E volavola na yapositolo o Paula vua nona itokani qase ni ivavakoso o Timoci: “Au vakaroti iko ena mata ni Kalou, ena mata i Karisito Jisu, kei na matadra na agilosi digitaki, mo muria tiko ga na ka kece qo ena nomu dau vakadeuci ira vinaka ni bera ni o vakatulewa, mo kua ni veitovaki.”​—1 Tim. 5:21.

Meda veivosakitaka mada o cei o ira na agilosi qo. E macala nira sega ni okati ena 144,000. Na gauna e volavola kina o Paula vei Timoci, se bera ni tekivu nodra vakaturi i lomalagi na lotu vaKarisito lumuti. Era se bera ni kabula vakayalo na yapositolo kei na so tale na lumuti, koya gona e sega ni rawa ni vakaibalebaletaki vei ira “na agilosi digitaki.”​—1 Kor. 15:​50-54; 1 Ces. 4:​13-17; 1 Joni 3:2.

O ira tale ga “na agilosi digitaki” qo e sega ni rawa ni dusi ira na agilosi talaidredre ena gauna ni Waluvu i Noa. Era to vei Setani na agilosi talaidredre qori, era okati mera timoni, era meca tale ga i Jisu. (Vkte. 6:2; Luke 8:​30, 31; 2 Pita 2:4) Era na kolotaki ina qara sega ni vakabotona ena gauna se bera mai me 1,000 na yabaki, oti qori era na vakarusai vata kei na Tevoro.​—Juta 6; Vkta. 20:​1-3, 10.

O ira “na agilosi digitaki” a tukuna o Paula, e rairai tukuni ira tiko na agilosi mai lomalagi era tokona na ‘Kalou kei Karisito Jisu,’ erau cavuti ena tikinivolatabu ya.

Era udolu vakaudolu na agilosi yalodina. (Iper. 12:​22, 23) Meda kua ni nanuma ni tautauvata kece na nodra ilesilesi. (Vkta. 14:​17, 18) Kena ivakaraitaki, e lesi e dua ga na agilosi me vakamatea e 185,000 na sotia ni Asiria. (2 Tui 19:35) De dua era na lesi e levu na agilosi mera “kumuna mai na . . . Matanitu [nei Jisu] na ka kece e veivakatarabetaki kei ira kece na beca na lawa.” (Maciu 13:​39-41) Eso tale na agilosi era rairai “kumuni ira vata na nona digitaki” mera kau i lomalagi. (Maciu 24:31) Ia era vakaroti eso tale mera ‘taqomaki keda ena noda sala kece.’​—Same 91:11; Maciu 18:10; vakatauvatana Maciu 4:11; Luke 22:43.

Kena irairai ni o ira “na agilosi digitaki” e tukuni ena 1 Timoci 5:21 era lesi ena so na itavi dokai mera vukei ira na tamata ni Kalou. Ena tikina wavolita, e veivakasalataki o Paula me baleti ira na qase, e vinakati mera dokai vei ira na lewe ni ivavakoso. Nira qarava na qase na nodra itavi, e bibi mera “kua ni veitovaki” se veivakaduiduitaki, mera kua tale ga ni vakatulewa vakariri. E bibi sara ga mera muria na ivakasala uqeti vakalou i Paula nira cakacaka tiko “ena mata ni Kalou, ena mata i Karisito Jisu, kei na matadra na agilosi digitaki.” E macala gona nira lesi eso na agilosi ena itavi mera veitaqomaki, mera raica na cakacaka vakavunau, mera lai tukuna tale ga vei Jiova na ka era raica.​—Maciu 18:10; Vkta 14:6.