Kena iKalima: E Tina ni Kalou O Meri

Kena itekitekivu: “Sa qai uqeti ga vakalevu na nona sokaloutaki na tina ni Kalou nira . . . sa lewe ni lotu vaKarisito e levu na lotu butobuto. . . . Nodra guta na lotu kei na nodra raica vakabibi na nodra sokalou [o ira na lotu butobuto era tavuki ena lotu vaKarisito], a se tekivu sara ena duanaudolu na yabaki sa oti, ena nona sokaloutaki na kalouyalewa ‘lagilagi’ kei na ‘kalouyalewa e sega ni taratagane.’”​—The New Encyclopædia Britannica (1988), Volume 16, tabana e 326 kei na 327.

Ka e kaya na iVolatabu: “Ko na kunekune, ko na vakasucuma talega e dua na gonetagane; ia mo vakayacani koya ko Jisu. Ena levu ko koya, ka na vakatokai na Luve i Koya sa cecere sara. . . . Ia ko koya ena sucu mai vei iko ena vakatokai kina me ka tabu na Luve ni Kalou.”​—Luke 1:​31-​35, Ai Vola Tabu.

E vakamatatataka na tikinivolatabu qori ni o Meri e tina ni “Luve ni Kalou,” sega ni tina ni Kalou. E veirauti beka na katonigone i Meri me kunekunetaki kina o Koya ‘e sega mada ga ni rauti koya o lomalagi’? (1 Tui 8:​27) A sega ni bau tukuna o Meri ni yaco qori. Na veicalati ni itukutuku me baleti Meri e vu ga mai na ivakavuvuli ni Letoluvakalou. Ena nona vakatokai o Meri me Theotokos (vosa vaKirisi e kena ibalebale “Koya e vakasucuma na Kalou”), se “Tina ni Kalou,” a tauyavutaka kina na Matabose e Efeso ena 431 S.K. na nona sokaloutaki o Meri. A vakayacori na bose ni lotu ena dua na siti e Efeso, sa vicavata na senitiuri na kena seda tu ni qaravi matakau e dau vakananumi kina na kalouyalewa ni vakatubukawa o Atemisi.

Sa rauta me rau veisemati na nona sokaloutaki o Meri kei na ivalavala eso e dau caka ni sokaloutaki na ivakatakarakara kei Atemisi e “lutu mai lagi,” dua vei ira qori na tayabe. (Cakacaka 19:35) A tekivu curuma vakamalua tale ga na ivakavuvuli vaKarisito na kena vakayagataki ena sokalou na matakau kei Meri kei na so tale.

Vakatauvatana na tikinivolatabu qo: Maciu 13:​53-​56; Marika 3:​31-​35; Luke 11:​27, 28

KA DINA:

E tina ni Luve ni Kalou o Meri, sega ni tina ni Kalou. Nona sokaloutaki o Meri me Tina ni Kalou e yavutaki ena ivakavuvuli ni Letoluvakalou