Vei Ira na Iperiu 13:1-25
13 Moni veilomani tiko ga vakaveitacini.+
2 Ni kua ni guilecava na veikauaitaki.*+ Eso mada ga era sega ni kila nira a vakacegui ira kina na agilosi.+
3 Ni dau nanumi ira na tu e valeniveivesu*+ me vaka sara ga oni vesu tu kei ira,+ ni nanumi ira tale ga na vakacacani, ni oni se bula tiko e vuravura.
4 Meda rokova kece na vakawati, me kua tale ga ni vakadukadukalitaki na imocemoce ni vakawati,+ ni na lewai ira na dau veiyacovi tawadodonu* kei ira na veibutakoci na Kalou.+
5 Me kua ni laurai ena nomuni bula ni oni lomana na ilavo,+ ni lomavakacegu ga ena ka e sa tiko vei kemuni.+ Ni a kaya: “Au na sega sara ni laivi iko, au na sega tale ga ni biuti iko.”+
6 O koya gona, meda yaloqaqa da qai kaya: “E dau vukei au o Jiova,* au na sega ni rere. Cava ena cakava rawa vei au na tamata?”+
7 Moni nanumi ira na liutaki kemuni tiko,+ era a tukuna vei kemuni na vosa ni Kalou, ni vakadikeva na vinaka ni nodra ivalavala, ni qai vakatotomuria na nodra vakabauta.+
8 E dua tu ga o Jisu Karisito enanoa, nikua, me tawamudu.
9 Moni kua ni vakacalai ena veimataqali ivakavuvuli oni vulagi kina. E vinaka me vakadeitaka na lomada na loloma soli wale ni Kalou, sega ni kakana, ni sega ni yaga qori vei ira era ogaoga kina.+
10 Sa dua na noda icabocabonisoro, e sega ni dodonu mera kana kina o ira na veiqaravi tabu ena valelaca.+
11 Ni vakamai ena taudaku ni keba na yago ni manumanu a kauta na kedra dra na bete levu ina tikina tabu me isoro ni ivalavala ca.+
12 E vaka tale ga kina o Jisu, me rawa ni vakasavasavataki ira na tamata ena nona dra,+ e vakararawataki ena taudaku ni matamatanikoro.+
13 O koya gona, meda lako vua ena taudaku ni keba, meda vosota na nona vakamaduataki,+
14 ni sega ni tiko eke e dua na noda koro e tudei, ia eda waraka ena vakanuinui na kena ena muri mai.+
15 O koya gona, meda cabora tiko ga vua na Kalou na isoro ni veivakacaucautaki,+ ya na vua ni tebenigusuda+ nida tukuna raraba na yacana,+ da qai vakayacora qo ena vuku i Jisu.
16 Moni kua tale ga ni guilecava na caka vinaka kei na nomuni wasea vei ira tale na so na ka e tu vei kemuni,+ ni taleitaka na Kalou na isoro va qori.+
17 Moni talairawarawa vei ira era liutaki kemuni+ tiko moni vakamalumalumu tale ga,+ nira yadravi kemuni tiko ra qai saumitaro kina,+ me rawa nira veiqaravi ena marau sega ena rarawa, ni na sega ni yaga qo vei kemuni.
18 Moni masulaki keitou tiko ga, keitou nuitaka ni vinaka na neitou lewaeloma, ni keitou vinakata me keitou dina ena ka kece.+
19 Ia au uqeti kemuni vakabibi moni masu, meu rawa ni lesu totolo yani vei kemuni.
20 Na Kalou ni veivakacegui a vakaturi Jisu na noda Turaga mai na mate, na ivakatawanisipi levu,+ ena dra ni veiyalayalati tawamudu,
21 me vakaiyaragitaki kemuni mada ga ena ka vinaka kece moni cakava na lomana, me cakava tale ga e lomada na ka e vinaka e matana ena vuku i Jisu Karisito, me vakalagilagi kina me tawamudu. Emeni.
22 Ia au uqeti kemuni raveitacini moni vakatudaliga ina vosa ni veivakayaloqaqataki qo, niu sa vola yani vei kemuni e dua na ivola lekaleka.
23 Au vinakata moni kila ni sa sereki na tacida o Timoci. Ke yaco totolo mai keirau na lako vata yani vei kemuni.
24 Au loloma tu yani vei ira na liutaki kemuni tiko, vei ira tale ga na yalosavasava kece. Era loloma yani vei kemuni o ira na tiko e Itali.+
25 Me tiko mada ga kei kemuni kece na loloma soli wale ni Turaga.
iVakamacala e ra
^ Se “Ni lomani ira na vulagi.”
^ Kir., “ira na vesu tu.”
^ Raica na iVakamacala ni Vosa.
