LEVU na vuna e sega tu kina nodra vale eso. Me vakataki Joe, e sotava sara ga na leqa. Duidui o Martín, e sega ni taleitaka na ivakarau ni bula ni veisiga, e sega ni vakaibalebale vua. So tale e sega nodra vale ena vuku ni dravudravua, leqa tubukoso, ivalavala voravora e vale, vakayagataki vakasivia ni wainimategaga kei na gunu, tauvimate ni vakasama, sega ni kune na vale e sau vinaka, se ra vakasukai mai na nodra cakacaka.

E kaya o Parofesa Paul Toro e dau dikeva na vakasama kei na itovo, nira dau laurai ga vakalevu na sega nodra vale ena veivanua e se qai vakatorocaketaki tiko, vanua e vakacacani ena ivalu se vakaleqai tu vakailavo, ia qo “sa leqa levu sara tiko ga ena levu na vanua sa vakatorocaketaki tu.” * So tale ga na gauna e rawa ni vakavuna na lawa e vakatura na matanitu me baleta na ka ni veivuke vei ira na dravudravua kei na kena vakaduiduitaki na kedra isau na cakacaka.

Levu era nuiqawaqawataka na nodra bula ena veisiga nimataka. So era walia na leqa qori ena nodra vulica na ka e tukuni tu ena iVolatabu me baleta na  gauna se bera mai—eda na qai veivosakitaka vakamalua qori. Nikua, e rawa ni vukei keda na iVolatabu ena so na ivakavuvuli meda muria me vakavinakataki kina noda bula vakailavo kei na bula vakayago, me vaka ga rau vakila o Joe kei Martín.

E kaya o Cindi, na marama a cakacaka tiko ena laibri ni “kena irairai ni turaga vuku o Joe, e vakaitovo qai yalomalua.” E iVakadinadina i Jiova o Cindi, solia sara vei Joe Na Vale ni Vakatawa kei na Yadra! Sureti koya tale ga ena nodra soqoni na iVakadinadina i Jiova. E kidavaki ena marau ni lako yani, sega ni bau dua me beci koya. Uqeti koya qori me dau tiko wasoma kina. Sureti koya sara e dua na tacida tagane ena ivavakoso me vulica na iVolatabu, mani vakadonuya.

Vakacegui koya na veika e vulica ena iVolatabu, e tekivu muria sara, qai kila ni na vinakati me veisautaka e levu na ka ena nona bula. Kena ivakaraitaki, e kila ni isolisoli ni Kalou na bula, e dodonu me dokai, kila tale ga ni vakadukadukalitaka na yago na vakatavako. (Same 36:9) Mani biuta na vakatavako me muria na ivakavuvuli ena 2 Korinica 7:1: “Meda vakasavasavataki keda mai na dukadukali kece vakayago.” Na nona vakatulewa e yaga ina nona bula vakayago, e maroroi ilavo rawa tale ga kina.

E tekivu vaqara cakacaka o Joe ni vakasamataka vakabibi na ivakasala vakaivolatabu ni dodonu meda cakacaka meda qaravi keda ga kina. * (1 Cesalonaika 4:11, 12) E kaya na Dauvunau 2:24: “E sega ni dua tale na ka e vinaka vua na tamata, me kana ga, me gunu, me marautaka na nona cakacaka vakaukaua.” Eda na marau ga ke da gumatua ena cakacaka, da sega tale ga ni dau beci keda. Eda rawa kina ni veivuke.—Efeso 4:28.

Nodra raica na “lewe ni ivavakoso” ni turaga daudina o Joe, “era taleitaki koya,” e kaya o Cindi, “so era vukei koya me dua nona vale veiganiti, kei na so tale na veivuke e tu e rawa ni kerea.” Toso tiko ga nona vuli me yacova sara ni sa papitaiso me iVakadinadina i Jiova. Ena vuku ni veika sa sotava oti e rawa gona vua me vakauqeti ira kina eso tale mera rawata na vuku vakalou, e kune duadua ga ena iVolatabu.—Vosa Vakaibalebale 3:13, 14.

Via kila na inaki ni bula o Martín ni se qai yabaki 20. E kaya: “Au saga meu kila na nodra ivakavuvuli na veimatalotu, na vuku vakavuravura, bau vakayagataka tale ga na wainimategaga. Au nanuma ni na vakainaki kina noqu bula, ia e sega.” Dua na gauna a tiko mai Kalifonia, e Merika, oti qai toki i Hawaii. E nanuma lesu: “Vaka ga au sa butuki parataisi tu.” Totoka dina na vanua qori, ia au sega ni lomavakacegu. E kaya: “Au yalolailai vakalevu, vu ni noqu via vakamatei au.” Gauna sara ga qori sa qai sorova kina na tagi me vakamasuta na Kalou, “Ke oni bula dina tiko, ni vakatakilai kemuni mai.”

Ia ni bera qori, e nanuma vinaka tiko o Martín nona raica e dua na ivakatakilakila e volai toka kina va qo “Kingdom Hall of Jehovah’s Witnesses” (Vale ni Soqoni ni iVakadinadina i Jiova). Mani nanuma me lako tu mada kina. E kaya: “Gauna au lako kina e kea a balavu tu na uluqu kei na  kumiqu, qavu dua noqu isulu me vica na vula. Ia era marautaki au.” Vakadonuya o Martín me vuli iVolatabu, dau taubale gona mai “matasawa” me lai vuli iVolatabu e tauni.

Sa qai kila o Martín na isau ni so na taro e dau vaqaqa voli. Oti kina nona yalolailai qai vakila na marau e tukuna o Jisu: “Era marau o ira na kauaitaka nodra bula vakayalo.”—Maciu 5:3.

Veisautaka nona rai o Martín ni muria na ivakavuvuli vakaivolatabu vata ga a vukei Joe, a tukuni taumada, oya nona lewa vinaka nona bula. Sa qai kauaitaka o Martín na kena irairai, ra vukei koya na iVakadinadina me cakacaka, dua tale ga na vanua vinaka me tiko kina. E kaya: “Dau kilai tu e tauni ni sega noqu vale. Ia ra qoroqoro ga e levu ena noqu veisau.”

Oti e lesu o Martín i Argentina, papitaiso sara me iVakadinadina i Jiova. Taleitaka ena gauna qo nona sa vukei ira tiko na walokai tu vakayalo mera kila na isaunitaro bibi eda dau vakataroga me baleta na bula.

Dua na dauveiqaravi ni Kalou ena gauna makawa o Jeremaia, a bula donuya e dua na gauna lewalewai dredre. Era curubotea yani na nona vanua na meca dauvakacaca, ra kau vakabobula na kainona. (Lele i Jeremaia 1:3) A bula o koya, ia sega tale ni dua na ka e vo vua. E masu ena rarawa: “Moni nanuma na noqu rarawa kei na noqu biu wale tu.”—Lele i Jeremaia 3:19.

Levu na ka rarawa e sotava, ia e sega ni via yalolailai. Na vuna? E kila vinaka ni na sega ni biuti koya o Jiova. (Jeremaia 1:8)  Dua tale na vuna oya ni dau vulica na iVolatabu, e yalataki tu kina ni na oti na bula dravudravua kei na veivakararawataki, qai sosomitaki ena bula vakacegu kei na nuidei.—Same 37:10, 11.

E sega ni dua na sasaga vakatamata me vakayacora qori, na Matanitu ga ni Kalou, e dei na kena veiliutaki. (Taniela 7:13, 14) E kena Tui o Jisu Karisito, e dau lomani ira vakalevu na dravudravua ena gauna a bula tu kina vakatamata e vuravura. (Luke 7:22; 14:13) Ena nona veiliutaki “era na buroro na yalododonu, ena qai vakilai na sautu . . . Ni na vakabula o koya na dravudravua e tagi ni kere veivuke, o koya tale ga na vakaloloma kei koya e sega ni vukei. Ena vakabulai ira mai na veivakasaurarataki kei na ivalavala kaukaua.”—Same 72:7, 12, 14.

Dau vakabibitaka o Jisu na Matanitu ni Kalou ena nona veivakavulici. (Luke 4:43) E vakavulici keda mada ga meda masuta: “Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.” (Maciu 6:9, 10) Ena vakacava na noda bula ni sa veiliutaki duadua ga na Matanitu ni Kalou? Veiuqeti na ka e tukuna na iVolatabu me baleta na gauna qori. Kena ivakaraitaki, e kaya me baleti ira na vakarurugi ena Matanitu ni Kalou:

• “Era na tara vale era na tiko kina, era na tea na loganivaini era na kania na vuana. Era na sega ni tara vale qai duatani e tawana, era na sega ni tea qai duatani e kania. . . . Era na marautaka vakalevu na cakacaka ni ligadra o ira au digitaka.”​—Aisea 65:21, 22.

• “Era na dui dabe ena ruku ni nodra vaini kei na ruku ni nodra vunilolo, ena sega ni dua me vakarerei ira, ni tukuna na gusu i Jiova ni lewe vuqa.”​—Maika 4:4.

Na inuinui dei qori e rawa ni vakayaloqaqataki keda nida vakatovolei. Ena gauna vata qori ena yaga vei keda na ivakavuvuli vakaivolatabu me vakainaki noda bula, meda lomavakacegu tale ga, me vakataki Joe ga kei Martín, vaka kina e levu tale era vakila qori. E veivakadeitaki kina na Dauveibuli: “O koya e vakarorogo vei au ena tikovinaka, ena vakacegu ni sega ni rerevaka na ka ca.” (Vosa Vakaibalebale 1:33) Me dina mada ga qori ena nomu bula!