Veidutaitaka na ka o Vakabauta kei na ka e Kaya na iVolatabu
ME VAKATAKI ira ga na le rua vakacaca na bilioni e veiyasa i vuravura, o na rairai kaya tale ga ni o dua na imuri i Karisito se dua na lotu vaKarisito. E vica vata na udolu na lotu nikua era kaya nira lotu vaKarisito. Ia e laurai ena veimatalotu qori na duiyaloyalo ni duidui nodra rai se ra sega ni duavata ena so na ivakavuvuli ni nodra lotu. De dua e duidui mai na lotu tale eso na ka o vakabauta. E bibi mo dikeva na ka o vakabauta, mo raica ke salasalavata kei na ivakavuvuli vaKarisito ena iVolatabu.
Era vakatokai mera “lotu vaKarisito” na imuri taumada i Jisu Karisito. (Cakacaka 11:26) A sega ni gadrevi mera vakatokayacataki ena dua tale na yaca, ni a dua ga na ilawalawa ena gauna ya e kilai me lotu vaKarisito. O ira qori era muria kece na ivakavuvuli i Jisu, a tauyavutaka na lotu vaKarisito. Vakacava na lotu o lewena, e vakavulici kina na ka e vakavulica o Karisito kei na ka era vakabauta na nona imuri taumada? Na sala duadua ga o na kila kina qori, oya mo veidutaitaka kei na ka e kaya na iVolatabu.
Vakasamataka mada na ivakaraitaki i Jisu. A doka vakalevu na iVolatabu ni vakabauta e Vosa ni Kalou. E sega ni taleitaki ira era beca na ivakavuvuli vakaivolatabu ra qai vakabibitaka ga na ivakavuvuli vakatamata. (Marika 7:9-13) O ira na imuri dina i Jisu era na yavutaka ena iVolatabu na ka era vakabauta. E bibi kina me taroga o koya e kaya ni lotu vaKarisito, ‘E yavutaki ena iVolatabu na ivakavuvuli ni noqu lotu?’ O rawa ga ni kila qori ke o veidutaitaka na ivakavuvuli ni nomu lotu kei na ka e kaya na iVolatabu.
A kaya o Jisu me yavutaki ena ka dina ena iVolatabu na noda qaravi Kalou. (Joni 4:24; 17:17) E kaya tale ga na yapositolo o Paula ni vakatau na noda vakabulai ena noda “kila vinaka na ka dina.” (1 Timoci 2:4) E bibi gona me yavutaki ena ka dina ena iVolatabu na ka eda vakabauta, ni vakatau sara ga kina na noda bula!
VEIDUTAITAKA KEI NA IVOLATABU
Raica mada e ono na taro e toka e ra kei na kena isau vakaivolatabu. Cega na veitikinivolatabu, vakasamataka na ka e kaya, qai veidutaitaka kei na ivakavuvuli ni nomu lotu.
O na kurabuitaka na ka o raica ena kilakila mada qo. Ke o nanuma mo veidutaitaka na ivakavuvuli ni nomu lotu kei na ka dina ena iVolatabu, era tu vakarau na iVakadinadina i Jiova mera vukei iko. O rawa ni kerea mo vulica wale na iVolatabu se raica na neimami website na jw.org.
Rawa ni o Wilika Tale ga
SAUMI NA TARO VAKAIVOLATABU
E Tautauvata na Lotu Kece? E Vakadonuya Kece na Kalou?
E tukuni ena iVolatabu e rua na mataqali sokalou e sega ni vakadonuya na Kalou.
TARO E TAROGI WASOMA
Na Cava Era Vakabauta na iVakadinadina i Jiova?
Kila e 15 na ka keimami vakabauta.
SAUMI NA TARO VAKAIVOLATABU
Cava sa Rui Levu Kina na Lotu vaKarisito?
Vakacava qo na ka e nakita o Jisu o koya e tauyavutaka na lotu vaKarsitio?
NA VALE NI VAKATAWA
