ULUTAGA LEVU | IVOLATABU SE YAGA TIKO NIKUA?
iVolatabu—Se Yaga Tiko Nikua? Lewai Iko Vinaka
IVAKAVUVULI VAKAIVOLATABU: “Sa tukuna kece na lomana na yalolialia: ia ko koya sa vuku sa galu mada, ka qai vosa emuri.”—Vosa Vakaibalebale 29:11.
“E vaka sara ga niu vakaturi mai na mate!”
KENA YAGA: Ke o saga mo vakavola na yaga ni noda dau lewai keda vinaka, levu sara na ka o na vola! E kilai tale ga ni rawa ni taqomaki kina noda bula vakayago. E kaya na iVolatabu: “Na yalovinaka e bulabula kina na yago.” E tomana ni “loma daumarau sa wai yaga.” (Vosa Vakaibalebale 14:30, NW; 17:22) Ia e kune ena vakadidike ni rivarivabitaki nodra bula vakayago o ira na dau cudrucudru ra qai yalokatakata, vakauasivi ni rawa ni vakaleqai kina na utodra. Na yaga ni nona lewai koya vinaka e dua e sega ni yalani ga ena nona bula vakayago.
E nanuma lesu o Cassius, sa yabaki 30 vakacaca: “Au dau veiba, cudrucudru totolo, levu tale ga na gauna au vakavu veivala. Au dau beci au, ia e veisau kece qori niu sa muria na ivakavuvuli vakaivolatabu. Au vulica kina meu lewa vinaka noqu dau cudru, meu yalomalumalumu, meu dau veivosoti tale ga. Keu sega ni cakava qori, au sa rairai curu i valeniveivesu. Na noqu veisau e vaka sara ga niu vakaturi mai na mate!”
