Gauna ena Oti Vakadua Kina na Veicati!
Ke da cavuraka mada ga mai lomada na veicati, eda na sega ga ni rawa ni lewa na nodra itovo kei na ka era cakava eso tale. Era dau sotava vakalevu na leqa na tamata vinaka ena vuku ni nodra veicati eso tale. O cei gona ena rawa ni vakaotia vakadua na veicati?
Na Kalou ga o Jiova ena rawa ni vakaotia vakadua na veicati e yaco tu nikua. Qori sara ga na ka e yalataka na iVolatabu ni na cakava.—Vosa Vakaibalebale 20:22.
ENA VAKAOTIA NA KALOU NA KA E VAKAVUNA NA VEICATI
-
1. SETANI NA TEVORO. O Setani na agilosi talaidredre e vakavuna na veicati e yaco tu nikua. Na Kalou ena vakarusai Setani kei ira kece era vakatotomuria na nona dau veicati.—Same 37:38; Roma 16:20.
-
2. VURAVURA CA NEI SETANI. Na Kalou ena vakaotia na ka kece e uqeta na veicati e vuravura. Qori e okati kina o ira na daunipolitiki daulawaki kei ira na iliuliu ni lotu era uqeta na veicati. Na Kalou ena vakarusai ira tale ga na daunibisinisi kocokoco, era dau vakalolomataki ira na lewenivanua.—2 Pita 3:13.
-
3. IVALAVALA CA NI TAMATA. E kaya na iVolatabu ni o keda kece eda sucukaya mai na ivalavala ca. E dau rawarawa gona me cala na ka eda vakasamataka se cakava. (Roma 5:12) Sa rauta meda dau katona na ca qai cati ira eso tale ena levu na gauna. Ia na Kalou ena vukei keda meda biuta tani na itovo ca kece va qori, ena vakaotia tale ga na veicati.—Aisea 54:13.
YALATAKA NA IVOLATABU NA VURAVURA E SEGA KINA NA VEICATI
-
1. ENA SEGA TALE NI CAKA VEI KEDA NA VEIKA TAWADODONU. Na Matanitu ni Kalou e tiko mai lomalagi, ena liutaka mai na vuravura. (Taniela 2:44) E dodonu qai tawamudu na kena veiliutaki, ena vakaotia vakadua na veivakaduiduitaki. Na Kalou ena vakaotia na ivakarau tawadodonu kece e yaco tu nikua.—Luke 18:7.
-
2. EDA NA VAKILA KECE NA VAKACEGU. Ena sega ni dua ena vakalolomataki ena vuku ni ivalu kei na itovo kaukaua. (Same 46:9) O ira kece na tu e vuravura era na veiyaloni. Eda na sega gona ni rerevaka e dua na ka.—Same 72:7.
-
3. EDA NA BULA UASIVI QAI SEGA NI MATE. O ira kece na bula e vuravura ena vu mai lomadra nodra veilomani. (Maciu 22:39) Ena oti vakadua na rarawa. Eda na guilecava mada ga na veika e vakararawataki keda ena veigauna sa oti. (Aisea 65:17) Ena sega tale ni vakilai ena gauna qori na veicati. Eda “na kunea na marau vakasakiti ena levu ni vakacegu.”—Same 37:11.
Vakacava o vinakata mo bula ena vuravura va qori? Nikua, e levu era sa sega ni qai veicati nira muria na ivakavuvuli vakaivolatabu. (Same 37:8) Qori sara ga na ka era cakava tiko e vica vata na milioni na iVakadinadina i Jiova e veiyasa i vuravura. E dina ga ni duidui na nodra itovo vakavanua kei na isususu, ia era veilomani qai duavata me vaka ga e dua na vuvale.—Aisea 2:2-4.
Era na marau na iVakadinadina i Jiova mera wasea na sala era vosota kina na veika tawadodonu, kei na veivakaduiduitaki. Qori ena vukei iko mo cavuraka na yalo ni veicati, mo qai dau loloma. O na rawa tale ga ni kila na sala mo lomani ira kina na tamata kece, ya o ira mada ga na dau veicati qai sega ni dau vakavinavinaka. Ni o cakava qori, o na vakila ena gauna qo na marau, qai vinaka nomu veimaliwai kei ira eso tale. Koya e bibi sara, o na vulica na sala mo bula kina ena veiliutaki ni Matanitu Kalou, na gauna sa na oti kina vakadua na veicati.—Same 37:29.
[iVakamacala e ra]
^ para. 15 E vakarautaki ena so na vosa.
Rawa ni o Wilika Tale ga
NA VALE NI VAKATAWA
Cava ena Cakava na Matanitu ni Kalou?
E kila o Jisu na Matanitu ni Kalou duadua ga ena walia na leqa kece e vuravura. Cava sa cakava oti na Matanitu ni Kalou meda nuidei kina?
SAUMI NA TARO VAKAIVOLATABU
Au na Kunea i Vei na iNuinui?
Ena rawa ni yaga na iVolatabu ena nomu bula ena gauna qo, o na nuidei tale ga ena veigauna se bera mai.
ESO TALE NA ULUTAGA
Ena Rawati e Vuravura na Lewadodonu?
E talei vua na Kalou na noda bula, e kaya kina na iVolatabu o koya ga na vu ni lewadodonu.
YADRA!
Veivakaduiduitaki—Na iWali Duadua Ga
Na cava e va na ka ena cakava na Matanitu ni Kalou me cavuraka laivi kina na veivakaduiduitaki?
