O DON e dua na iVakadinadina i Jiova e Kenada, e dau taleitaka me vosa vei ira na vakaitikotiko ena salatu. Qo na ka e talanoataka me baleta e dua vei ira: “E sega tu nona vale o Peter, e turaga dukalevu au sa qai bau raica. E vakasisila na kena irairai, qai qaseqase nona ivalavala mera kua kina ni torovi koya yani e levu. E sega tale ga ni dau via ciqoma nodra veivuke eso.” Ia ena loma ni 14 na yabaki, e kauaitaki Peter toka ga o Don.

Dua na siga e tarogi Don o Peter: “Na cava o dau mai vosa tiko kina vei au? O ira na kena vo era wele. Cava o dau kauaitaki au kina?” E vakayagataka vakamaqosa o Don e tolu na tikinivolatabu me tara na loma i Peter. Kena imatai, e tarogi Peter ke kila na yaca ni Kalou, qai kerei koya me wilika na Same 83:18. Me vakaraitaka na vu ni nona kauai, e kerei koya tale me wilika na Roma 10:13, 14, e vakamacalataki kina “nira na bula o ira kece era masuta na yaca i Jiova.” Sa qai tinia o Don nona wilika na Maciu 9:36 qai kerei Peter me wilika lo. E tukuni ena tikinivolatabu ya: “Ni raici ira na ilala levu, e lomani ira [o Jisu] nira suivotu qai biu wale tu me vaka na sipi e sega na kena ivakatawa.” E tonawanawa na matai Peter qai taroga: “O yau tale ga e dua vei ira na sipi ya?”

E tekivu veisau o Peter. E sili, e kotiva vakalekaleka nona kumi, e dara tale ga na isulu vinaka e solia o Don. E qarauna sara me savasava na kena irairai.

E tiko nona ivola e dau vakalewena e veisiga o Peter. Ena itekitekivu ni nona ivola, e talanoataka kina na veika dredre e sotava, ia ni toso na gauna e duatani na ka e vola. Kena ivakaraitaki, e vola: “Au sa qai kila nikua na yaca ni Kalou. Niu masu, sa rawa niu masuti Jiova. E ka talei dina meu kila na yacana. E tukuna o Don ni rawa ni noqu itokani o Jiova, se mani gauna cava se cava e yaco, ena rogoci au.”

 Na iotioti ni nona ivakamacala e vola tiko vei tacina kei ganena. E kaya:

“Au sega ni bula vinaka nikua. De dua sa tatara mai na bula vaqase. Ia ke mani iotioti ni noqu siga e dai, au kila niu na sotavi noqu itokani [o Don] e Parataisi. Ke drau wilika qo, kena ibalebale au sa sega ni tiko. Ia ke drau raica e dua na turaga ena noqu veibulu e vulagi vei kemudrau, drau vosa vua, yalovinaka drau wilika tale ga na ivola lailai qo [qo na ivola ni vuli iVolatabu Na ka Dina sa Basika ki na Bula Tawamudu a ciqoma ena vica na yabaki e liu]. * E tukuni kina niu na raici ira noqu itokani ena Parataisi. Au vakabauta qori mai vu ni lomaqu. Tacimudrau lomani, Peter.”

Ni oti na veibulu, e vakamacalataka o Ummi na ganei Peter: “Rauta na rua na yabaki sa oti, keirau veitalanoa kei Peter. Sa dede meu raici koya tale me mamarau. E bau matadredredre mada ga.” E tukuna vei Don: “Au na wilika na ivola baleta ni kena irairai ni duatani na ka qo ni sa tara na loma i ganequ na ka e wilika.” E taleitaka tale ga o Ummi me vulica kei ira na iVakadinadina i Jiova na ivola Na Cava e Kaya na iVolatabu?

Meda kua tale ga ni kauaitaka na irairai e sau, meda vakaraitaka na loloma dina da qai vosovoso ni vukei ira na tamata kece ga. (1 Tim. 2:3, 4) Nida cakava qori, de dua eda na rawa ni uqeti ira era vakataki Peter, era na sega ni rairai vinaka e matada, ia e vinaka na lomadra. Eda nuidei ni Kalou e dau “raica na loma ni tamata,” ena vakatubura na ka dina e lomadra na yalomalumalumu.—1 Sam. 16:7; Joni 6:44.