Na lomaocaocataki ni leqa e tarai vuravura tu nikua, e rawa ni vakavuna na rarawa kei na yalolailai. E levu gona era sa sega ni qai nuitaka ni na vinaka rawa na ituvaki. Cava era sa qai cakava?

• Eso era sega ni via vakasamataka na veigauna se bera mai.

• Eso tale era saga mera guilecava nodra leqa nira gunu, se vakayagataka na wainimate gaga.

• Eso era nanuma ni sega ni vakainaki nodra bula, ra qai via vakamatei ira ga.

• Eso na leqa o sotava ena rairai lekaleka ga, qai rawa ni veisau totolo me vinaka tale.

• Ke sega mada ga ni vinaka na kemu ituvaki, e tiko eso na ka o rawa ni cakava mo vosota kina.

• E tu ena iVolatabu na inuinui dina, e kaya ni sa vakarau oti vakadua na leqa ni kawatamata.

E kaya na iVolatabu: “Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca. Na siga kece sa dui tu ga na kena ca.”—Maciu 6:34.

Cakava ga na ka o rawata ena dua na siga. Kua ni vakalaiva na leqataki ni veigauna se bera mai mo kua kina ni qarava na nomu itavi ena dua na siga.

Nomu leqataka na veika ca ena rairai yaco, ena kuria na nomu lomaocaoca, o na sega kina ni nuitaka na veigauna vinaka se bera mai.

E masulaka na daunisame vua na Kalou: “Na nomuni vosa na cina ina yavaqu, kei na rarama ena noqu sala.” (Same 119:105) Raica mada qo na sala e va kina qori na Vosa ni Kalou na iVolatabu:

Na cina ena vakaraitaka vei keda na vanua meda muria ena bogi buto. E va tale ga qori na iVolatabu, e tu kina na ivakasala yaga e rawa nida vakatulewa vakavuku kina ena gauna dredre.

Na cina ena rawa ni vakararamataka na noda sala, meda kila kina na veika e tu mai liu. E va tale ga qori na iVolatabu, e rawa ni vakararamataka na noda rai ena veigauna vinaka se bera mai.