DAU taleitaka na veivacu o Hilton. Se qai yabaki vitu ga sa tekivu veivacu, so na gauna ena loma ni rigi ni veivacu, se so tale na vanua! Ni se tiko ena sekeneri, dau muri ira nona ilala mera vaqara e dua mera vaculaka. E kaya: “Au butako, veimauilavo, sara iyaloyalo vakasisila, vakasagai ira na yalewa, vosacataki rau tale ga noqu itubutubu. Rau kaya kina niu sa sega tu ga ni veisau. Oti ga noqu vuli, au biubiu e vale.”

Oti tale e 12 na yabaki qai lesu i vale o Hilton, rau sega vakadua ni vakabauta nona itubutubu ni qo ga na luvedrau dau cike! Sa yalomalua, lewai koya vinaka, qai veidokai. Cava mada e vu ni nona veisau? Ni yali tu mai vale, e vakasamataka sara vakabibi na vanua sa vakanaulu tiko kina nona bula. E wili iVolatabu me raica ke rawa ni veisau. E kaya: “Au cakava na ka e kaya na iVolatabu, ya meu biuta tani na noqu itovo makawa, au qai muria na ivakaro ena Efeso 6:2, 3 meu dokai rau noqu itubutubu. Qo na imatai ni gauna meu vakila kina na marau dina, au vakamarautaki rau noqu itubutubu, oti tale ga noqu dau vakamosi ulu!”

Eda raica ena veika e yaco ena bula i Hilton na yaga kei na kaukaua ni vosa ni Kalou, ni rawa ni veisautaka na noda itovo. (Iperiu 4:12) Meda raica mada qo eso na itovo qori me vaka na noda dau dina, lewai keda vinaka, yalodina, kei na loloma​—ena veisautaka tale ga vakacava nona bula e dua me vinaka sara.