bula vakaidewadewa, o cei o yau meu vakalewai ira?’

Ke o sotava tale ga na ituvaki ya, vakacava o na vakabauta na bula vakaidewadewa baleta wale ga ni vakamacalataki ena ivola ni vuli?

E levu e dau totolo ga nodra tukuna na veika era vakabauta, ia era sega ni kila na vuna era vakabauta kina.

• Eso era vakabauta ga ni a buli na ka kece nira rogoca mai valenilotu.

• Eso era vakabauta ga na bula vakaidewadewa nira vulica mai koronivuli.

E kaya na iVolatabu: “[E] tiko o koya e tara na vale yadua, ia o koya e tara na ka kece ga na Kalou.” (Iperiu 3:4) Vakacava e dina ya?

KA ERA KAYA ESO: E kacabote eso na ka qai basika kina na lomalagi kei na vuravura.

KA ERA KAYA ESO: E kawa ni manumanu na tamata.

KA ERA KAYA ESO: E tiko na ivakadinadina ni bula vakaidewadewa.

“Ke o taubale tiko ena dua na veikauloa o qai raica e dua na vale totoka, vakacava o na nanuma nira bale ga mai na vunikau lai basika sara kina na vale? Sega! Sa sega tu ga ni rawa ni yaco ya. Na cava gona meda qai vakabauta kina nira basika ga vakataki ira na veika e lomalagi kei vuravura?”—Julia.

“Kaya mada e tukuni vei iko ni kacabote e dua na valenitabaivola, e tasika na iqi ena lalaga kei na dokanivale qai vakaraitaki mai kina e dua na ivolavosa taucoko. Vakacava o na vakabauta ya?”—Gwen.

E veiuqeti na iVolatabu mo vakayagataka na nomu ‘vakasama, mo yalomatua tale ga.’ (Roma 12:1) Kena ibalebale na nomu vakabauta na Kalou me kua ni yavutaki ga ena

• KA O VAKILA (Au vakila ni tiko e dua e cecere)

• KA O RAICA VEI IRA ESO TALE (Era daulotu ena noqu itikotiko)

• KA O VAKAVULICI KINA (Rau vakavulici au na noqu itubutubu meu vakabauta na Kalou. Au na muria ga ya)

E bibi me yavutaki vinaka na ka o vakabauta.

“Niu rogoca na ivakamacala nei qasenivuli me baleta na yagoda, au sa vakadeitaka ga ni bula dina tiko na Kalou. E dui tiko na itavi era qarava na veitikiniyago, eso na itavi e vereverea sara da qai sega ni raica na ka era cakava na veitikiniyagoda. E vakatubuqoroqoro dina na yagoda!”—Teresa.

“Niu raica e dua na vale cecere, waqa ni saravanua se motoka, au dau vakasamataka, ‘O cei e tara se bulia qo?’ Kaya mada na motoka, sa ra vuku mada ga o ira na bulia baleta ni levu na kena gacagaca lalai qai vinakati mera biu donu me yavala kina na motoka. Ke bulia gona na motoka e dua, kena ibalebale e dua tale ga e buli keda na tamata.”—Richard.

E kaya o Anthony: “Ni toso tiko na noqu vulica na veika vakasaenisi, au raica ni sa qai veicalati ga vakalevu na ivakavuvuli ni bula vakaidewadewa.” E tukuna tale ga ni rawarawa cake me vakabauta na Dauveibuli, mai na nona vakabauta na bula vakaidewadewa.

Era kenadau na saenitisi, sa vicasagavulu tale ga na yabaki nodra vakadidike. Ia e se duidui tiko ga na nodra rai me baleta na bula vakaidewadewa, era se veiletitaka tiko ga na vakasama qori. Vakacava o se via vakabauta tiko ga na ka era kaya?